Dios A Proteha ‘Noe Hunto cu Shete Persona Mas’

NOE y su famia a hala cerca cerca di otro den e arca mientras cu awa tabata yobe masha duro mes. Nan tabata sinta den scuridad banda di un lampi di azeta; nan tabata tur spanta segun cu nan ta tende awasero ta basha riba dak y ta dal na e bandanan di e arca. Awa tabata yobe asina duro cu e mester tabata haci hopi desordo.

Segun cu Noe tabata wak cara di su esposa y su tres yiunan fiel cu nan casanan, sin duda, lo el a keda masha agradecido. Durante e tempo dificil ey, probablemente Noe a sintie alivia cu su sernan keri tabata sano y salvo hunto cu ne den e arca. Siguramente lo el a haci un oracion hunto cu su famia pa gradici Dios, y debi na e desordo, lo e mester a hisa su bos pa nan por a tend’e.

Noe tabata un homber cu un fe fuerte; pesey su Dios, Jehova, a proteha tanto e como su famia. (Hebreonan 11:7) Pero nan no tabatin mester di fe mas ora awa a cuminsa yobe? Al contrario, nan tabatin mester di e cualidad ey mas cu nunca pa nan por a enfrenta e dificultadnan cu tabata spera nan. Nos tambe tin mester di fe den e tempo trabahoso aki. Pues, laga nos wak kico nos por siña for di e ehempel di Noe.

“CUARENTA DIA Y CUARENTA NOCHI”

Awasero a sigui basha riba tera “cuarenta dia y cuarenta nochi.” (Genesis 7:4, 11, 12) Y e nivel di awa a keda subi mas y mas. Segun cu esey tabata sosode, Noe por a mira con Jehova tabata proteha hende husto y na mes momento castiga e malbadonan.

E Diluvio a pone fin na un rebelion cu a lanta entre e angelnan. Bou di influencia di Satanas su actitud egoista, hopi angel a dicidi di “bandona nan propio luga di biba” den cielo pa biba cu hende muher aki riba tera y a haya yiu cu a bira gigante, conoci na e idioma original como nefilim. (Judas 6; Genesis 6:4) Satanas sin duda a alegra ora el a mira con e rebelion ey a sigui corumpi hende, esta, e obra maestro di Jehova su creacion riba tera.

Sinembargo, segun cu e awa di e Diluvio a sigui subi, e angelnan malbado mester a bandona nan curpa di carni y weso y regresa na e region spiritual. Nunca mas Dios no a permiti e angelnan ey tuma curpa humano. Nan a bay laga nan esposa y yiunan kendenan a muri den e Diluvio hunto cu tur e otro hendenan cu tabata riba tera.

For di tempo di Enok, casi shete siglo prome cu e Diluvio, Jehova a duna spiertamento cu lo E destrui tur hende malbado. (Genesis 5:24; Judas 14, 15) Pero, for di e tempo ey padilanti, hende a bira mas pio; nan a causa daño na e tera y a yen’e cu violencia. Pesey, Jehova a destrui nan. Acaso Noe y su famia a alegra ora Jehova a destrui e malbadonan?

No! Y nan Dios misericordioso tampoco no a alegra. (Ezekiel 33:11) Jehova a haci tur loke tabata posibel pa salba mas tanto hende. El a manda Enok spierta e hendenan y a bisa Noe pa traha e arca. Pa decadanan, Noe cu su famia a traha riba e proyecto inmenso ey, y tur hende por a mira kico nan tabata haci. Ademas, Jehova a duna Noe e mandato pa sirbi como “predicador di husticia.” (2 Pedro 2:5) Mescos cu Enok, Noe a spierta hende di e huicio binidero. Con e hendenan a reacciona? Hesus, kende tabata den cielo y a mira loke a sosode, a bisa siglonan despues: “Nan no a haci caso te ora e Diluvio a bin y lastra nan tur bay cu ne.”—Mateo 24:39.

Bo por imagina con e situacion tabata pa Noe y su famia despues cu Jehova a cera e porta di e arca? Durante e prome 40 dianan, segun cu awasero tabata basha riba e arca dia tras dia, e ocho personanan aki probablemente a establece un rutina. Nan tabatin cu percura pa otro, tene e luga limpi y percura pa tur e bestianan. Pero, na dado momento, e arca a cuminsa sacudi y a cuminsa move. E awa a sigui subi y a lanta e arca mas y mas te cu “el a keda mas halto cu e tera.” (Genesis 7:17) Ki un muestra impresionante di e poder di Jehova, e Dios Todopoderoso!

