Josue Ta Bira Lider

MOISES kier a drenta Canaan cu e Israelitanan. P’esei el a pidi: ‘Jehova, laga mi crusa Riu Jordan, y mira e bon tera.’ Pero Jehova a bisa: ‘Ta basta! No papia tocante e cos ei mas!’ Bo sa pakico Jehova a bisa esei?

Pa motibo di loke a pasa e dia cu Moises a dal e baranca. Bo ta corda? Moises y Aaron no a duna honor na Jehova. Nan no a bisa e pueblo cu ta Jehova lo a bai saca awa for di e baranca. P’esei mes Jehova a bisa cu lo e no laga nan drenta Canaan.

Pues, poco luna despues di morto di Aaron, Jehova a bisa Moises: ‘Tuma Josue, y pon’e para dilanti di Eleazar e sacerdote y e pueblo. Y ei dilanti nan tur, bisa tur hende cu Josue ta e lider nobo.’ Moises a haci precies loke Jehova a bisa, manera bo por mira riba e plachi.

Anto Jehova a bisa Josue: ‘Sea fuerte, y no tene miedo. Abo lo hiba e Israelitanan den e tera di Canaan cu mi a priminti nan, y lo mi ta cu bo.’

Mas despues Jehova a bisa Moises pa e subi bai te na top di Sero Nebo den e tera di Moab. Riba top di e sero Moises por a wak te otro banda di Riu Jordan y mira e bunita tera di Canaan. Jehova a bisa: ‘Esei ta e tera cu mi a priminti di duna e yiunan di Abraham, Isaak y Jacob. Mi a laga bo mir’e, pero mi no ta laga bo drent’e.’

Ei riba top di Sero Nebo Moises a muri. E tabatin 120 aña di edad. E tabata fuerte ainda y su bista tabata bon ainda. E pueblo a keda masha tristo y a yora dor cu Moises a muri. Pero nan a keda contento pa haya Josue como nan lider nobo.