For di Creacion te na Diluvio

Di unda shelo y Tera a bini? Con a yega di existi solo, luna y streya, y tambe e cantidad di cosnan riba Tera? Bijbel ta duna e contesta corecto ora e ta bisa cu Dios a traha nan. P’esei nos buki ta cuminsa cu relatonan biblico di creacion.

Nos ta siña cu e prome creacionnan di Dios tabata personanan spiritual cu parce Dios mes. Nan ta angel. Pero Dios a traha Tera pa hende manera nos. Ta p’esei Dios a traha e homber y e muher yama Adam y Eva, y a pone nan den un hofi bunita. Pero nan a desobedece Dios y a perde e derecho di sigui biba.

En total, for di creacion di Adam te na e Diluvio mundial, a pasa 1.656 aña. Durante e tempo ei a biba hopi mal persona. Den shelo tabatin personanan spiritual invisibel, esta, Satanas y su mal angelnan. Riba Tera tabatin Cain y hopi otro mal hende, incluyendo algun homber cu forsa extraordinario. Pero tambe tabatin bon hende riba Tera⁠—⁠Abel, Enok y Noe. Den Parti UNO nos lo lesa tocante tur e hendenan ei y loke a sosode.