Job A Keda Fiel na Dios

BO TA sinti duele di e homber enfermo ei? Su nomber ta Job, y e señora ta su esposa. Bo sa kico e señora ta bisando Job? ‘Plega Dios y muri.’ Laga nos mira ta con bin e por a bisa un cos asina, y pakico Job a sufri asina tanto.

Job tabata un homber fiel cu a obedece Jehova. El a biba na e tera di Uz, no leu for di Canaan. Jehova a stima Job masha hopi, pero tabatin un otro persona cu a odi’e. Bo sa ken a odi’e?

Esei tabata Satanas e Diabel. No lubida, Satanas ta e mal angel cu ta odia Jehova. Satanas a logra pone Adam cu Eva desobedece Jehova, y el a pensa cu e por haci tur otro hende tambe desobedece Jehova. Pero, el a logra haci esei? No. Djis corda riba e cantidad di homber- y muhernan fiel cu nos a siña caba di dje. Cuanto di nan bo por menciona?

Despues cu Jacob y Jose a muri na Egipto, Job tabata e homber mas fiel na Jehova den henter mundo. Jehova kier a laga Satanas sa cu e no por haci tur hende bira mal hende, y p’esei Dios a bis’e: ‘Wak Job. Mira ki fiel e ta keda na mi.’

Satanas a argumenta: ‘E ta keda fiel pasobra bo ta bendicion’e y e tin hopi cos bon. Pero si bo kita eseinan, lo e maldiciona bo.’

P’esei Jehova a bisa: ‘Hacie numa. Kita tur cos. Haci cuanto cos malo cu bo kier cu Job. Nos lo mira si e ta plega mi. Solamente haci sigur di no mat’e.’

Prome, Satanas a pone hende horta tur baca y camel di Job, y a mata su carnenan. Anto Satanas a mata su 10 yiu homber- y muhernan den un tormenta. Despues, Satanas a duna Job un malesa teribel. Job a sufri masha hopi. P’esei Job su esposa a bis’e: ‘Plega Dios y muri.’ Pero Job no a hacie. Ademas, tres supuesto amigo a bini y a bis’e cu el a hiba un mal bida. Pero Job a sigui fiel.

Esei a haci Jehova masha contento, y despues el a bendiciona Job, manera bo por mira riba e plachi. Dios a cur’e di su malesa. Job a haya 10 bunita yiu mas, y a haya dos bes mas tanto baca, carne y camel cu e tabatin prome.

Abo lo keda semper fiel na Jehova mescos cu Job? Si bo hacie, Dios lo bendiciona abo tambe. Bo por biba pa semper ora Dios haci henter e Tera mes bunita cu e hofi di Eden.