Con pa Haci Dios Contento

CON nos por haci Dios contento? Tin algo cu nos por dun’e?— Yehova a bisa: “Tur bestia di mondi ta di mi.” Tambe el a bisa: “E plata ta di mi, y e oro ta di mi.” (Salmo 24:1; 50:10; Hageo 2:8) Y toch tin un cos cu nos por duna Dios. Bo sa ta kico?—

Yehova ta laga nos mes dicidi si nos kier sirbie of no. E no ta obliga nos haci loke e kier. Laga nos wak si nos por haya sa ta dicon Dios a traha nos pa nos mes por dicidi si nos ta sirbie of no.

Casi sigur bo sa kico ta un robot. Un robot ta un mashin traha pa haci tur loke esun cu a trah’e kier pa e haci. Un robot no tin moda di haci; e tin cu obedece. Awor, Yehova por a traha nos tur manera robot. E por a pone cu nos no por haci nada otro sino loke e kier pa nos haci. Pero Dios no a traha nos asina. Bo sa dicon?— Wel, pensa riba un robot di co’i hunga. Ora bo primi un conopi, e robot ta haci precis manera nan a trah’e pa e haci. Abo a yega di mira un co’i hunga asina?— Hopi bes, ora un co’i hunga no por haci nada otro cu loke nan a trah’e pa e haci, hende ta fada di hunga cu ne. Awel, Dios no kier pa nos obedec’e djis pasobra nos ta manera robot traha pa sirbie. Yehova kier pa nos sirbie door cu nos ta stim’e y door cu nos mes kier obedec’e.

Con bo ta kere cu nos Tata den shelo ta sinti ora nos ta obedec’e pasobra nos mes kier?— Wel, bisa mi: Con bo comportacion ta pone bo mama cu bo tata sinti?— Bijbel ta bisa cu un yiu sabi “ta haci su tata contento” pero un yiu bobo “ta un tristesa pa su mama.” (Proverbionan 10:1) Bo a yega di ripara con contento bo mama cu bo tata ta bira ora bo haci manera nan a bisa bo?— Pero con nan ta sinti ora bo desobedece nan?—

Awor, laga nos pensa riba nos Tata celestial Yehova. E ta bisa nos kico nos mester haci pa nos hacie sinti contento. Bo por coi bo Bijbel? Laga nos habrie na Proverbionan 27:11. Den e texto ei Dios ta bisa nos: ‘Sea sabi, mi yiu, y haci mi curason contento, pa mi por contesta esun cu desafia mi.’ Bo sa kico e kiermen aki cu “desafia”?— Wel, un hende cu ta desafia bo lo por hari bo y bisa cu bo no por haci un cos cu bo a bisa. Con Satanas ta desafia Yehova?— Laga nos ban wak.

Corda cu den Capitulo 8 di e buki aki nos a siña cu Satanas kier ta Number Un. E kier pa tur hende haci manera e ta bisa. Satanas ta bisa cu hende cu ta adora Yehova ta hacie djis pasobra Yehova ta duna nan bida eterno si nan ador’e. Despues cu Satanas a logra pa Adam cu Eva desobedece Yehova, Satanas a desafia Dios. El a bisa Dios: ‘Hende ta sirbi bo djis pa nan haya cos serca bo. Duna mi un chens anto lo bo wak con mi por pone tur hende hala for di bo.’

Ta berdad si cu e palabranan ei no ta para skirbi den Bijbel. Pero ora nos lesa e historia di un homber cu yama Job, nos ta compronde bon cla cu Satanas lo a yega di bisa Dios un cos asina. Tanto pa Satanas como pa Yehova tawata hopi importante si Job a keda fiel na Dios of no. Laga nos habri nos Bijbel na Job capitulo 1 y 2, anto nos lo mira kico a pasa.

Bo a ripara cu den Job capitulo 1 Satanas ta den shelo mes ora e angelnan a bin serca Yehova? E ora ei Yehova a puntra Satanas: “For di unda bo ta bini?” Satanas a contesta cu el a caba di pasa wak rond riba tera. E ora ei Yehova a puntr’e: ‘Bo a paga tino riba Job? Bo a mira con e ta sirbi mi sin haci nada malo?’—Job 1:6-8.

Mesora Satanas a bin cu un excuse. El a bisa: ‘Job ta sirbi bo djis pasobra e no tin ningun problema. Si bo stop di proteh’e y bendicion’e, e ta maldiciona bo den bo cara.’ E ora ei Yehova a contesta: ‘Bon anto, Satanas. Bo tin mag di haci kico cu bo kier contra dje, pero no haci Job mes ningun daño si.’—Job 1:9-12.

Kico Satanas a haci e ora ei?— El a laga hende horta Job su bacanan y su buriconan, anto mata esnan cu tawata cuida nan. Despues lamper a dal su carnenan mata, y e hendenan cu tawata cuida nan tambe. Mas despues algun hende a bin horta su camelnan, anto mata e hendenan cu tawata cuida nan tambe. Y despues Satanas a pone un mal tempo tumba e cas caminda Job su dies yiunan tawata, y nan tur a muri. Apesar di tur e cosnan ei, Job a keda sirbi Yehova.—Job 1:13-22.

Ora Yehova a topa Satanas atrobe, el a corda Satanas cu ainda Job tawata fiel. Satanas a bolbe bin cu un excuse. El a bisa: ‘Si bo djis laga mi haci su curpa bira malo, e ta maldiciona bo den bo cara.’ E ora ei Yehova a laga Satanas pone Job bira malo, pero el a spiert’e pa no mata Job si.

Satanas a dal Job cu un malesa cu a pone henter su curpa habri na herida cu pus. E heridanan tawata hole asina malo cu ningun hende no kier a pasa banda di dje. Asta Job su casa a bis’e: “Maldiciona Dios y muri!” Un par di hende cu a haci manera cos cu nan ta Job su amigo a bin bishit’e, anto nan a pon’e sinti asta mas malo ainda. Nan a bis’e cu ta un cos hopi malo e mester a haci, pasobra sino lo e no a hay’e cu asina tanto problema. Maske cuanto problema y dolor Satanas a pone Job pasa aden, toch el a keda sirbi Yehova fielmente.—Job 2:1-13; 7:5; 19:13-20.

Con bo ta kere cu Job a pone Yehova sinti door di keda fiel na dje?— El a haci Yehova contento, pasobra awor Yehova por a bisa Satanas: ‘Wak Job! E ta sirbi mi pasobra e mes kier sirbi mi.’ Abo lo ta un hende manera Job, un hende cu Yehova por uza como ehempel pa mustra cu Satanas ta un gañado?— Ta un gran honor pa nos yuda mustra cu Satanas no tawatin rason ora el a pretende cu e por kita tur hende di sirbi Yehova. Hesus, por ehempel, a sinti cu e cos ei ta un gran honor p’e.

Nunca e Gran Maestro no a laga Satanas pon’e haci nada malo. Imagina bo con contento su ehempel a haci su Tata! Yehova por a mustra riba Hesus anto contesta Satanas: ‘Wak mi Yiu! El a keda fiel na mi den tur tur cos, y ta pasobra e ta stima mi el a hacie!’ Imagina bo tambe cuanto goso Hesus ta sinti door di haci curason di su Tata contento. E goso ei ta loke a yuda Hesus wanta asta morto na un staca di tormento.—Hebreonan 12:2.

Bo kier ta manera nos Gran Maestro y haci Yehova contento?— E ora ei bo mester sigui siña kico Yehova kier pa bo haci, anto haci Dios contento door di obedec’e!