El A “Cana cu Dios”

NOE a stret su lomba y rek su musculonan cu tabata haci dolor. Imagina Noe sinta riba un balki hancho ta sosega un rato di su trabou, mientras e ta wak e inmenso structura di e arca. Den aire tabatin un holo fuerte di asfalt, y bo por a tende zonido di e hermentnan di carpinte resona. For di caminda Noe tabata sinta, e por a mira su yiu hombernan, trahando duro riba varios parti di e inmenso structura di palo. Su esposa stima, su yiunan y nan casa ya tabatin varios decada ta traha riba e proyecto aki. Nan a yega basta leu cu e arca, pero ainda tabatin hopi cos mas di haci.

E hendenan di e region tabata pensa cu nan cabes no tabata bon. Mas e arca a haya forma, mas nan tabata haci bofon di e spiertamento cu Noe tabata duna nan, esta, cu lo a bin un diluvio cu lo a inunda henter mundo. Un desaster asina tabata parce increibel y absurdo! Nan no por a compronde pakico e homber ey tabata perde tur su tempo—y tempo di su famia—trahando riba un proyecto ridiculo asina. Pero Jehova, e Dios di Noe, tabata pensa completamente otro.

E Palabra di Dios ta bisa: “Noe tabata cana cu Dios.” (Genesis 6:9) Kico esey a nifica? E no a nifica cu Dios a baha na tera ni tampoco cu Noe a bay cielo; mas bien, cu Noe a obedece Jehova ‘a pie de la letra’ y a stim’e asina tanto cu, na moda di papia, e cu Jehova tabata cana hunto manera amigo intimo. Miles di aña despues, Bijbel a bisa di Noe cu ‘pa medio di su fe, el a condena mundo.’ (Hebreonan 11:7) Den ki sentido el a haci esey? Kico nos por siña for di e fe cu Noe a demostra?

UN HOMBER RECTO DEN UN MUNDO MALBADO

Noe a lanta den un mundo cu dia pa dia tabata bay di malo pa pio. E situacion tabata malo caba for di tempo di su bisawelo Enok, un otro homber husto cu a cana cu Dios. Enok a profetisa cu lo a bin un dia di huicio riba tur hende malbado. Den tempo di Noe, maldad a yega na un nivel nunca bisto. De echo, for di e punto di bista di Jehova, e mundo di e tempo ey tabata corumpi, of ruina, pasobra e tabata yen di violencia. (Genesis 5:22; 6:11; Judas 14, 15) Con bin e situacion a bira asina malo?

Algo masha lamentabel a tuma luga entre Dios su yiunan celestial, esta, e angelnan. Hopi tempo prome, un di nan a rebela contra Jehova. El a bira Satanas e Diabel ora el a calumnia Dios y hinca Adam cu Eva den tentacion pa comete pica. Den tempo di Noe, algun otro angel tambe a rebela contra Jehova su gobernacion husto y a bandona e trabou cu Dios a duna nan den cielo. Nan a bin na tera, a tuma curpa di hende y casa cu muher bunita. E angelnan rebelde aki tabata orguyoso y egoista, y nan tabatin masha mal influencia riba hende.—Genesis 3:1-5; 6:1, 2; Judas 6, 7.

Es mas, e unionnan innatural aki—entre hende muher y angel—a produci yiunan gigante, kendenan tabatin forsa extraordinario. E gigantenan aki tabata tiranonan salbahe cu a pone e actitud cruel y malbado di mundo bira mas perverso ainda. Pesey, den bista di e Creador, ‘maldad di hende tabata grandi riba tera, y tur intencion di e pensamentonan di hende su curason tabata continuamente maldad so.’ Jehova a dicidi cu lo e caba cu e mundo malbado ey denter di 120 aña.—Genesis 6:3-5.

