E 12 Spionnan

WAK e frutanan cu e dos hombernan ta carga. Mira con grandi e troshi di druif ei ta. Mester di dos homber pa carg’e riba un palo. Y mira e figonan y e granatapelnan. Di unda e frutanan bunita ei a bini? Di e tera di Canaan. No lubida, Canaan ta e tera unda Abraham, Isaak y Jacob a biba prome. Pero debi na e hamber cu tabatin einan, Jacob y su famia a bai biba na Egipto. Awor, rond di 216 aña despues, Moises ta hiba e Israelitanan bek na Canaan. Nan a yega na un luga den desierto yama Kades.

Mal hende tabata biba den e tera di Canaan. P’esei Moises a manda 12 spion, y a bisa nan: ‘Busca pa sa cuanto hende ta biba einan, y con fuerte nan ta. Busca pa sa si e tera ta bon pa planta. Y haci sigur di trece fruta ora boso bolbe.’

Ora e spionnan a bolbe na Kades, nan a bisa Moises: ‘Esei realmente ta un bon tera.’ Y pa duna prueba, nan a mustra Moises algun di e frutanan. Pero 10 di e spionnan a bisa: ‘E hendenan cu ta biba ei ta grandi y fuerte. Nan lo mata nos si nos purba podera di e tera.’

E Israelitanan a spanta ora nan a tende esei. Nan a bisa: ‘Mihor nos a muri na Egipto of asta aki den desierto. Nan lo mata nos tur den bataya, y nan lo cohe nos esposa- y yiunan. Laga nos scohe un lider nobo na luga di Moises, y bolbe Egipto!’

Pero dos di e spionnan a confia den Jehova, y a purba calma e pueblo. Nan nomber ta Josue y Caleb. Nan a bisa: ‘No tene miedo. Jehova ta cu nos. Ta facil pa nos podera di e tera.’ Pero e pueblo no a scucha. Nan asta kier a mata Josue y Caleb.

Esei a haci Jehova masha rabia, y el a bisa Moises: ‘Ningun hende di 20 aña bai ariba lo drenta e tera di Canaan. Nan a mira e milagernan cu mi a haci na Egipto y den desierto, pero ainda nan no ta confia mi. P’esei nan lo dual den desierto pa 40 aña te ora delaster un di nan muri. Josue y Caleb so lo drenta e tera di Canaan.’