Dios Ta Cuminsa Creacion

TUR e bon cosnan cu nos tin ta bini di Dios. Dios a traha solo pa e duna nos claridad di dia, y el a traha luna y streya pa nos por tin un poco claridad anochi. Y Dios a traha Tera pa nos biba riba dje.

Pero solo, luna, streya y Tera no tabata e prome cosnan cu Dios a traha. Bo sa kico el a traha prome? Prome Dios a traha personanan manera su mes. Nos no por mira e personanan ei, mescos cu nos no por mira Dios. Tal personanan ta ser yama angel den Bijbel. Dios a traha angel pa nan biba cerca dje den shelo.

E prome angel cu Dios a traha tabata masha special. E tabata e prome yiu di Dios y el a traha hunto cu su Tata. El a yuda Dios traha tur otro cos. El a yuda Dios traha solo, luna, streya y tambe nos Tera.

Con Tera tabata na e tempo ei? Na principio ningun hende por a biba riba Tera. Tabatin solamente un lama grandi di awa tapando tur e Tera. Pero Dios tabata kier pa hende biba riba Tera. P’esei el a cuminsa prepara cosnan pa nos. Kico el a haci?

Wel, prome e Tera tabatin mester di claridad. P’esei Dios a haci splendor di solo lusa riba Tera. El a haci esei di tal manera cu tabatin anochi y tambe di dia. Despues Dios a pone tera subi mas halto cu awa di lama.

Na principio no tabatin nada riba Tera. El a parce e plachi cu bo ta mira ei. No tabatin flor ni palo ni bestia. Ni sikiera tabatin pisca den lama. Dios tabatin cu haci hopi trabou mas pa e Tera bira realmente bunita pa bestia y hende por biba riba dje.