Un Ladron den Israel

MIRA loke e homber ei ta dera den su tent! Un mantel bunita, y un bara di oro y algun pida plata. El a cohe nan for di e stad Jerico. Pero, kico nan mester a haci cu e cosnan di Jerico? Bo ta corda?

Nan mester a destrui nan, y e oro y plata mester a ser duna na e tesoro di e tabernakel di Jehova. Pues, e hendenan ei a desobedece Dios. Nan a horta loke ta pertenece na Dios. E nomber di e homber ta Acan, y e hendenan hunto cu ne ta miembronan di su famia. Laga nos mira kico a sosode.

Despues cu Acan a horta e cosnan ei, Josue a manda algun homber pa bringa contra e stad Ai. Pero nan a ser derota den bataya. Algun a ser mata, y otronan a core bai. Josue a keda masha tristo. El a tira su curpa abou cu cara na suela y a puntra Jehova den oracion: ‘Pakico bo a laga e cos aki sosode cu nos?’

Jehova a contesta: ‘Lanta ariba! Israel a peca. Nan a cohe algun di e cosnan cu nan mester a destrui of duna na e tabernakel di Jehova. Nan a horta un mantel bunita y a tene esei secreto. Lo mi no bendiciona bo te ora bo destrui e mantel y tambe e hende cu a horta e cosnan ei.’ Jehova a bisa cu lo e mustra Josue ken ta e mal hende.

P’esei Josue a reuni henter e pueblo, y Jehova a indica cu e mal hende ta Acan. Acan a bisa: ‘Mi a peca. Mi a mira un mantel bunita, y un bara di oro y e pida platanan. Mi tabata kier nan asina tanto cu mi a cohe nan. Bo por haya nan dera den mi tent.’

Ora cu nan a haya e cosnan y a hiba nan pa Josue, el a puntra Acan: ‘Pakico bo a trece dificultad pa nos? Awor Jehova lo manda dificultad pa bo!’ E ora ei henter e pueblo a piedra Acan y su famia mata. Esei no ta mustra cu nunca nos no mag cohe loke no ta di nos?

Despues Israel a sali pa bai bringa contra Ai atrobe. E biaha ei Jehova a yuda su pueblo, y nan a gana e bataya.