Noe a haya un bon esposa, y ora e tabatin mas cu 500 aña di edad, el a bira tata di tres yiu homber: Sem, Cam y Jafet.a Manera bo por imagina, lo tabata dificil pa lanta un famia den un ambiente asina. Pero Noe a logra haci esey. E cu su casa mester a proteha nan yiunan contra e mal influencia cu tabata rondona nan. Mucha homber chikito sa keda masha impresiona cu “hombernan poderoso” y “hombernan di fama.” Pues, e yiunan di Noe lo a admira e gigantenan. Noe y su esposa no por a evita cu nan chikitinnan lo a tende di algun di e barbaridadnan cu e gigantenan ey tabata comete. Pero loke si nan por a haci ta siña nan e berdad fascinante tocante Jehova Dios, Esun cu ta odia tur tipo di maldad. Nan mester a yuda nan yiunan compronde cu e violencia y rebelion cu tabata reina riba tera a haci Jehova masha tristo.—Genesis 6:6.

Mayornan awe lo por compronde bon den ki situacion Noe y su esposa tabata. Awendia tambe, mundo ta pesta cu violencia y rebelion. Hasta mayoria di entretenimento pa mucha ta satura cu e topiconan ey. Mayornan sabi ta haci nan maximo esfuerso pa contraresta e tipo di influencianan ey y siña nan yiunan tocante Jehova, e Dios di paz, kende un dia lo caba cu tur violencia. (Salmo 11:5; 37:10, 11) Si, ta posibel pa lanta yiu cu ta haci loke ta corecto den un mundo malbado. Noe cu su casa a logra esey. Nan yiunan a resulta bon hende, y nan a casa cu hende muher cu tambe tabata dispuesto pa pone Jehova, e Dios berdadero, na prome luga den nan bida.

“TRAHA PA BO MES UN ARCA”

Riba un dia, Noe su bida a cambia pa semper. Jehova a papia cu ne y a bis’e cu el a dicidi cu e ta bay pone un fin na e mundo di e tempo ey. Y Dios a duna su sirbidor stima e siguiente mandamento: “Traha pa bo mes un arca di palo.”—Genesis 6:14.

E arca aki no tabata un barco, manera algun hende ta kere. E no tabatin kiel ni timon. Basicamente, e tabata un caha masha grandi mes. Jehova a duna Noe e midinan precies di e arca, algun detaye tocante su diseño y e instruccion pa fur’e di paden y di pafo cu breu. Y el a splica Noe dicon: ‘Mi ta bay trece un diluvio di awa riba tera, y tur loke tin riba tera lo perece.’ Pero Jehova a dun’e e instruccion aki tambe: “Bay den e arca—abo cu bo yiu hombernan y bo esposa, y esposanan di bo yiu hombernan hunto cu bo.” Ademas, Noe mester a hinca tur sorto di bestia den e arca. Ta esnan cu tabata den e arca so lo a sobrevivi e Diluvio cu tabata na caminda!—Genesis 6:17-20.

Noe tabatin un tarea enorme su dilanti. E mester a traha un arca masha grandi mes: mas o menos 130 meter largo, 20 meter hancho y 10 meter halto. Su tamaño tabata hopi mas grandi cu e barconan di palo di mas grandi cu hende a yega di traha den nos tempo pa nabega. Acaso Noe a cobardia pa e asignacion aki? El a keha cu e tarea tabata mucho dificil, of el a cambia algun detaye pa haci e trabou mas facil p’e? No. Segun Bijbel, ‘Noe a haci conforme tur loke Dios a orden’e.’—Genesis 6:22.

Construccion di e arca a tuma varios decada, kisas un 40 pa 50 aña. Nan mester a kap palo y hiba nan na e luga di construccion. Nan mester a corta e palonan, schaaf nan y traha biga, tabla y otro cosnan. Despues, mester a pega nan tur na otro. E arca mester tabatin tres piso, varios camber of compartimento y un porta na banda. Evidentemente, e tabatin bentana tambe a lo largo di e rand ariba y un dak cu probablemente tabata un poco schuin pa asina awa por a basha for di dje.—Genesis 6:14-16.

