Muraya di Jerico

KICO a pone muraya di Jerico cai? Ta manera cos cu un bom grandi a explota. Pero e tempo ei no tabatin bom; ni sikiera scopet no tabatin. Esei ta otro milager di Jehova! Laga nos ban wak kico a sosode.

Scucha loke Jehova a bisa Josue: ‘Abo y bo hombernan di guera tin cu marcha rond di e stad. Marcha rond di dje un biaha pa dia durante seis dia. Hiba e arca di pacto cu boso. Shete sacerdote mester cana dilanti dje y supla nan cacho.

E di shete dia boso tin cu marcha rond di e stad shete bes. Anto dal un supla largo riba boso cacho, y laga tur hende grita cu un grito fuerte di guera. Y e muraya lo basha plat abou!’

Josue y e pueblo a haci loke Jehova a manda. Mientras cu nan tabata marcha, tur hende a keda keto. Nan no a papia ni un palabra. Tur loke bo por a tende tabata zonido di cacho y pianan marchando. E enemigonan di e pueblo di Dios den Jerico lo mester a sinti miedo. Bo ta mira e cabuya cora cu ta colga for di un bentana? Esei ta bentana di ken? Si, Rahab a haci loke e dos spionnan a bis’e haci. Henter su famia ta paden, vigilando hunto cu ne.

Finalmente, riba e di shete dia, despues di a marcha rond di e stad shete bes, nan a supla nan cacho, e hombernan di guera a grita, y e muraya a cai. Anto Josue a bisa: ‘Mata tur hende den e stad y kim’e. Kima tur cos. Warda solamente e plata, oro, koper y hero pa pone nan den e tesoro di e tent di Jehova.’

Josue a bisa e dos spionnan: ‘Bai na e cas di Rahab, y trece e y henter su famia.’ Rahab y su famia a scapa, manera e dos spionnan a primintie.