Un Homber cu Curashi

ORA hende a cuminsa aumenta riba Tera, mayoria di nan a haci cos malo mescos cu Cain. Pero tabatin un homber cu tabata diferente. Esei tabata e homber cu yama Enok. Enok tabata un homber cu curashi. Hende tur rond di dje tabata haci cosnan masha malo, pero Enok a sigui sirbi Dios.

Bo sa pakico hende di e tempo ei tabata haci tanto cos malo? Wel, pensa. Ken a pone Adam cu Eva desobedece Dios y come e fruta cu Dios a prohibi? Si, esei tabata un mal angel. Bijbel ta yam’e Satanas. Y e ta purba haci tur hende bira mal hende.

Un dia Jehova Dios a manda Enok bisa e pueblo algo cu nan no kier a tende. Esaki ta Su palabra: ‘Un dia Dios lo destrui tur hende malbado.’ Probablemente e hendenan a keda masha rabia ora nan a tende esei. Kisas nan a purba mata Enok. P’esei Enok tabatin mester di masha curashi pa e bisa e pueblo kico Dios ta bai haci.

Dios no a laga Enok biba hopi tempo entre e hendenan malbado ei. Enok a biba 365 aña so. Pakico nos ta bisa “365 aña so”? Pasobra hende di e tempo ei tabata hopi mas fuerte cu nos y nan tabata biba hopi mas tanto aña. Si, Matusalen, yiu di Enok, a biba 969 aña!

Wel, despues di morto di Enok hende a bira piyo ainda. Bijbel ta bisa cu ‘tur loke nan a pensa tabata malo tur ora’, y cu ‘Tera a yena cu violencia.’

Bo sa un motibo pakico tabatin tanto trobel riba Tera e tempo ei? Dor cu Satanas a bini cu un manera nobo pa haci hende comete maldad. Nos lo bai siña di esei.