Un Yiu Bon y Uno Malo

WAK Cain y Abel ei. Nan dos ta hende grandi. Cain a bira cunukero. E ta planta grano y fruta y berdura.

Abel a bira wardado di carne. E gusta cuida lamchi. Nan ta crece bira carne grandi, y p’esei pronto Abel tin un tou grandi di carne pa cuida.

Un dia Cain y Abel a hiba un ofrenda pa Dios. Cain a ofrece cuminda cu el a produci. Anto Abel a ofrece e mihor carne cu e tabatin. Jehova a keda contento cu Abel y su ofrenda. Pero e no a keda contento cu Cain ni su ofrenda. Bo sa pakico?

Esei no ta simplemente pa motibo cu e ofrenda di Abel ta mihor cu esun di Cain, sino pa motibo cu Abel ta bon hende. E ta stima Jehova y su ruman. Pero Cain ta mal hende; e no ta stima su ruman.

P’esei Dios a bisa Cain cu e mester cambia su manera. Pero Cain no a scucha. El a bira masha rabia pasobra Dios a gusta Abel mas. P’esei Cain a bisa Abel, ‘Ban na e cunucu aya.’ Ora cu nan dos tabata nan so einan, Cain a dal su ruman Abel. El a dal e asina duro cu el a mat’e. Esei no tabata un cos teribel pa Cain haci?

Aunke Abel a muri, Dios ta cord’e ainda. Abel tabata un bon hende, y Jehova nunca ta lubida bon hende. P’esei, un dia Jehova Dios lo lanta Abel na bida atrobe. Na e tempo ei Abel lo no tin cu muri nunca mas. E por biba aki riba Tera pa semper. Lo ta bon pa siña conoce hende manera Abel, no ta berdad?

Pero Dios no ta gusta hende manera Cain. P’esei, despues cu Cain a mata su ruman, Dios a castig’e dor di mand’e leu for di otro miembro di su famia. Ora Cain a bai biba na otro parti di Tera, el a bai cu un ruman muher di dje, y el a bira su esposa.

Cu tempo Cain cu su esposa a cuminsa haya yiu. Mas yiu homber y yiu muher di Adam cu Eva a casa, y nan tambe a haya yiu. Pronto tabatin hopi hende riba Tera. Laga nos siña tocante algun di nan.