Noe mester tabata masha agradecido cu Jehova a proteha tanto e como su famia y tambe pa e echo cu Dios tabata asina misericordioso cu el a uza nan pa spierta tur e hendenan cu a muri pafo di e arca. Por a parce cu e trabou duro cu nan a haci durante tur e añanan ey no tabata bale la pena. E hendenan no tabata kier scucha. Pensa riba esaki un rato: Noe probablemente tabatin ruman homber y ruman muher, primo y prima, subrino y subrina kendenan tabata na bida prome cu e Diluvio, pero toch ta su famia mas pega so a haci caso di e spiertamento ey. (Genesis 5:30) Ora cu e ocho personanan ey tabata sano y salvo den e arca, sin duda nan a haya consuelo pensando riba tur e tempo cu nan a dedica na yuda hende haya un oportunidad pa sobrevivi.

For di e tempo di Noe te awor, Jehova no a cambia. (Malakias 3:6) Hesucristo a splica cu nos tempo lo ta mescos cu “e dianan di Noe.” (Mateo 24:37) Nos ta biba den un tempo remarcabel, un tempo yen di problema cu lo caba ora Dios pone un fin na e mundo corupto aki. Awe tambe, e pueblo di Dios ta spierta tur hende cu kier scucha e mensahe di Dios. Lo bo haci caso di e mensahe ey? Y si bo a acepta e mensahe di salbacion aki, lo bo kier join nos den compartie cu otro hende? Noe cu su famia a laga un bon ehempel pa nos tur.

‘NAN A PASA SANO Y SALVO DOOR DI E AWANAN DI DILUVIO’

Segun cu e arca tabata drif riba lama bruto, e personanan den e arca sigur lo a tende e zonido di kraakmento di e biganan di e arca. Acaso Noe tabata preocupa cu e olanan grandi lo a haci daño na e structura di e arca? No! Ta hende den nos tempo kisas lo duda cu e structura lo por a wanta, pero Noe si no a duda. Bijbel ta bisa: “Pa medio di fe Noe ... a traha un arca.” (Hebreonan 11:7) Den kico Noe tabatin fe? E tabatin fe den un pacto, esta, un convenio, den cua Jehova a priminti cu lo e proteha Noe y su famia durante e Diluvio. (Genesis 6:18, 19) Esun cu a crea universo, planeta Tera y tur ser bibo riba dje no por a percura pa e arca keda intacto? Ta claro cu e por a haci esey. Noe tabatin tur rason pa confia cu Jehova lo cumpli cu Su promesa. Y esey ta exactamente loke a sosode: Noe y su famia “a pasa sano y salvo door di e awanan di diluvio.”—1 Pedro 3:20.

Finalmente, despues di 40 dia y 40 anochi, awa a stop di yobe. Segun nos kalender, esey lo a tuma luga na december di aña 2370 prome cu Cristo. Pero, e aventura di e famia den e arca no a caba eynan. E arca yen di criatura a keda drif riba e lama inmenso cu a tapa e top di tur e seronan completamente. (Genesis 7:19, 20) Nos por imagina con Noe a reparti e trabounan mas pisa entre e cu su yiu hombernan Sem, Cam y Jafet pa nan por a alimenta tur e bestianan y percura pa nan keda limpi y bon di salud. Ta claro cu Jehova Dios, kende a haci tur e criaturanan salbahe manso pa nan por a drenta e arca, por a percura pa nan keda manso tambe durante e Diluvio.a

Noe a tene un registro confiabel di tur e sucesonan. E registro ey ta menciona ki dia awa a cuminsa yobe y ki dia el a stop. E ta menciona tambe cu mundo a keda completamente bou di awa pa 150 dia. Finalmente, e awa a cuminsa baha. Riba un dia historico, na luna di april di aña 2369 prome cu Cristo, e arca a keda pega riba “e seronan di Ararat”, cu ta keda den un region di Turkia di awendia. Y tabata na luna di juni, 73 dia despues, cu top di e seronan di mas halto a bira visibel. Tres luna despues, na september, Noe a dicidi di kita un parti di e dak di e arca. Tur e trabou ey tabata bale la pena ya cu nan a haya claridad y aire fresco. Prome cu esey, Noe a cuminsa wak si e tera tabata bon caba pa biba riba dje; pa cuminsa el a manda un raaf, pero esaki tabata bay bin como cu e no por a haya un luga pa sosega. Despues, Noe a manda un paloma cu a bay bin un par di biaha te ora cu el a haya un luga pa traha su neishi.—Genesis 7:24–8:13.

Sin duda, e cosnan spiritual tabata mas importante pa Noe cu tur otro cos. Nos por imagina cu Noe y su famia tabata bin hunto regularmente pa haci oracion y pa papia tocante nan Tata celestial cu tabata cuida nan. Noe a depende riba Jehova pa tur decision importante cu e mester a tuma. Hasta ora Noe a mira cu finalmente e tera “tabata seco”—despues cu nan a pasa mas cu un aña den e arca—toch e no a dicidi di habri e porta di e arca pa nan tur sali pafo. (Genesis 8:14) El a warda te ora Jehova a bis’e pa sali.

Cabesnan di famia por siña hopi for di e ehempel di Noe. E homber fiel aki tabata bon organisa, diligente, e tabatin pasenshi y tabata traha na bienestar di tur esnan bou di su cuido. Pero e cos mas importante p’e tabata pa haci e boluntad di Jehova Dios. Si nos imita e fe di Noe den e aspectonan aki, esey lo resulta den hopi bendicion pa tur nos sernan keri.

