Un Bida Duro Ta Cuminsa

PAFO di e hofi di Eden, Adam cu Eva tabatin hopi dificultad. Nan tabatin cu traha duro pa nan pan. En bes di bunita palo di fruta, nan a mira hopi mata di sumpiña y bringamosa crece na tur parti. Esei ta loke a sosode ora Adam cu Eva a desobedece Dios y no a keda amigo di Dje.

Pero piyo ainda, Adam cu Eva a cuminsa muri. No lubida cu Dios a spierta nan cu nan lo muri si nan come fruta di un cierto palo. Wel, e mesun dia cu nan a come, nan a cuminsa muri. Ki bobo nan tabata di no a scucha Dios!

Tur yiu di Adam cu Eva a nace despues cu Dios a saca nan for di e hofi di Eden. Esei kiermen cu nan yiunan tambe tabatin cu bira bieu y muri.

Mare Adam cu Eva a obedece Jehova; e ora ei bida lo tabata felis pa nan y nan yiunan. Nan tur lo por a biba pa semper den felicidad riba Tera. Ningun hende lo tabatin cu bira bieu, bira malo y muri.

Dios kier pa hende biba pa semper den felicidad, y El a priminti cu un dia lo ta asina. No solamente tur e Tera lo ta bunita, sino tur hende lo gosa di bon salud. Y tur hende riba Tera lo ta bon amigo cu tur otro hende y cu Dios.

Pero Eva no tabata amigo di Dios mas. P’esei, ora el a duna lus, esei no tabata facil p’e. E tabatin dolor. Desobediencia na Jehova siguramente a resulta den hopi tristesa p’e, bo no ta haya?

Adam cu Eva tabatin hopi yiu homber y muher. Ora nan prome yiu homber a nace, nan a yam’e Cain. Nan a yama nan di dos yiu Abel. Kico a sosode cu nan? Bo sa?