Crusando Riu Jordan

MIRA! E Israelitanan ta crusa Riu Jordan! Pero unda e awa ta? Debi cu tin hopi awasero den e temporada ei di aña, poco minuut pasa e riu tabata yen di awa. Pero awor tur e awa a bai! Y e Israelitanan ta crusa riba tera seco mescos cu nan a haci na Lama Cora! Unda tur e awa a bai? Laga nos mira.

Ora a yega tempo pa e Israelitanan crusa Riu Jordan, Jehova a manda Josue bisa e pueblo esaki: ‘E sacerdotenan mester tuma e arca di pacto y bai dilanti nos. Ora nan hinca nan pia den e awa di Riu Jordan, e awa lo stop di core.’

P’esei e sacerdotenan a hisa e arca di pacto, y a carg’e hib’e dilanti di e pueblo. Ora nan a yega Jordan, e sacerdotenan a bai stret den e awa. E awa tabata core cu masha forsa, y e tabata hundo. Pero asina cu nan pia a mishi cu e awa, e awa a stop di core! Esei ta un milager! Mas noord den e riu, Jehova a para e awa como si fuera cu un dam. P’esei, pronto no tabatin awa mas den e riu!

E sacerdotenan cu tabata carga e arca di pacto a bai para net meimei di e riu seco. Bo ta mira nan riba e plachi? Mientras cu nan tabata para ei, tur e Israelitanan a crusa Riu Jordan riba tera seco!

Despues cu tur hende a crusa, Jehova a laga Josue bisa 12 homber fuerte: ‘Bai den e riu caminda e sacerdotenan ta para cu e arca di pacto. Cohe 12 piedra, y montona nan caminda boso tur lo pasa anochi awe. Anto, den futuro, ora boso yiunan puntra kico e piedranan ei kiermen, boso tin cu bisa nan cu e awa a stop di core ora cu e arca di pacto di Jehova a crusa Jordan. E piedranan lo haci boso corda e milager!’ Tambe Josue a montona 12 piedra caminda e sacerdotenan a para den fondo di e riu.

Porfin Josue a bisa e sacerdotenan cu tabata carga e arca di pacto: ‘Subi sali for di Jordan.’ Y asina cu nan a sali, e riu a cuminsa core atrobe.