E Diluvio Grandi

PAFO di e arca, e hendenan a sigui cu nan bida mescos cu prome. Ainda nan no a kere cu e diluvio lo bini. Nan lo mester a hari mas cu nunca. Pero un poco despues nan no a hari mas.

Diripiente awa a cuminsa cai. El a basha for di shelo mescos cu ora bo ta basha awa for di un emchi. Noe tabatin rason! Pero awor tabata lat caba pa hende drenta den e arca. Jehova a sera e porta bon sera.

Pronto tur parti di e Tera cu no tabata halto a wordo tapa. E awa a bira manera riunan grandi. El a tumba palo y a lora piedra grandi p’aki y p’aya, y a haci masha boroto. E hendenan tabatin miedo. Nan a subi na partinan mas halto. Ai, cuanto nan a desea cu nan a scucha Noe y drenta den e arca mientras cu e porta tabata habri ainda pa nan! Pero awor tabata mucho lat.

Awa a sigui subi mas y mas halto. Pa 40 dia y 40 anochi awa a sigui basha for di shelo. El a subi te na top di e seronan, y pronto e seronan di mas halto tabata bou di awa. Pues, net manera Dios a bisa, tur hende y bestia pafo di e arca a muri. Pero tur hende den e arca tabata sano y salvo.

Noe y su yiunan a haci un bon trabou trahando e arca. Awa a his’e, y el a keda flota riba awa. Anto, un dia, despues cu awa no a cai mas, solo a sali. Ki un bista esei tabata! Tabatin un lama grandi so na tur parti. Y e unico cos na bista tabata e arca flotando riba awa.

E gigantenan a bai. Nan no tabat’ei mas pa haci hende daño. Nan tur a muri, hunto cu nan mama y tur otro mal hende. Pero, kico a sosode cu e tatanan?

E tatanan di e gigantenan no tabata hende manera nos. Nan tabata angel cu a baha pa biba manera hende riba Tera. P’esei, ora e diluvio a bini, nan no a muri hunto cu otro hende. Nan a stop di uza e curpanan humano cu nan a forma, y a bolbe na shelo manera angel. Pero nan no a ser permiti pa sigui forma parti di e famia di angel di Dios. P’esei nan a bira angel di Satanas. Den Bijbel nan ta ser yama demoño.

Awor Dios a manda un biento, y e awanan di diluvio a cuminsa baha. Cinco luna despues e arca a bin para riba cabes di un sero. Hopi dia mas a pasa, y esnan den e arca por a wak pafo y mira cabes di e seronan. E awa a sigui baha mas y mas.

Anto Noe a laga un parha preto yama raaf sali for di e arca. El a bula rond un rato anto a bini bek, pasobra e no a haya un bon luga pa baha. El a sigui haci esei y cada bes el a bini bek pa baha riba e arca.

Noe kier a mira si e awa riba Tera a seca. P’esei despues el a manda un paloma for di e arca. Pero e paloma tambe a bini bek pasobra e no por a haya luga pa baha. Noe a manda e paloma pa di dos bes, y el a regresa cu blachi di oleifi den su pik. Asina Noe a haya sa cu e awa a seca. Noe a manda e paloma pa di tres bes, y finalmente el a haya un luga seco pa e biba.

Awor Dios a papia cu Noe. El a bis’e: ‘Sali for di e arca. Hiba tur bo famia y tur e animalnan cu bo.’ Nan tabata den e arca pa mas cu un aña. P’esei nos por imagina nos mes ki contento nan tur a keda pa ta pafo atrobe, y pa ta na bida!