“SALI FOR DI E ARCA”

Finalmente, Jehova a duna Noe e mandato: “Sali for di e arca, abo y bo esposa y bo yiu hombernan y esposanan di bo yiu hombernan hunto cu bo.” Noe y su famia a obedece Dios y a sali hunto cu tur e bestianan. Pero nos no mester pensa cu nan a sali di un manera caotico. Bijbel ta bisa cu “segun nan sorto, [nan] a sali for di e arca.” (Genesis 8:15-19) Ora Noe y su famia tabata pafo, nan por a disfruta di e aire fresco y a wak e seronan di Ararat tur rond di nan. Nan tabatin dilanti nan un tera limpi limpi: sin nefilim, sin violencia, sin angel rebelde y sin hende malbado.b Porfin humanidad tabatin e oportunidad pa cuminsa un bida nobo.

Noe tabata sa kico e mester haci. Pa cuminsa, el a traha un altar pa rindi adoracion na Dios. El a uza algun di e bestianan cu tabata limpi den bista di Dios—manera esnan cu nan a hiba den e arca den grupo di “shete”—pa sacrifica como un ofrenda kima na Jehova. (Genesis 7:2; 8:20) Jehova a keda contento?

Bijbel ta contesta e pregunta ey cu e palabranan alentador aki: ‘Jehova a sinti un holo dushi.’ Si, Jehova no a sinti e dolor di curason mas cu e tabata sinti ora hende a yena e tera cu violencia. Mas bien, el a sinti un alegria di mira un famia di adorador fiel cu tabata determina pa haci su boluntad. Pero, Jehova no a spera perfeccion di nan, pasobra e mesun texto cita akiriba ta sigui bisa: “E intencion di curason di hende ta malo for di su hubentud.” (Genesis 8:21) Laga nos wak con Jehova a sigui demostra pasenshi y compasion na humanidad.

Dios a maldiciona e tera despues di e rebelion di Adam cu Eva. Pesey no tabata facil pa nan cultiva e tera. Pero dado momento, Dios a kita e maldicion ey. Lamek, e tata di Noe, a profetisa cu su yiu lo guia humanidad na un tempo di descanso, es decir, un tempo cu e tera lo no ta maldiciona mas. Lamek a duna su yiu e nomber Noe cu probablemente ta nifica “Descanso” of “Consuelo.” Noe mester a keda hopi contento ora el a haya sa cu e lo a mira e profecia ey cumpli y cu di e momento ey padilanti lo tabata mucho mas facil pa cultiva e tera. No ta nada straño anto cu mesora Noe a cuminsa planta!—Genesis 3:17, 18; 5:28, 29; 9:20.

Na mesun tempo, Jehova a duna tur e descendientenan di Noe algun ley masha cla y simpel pa guia nan den bida, entre otro, pa no mata y pa no haci mal uzo di sanger. Ademas, Dios a cera un pacto cu humanidad den cua el a priminti cu nunca mas lo e caba cu tur bida riba tera pa medio di un diluvio. Como prueba cu e lo cumpli cu su promesa, Jehova a laga hende mira un fenomeno natural maraviyoso den cielo, esta, e regenboog. Te awe, cada regenboog cu nos mira ta recorda nos di e bunita promesa ey cu Jehova a haci.—Genesis 9:1-17.

Si e historia di Noe tabata djis un cuenta anto lo el a caba eynan, esta cu e regenboog. Pero, Noe tabata un homber cu realmente a existi, y su bida no tabata facil. Den e tempo ey, hende tabata biba hopi mas largo cu awor, y Noe no tabata un excepcion, el a biba 350 aña despues di e Diluvio, y durante e siglonan ey, el a pasa den hopi sufrimento. Por ehempel, na un ocasion, Noe a comete un pica serio ora el a bira burachi. Su nieto Canaan a probecha di e situacion y a comete un pica mas serio ainda, un pica cu tabatin consecuencia teribel pa e descendientenan di Canaan. Ademas, Noe a biba bastante largo pa mira entre otro cu e tera a yena cu violencia den e dianan di Nimrod y con su descendientenan a cuminsa adora dios falso. Pero ta claro cu Noe a mira cosnan positivo tambe, entre otro, el a mira cu su yiu Sem a pone un excelente ehempel di fe pa su famia.—Genesis 9:21-28; 10:8-11; 11:1-11.

Mescos cu Noe, nos tin cu keda fiel pase loke pase. Maske hende rond di nos no ta haci caso di e spiertamento cu e Dios berdadero ta duna of ta stop di sirbie, nos si tin cu sigui e ehempel di Noe. Jehova ta aprecia masha hopi ora nos ta fiel y ta persevera. Manera Hesus a bisa: “Esun cu persevera te na fin ta esun cu lo ser salba.”—Mateo 24:13.