Introduccion

E RELATONAN den e buki aki a sosode di berdad. Nan ta saca for di e mihor buki na mundo, Bijbel. E relatonan ta conta bo historia di mundo for di tempo cu Dios a cuminsa su creacion, te na e tempo actual. Nan ta asta bisa kico Dios ta priminti di haci den futuro.

E buki aki ta duna bo un idea di loke tin skirbi den Bijbel. E ta conta tocante e hendenan di Bijbel y di loke nan a haci. E ta mustra tambe cu Dios a duna hende e gran speransa di bida eterno riba Tera den Paradijs.

Tin 116 relato den e buki aki. Nan ta dividi den ocho parti. Un blachi na principio di cada parti ta bisa den poco palabra loke tin den e parti. E relatonan ta sigui otro na e mesun orden cu nan a sosode den pasado. Esei por yuda bo siña kico a sosode prome, y kico a sosode despues.

E relatonan ta ser conta na un idioma simpel. Muchanan, hopi di boso mes por lesa nan. Mayornan, boso lo ripara cu boso yiunan mas chikito lo gusta pa boso lesa e relatonan pa nan bes tras bes. Boso lo mira cu e buki aki ta contene hopi cos interesante pa hende di tur edad.

Tin texto biblico na fin di cada relato. Ta consehabel pa lesa tur e textonan aki den Bijbel mes, pasobra ta riba nan e relato ta basa. Ora bo caba di lesa un relato, repasa tambe e preguntanan pa estudio pa e relato ei cu bo ta haya despues di Relato 116, y purba corda e contestanan.