Segun cu añanan a pasa y e arca pocopoco tabata haya forma, Noe lo mester tabata masha contento di por tabatin e apoyo di su famia. Pero tabatin un otro aspecto di su asignacion cu lo mester tabata hasta mas dificil cu construccion di e arca. Bijbel ta bisa nos cu Noe tabata “un predicador di husticia.” (2 Pedro 2:5) Esaki ta nifica cu Noe tabatin e curashi pa spierta e hendenan malbado y sin Dios ey tocante e destruccion cu tabata na caminda. Con nan a reacciona? Wel, Hesucristo a bisa cu nan “no a haci caso.” El a splica cu nan tabata asina ocupa cu asuntonan di bida diario—come, bebe y casa—cu nan no a presta atencion na Noe. (Mateo 24:37-39) Sin duda, hopi hende a haci bofon di Noe y su famia, y podise algun di nan a hasta menas’e y atac’e violentamente.

Pero Noe cu su famia no a entrega. Nan a sigui traha riba e arca aunke e hendenan constantemente tabata laga nan sinti cu loke nan tabata haci tabata co’i loco y perdemento di tempo. Famianan cristian awe por siña un bon les for di e fe cu Noe y su famia a demostra. Al fin y al cabo, nos ta bibando den e tempo cu Bijbel ta yama “e ultimo dianan” di e mundo aki. (2 Timoteo 3:1) Y Hesus a bisa cu nos tempo lo ta mescos cu e tempo den cua Noe a traha e arca. Ta bon pa cristiannan corda riba Noe ora hende ta reacciona riba e mensahe di e Reino di Dios cu un actitud indiferente, cu bofon of hasta cu persecucion. Noe tambe a confronta e tipo di dificultadnan ey.

“BAY DEN E ARCA”

Despues di varios decada, e arca pocopoco pero sigur a yega na su etapa final. Ora Noe tabatin casi 600 aña, su tata, Lamek, a muri.b Cinco aña despues, su welo, Matusalen, a muri na edad di 969 aña. Segun Bijbel, e ta e homber cu a biba mas largo! (Genesis 5:27) Tanto Matusalen como Lamek tabata contemporaneo di e prome homber, Adam.

E mesun aña cu Matusalen a muri, e patriarca Noe a ricibi un mensahe nobo for di Jehova Dios: “Bay den e arca, abo y tur hende di bo cas.” Ademas, el a bisa Noe pa hiba tur sorto di bestia den e arca: di esnan considera limpi, esta, bestia adecuado pa ofrece como sacrificio, e mester a hiba shete di cada y di tur otro bestia dos di cada.—Genesis 7:1-3.

Lo mester tabata un bista impresionante pa mira cientos di bestia, brabo, manso y di tur tamaño y forma, basha bin for di tur skina: canando, bulando, lastrando. Nos no tin nodo di imagina pober Noe ta core tras di e bestianan salbahe ey of ta lastra nan pa obliga nan drenta den e arca. E relato ta bisa cu nan “a bay ... cerca Noe den e arca.”—Genesis 7:9.

Tin hende tin problema pa acepta cu esaki a tuma luga. Nan no por imagina nan cu tur e bestianan ey por a biba na paz cu otro den un luga cera. Wel, pensa un rato: E Creador di universo no tin poder pa domina e bestianan cu el a crea? E no por haci nan manso si ta necesario? No lubida cu Jehova ta e Dios cu a habri Lama Cora y cu a pone solo para keto. Lo e no por a cumpli cu tur e sucesonan describi den e relato di Noe? Claro cu si, y esey ta loke el a haci tambe!

Ta berdad cu Dios lo por a salba e bestianan di un otro manera si e tabata kier. Pero como muestra di su sabiduria, el a opta pa uza un manera cu ta laga nos corda riba e confianza cu el a pone den hende na principio ora el a duna nan e tarea di cuida tur loke ta biba riba e tera aki. (Genesis 1:28) Pesey, hopi mayor awe ta uza e relato di Noe pa siña nan yiunan cu Jehova ta balora tanto hende como bestia, pasobra ta e crea nan.

Jehova a bisa Noe cu den shete dia e Diluvio lo a bin. E siman ey lo mester tabata hopi druk pa e famia. Nos por imagina cuanto trabou nan tabatin pa hinca tur e bestianan y nan cuminda den un forma ordena den e arca y tambe tur nan mes pertenencianan. E esposa di Noe y e esposanan di Sem, Cam y Jafet siguramente a haci esfuerso pa prepara e parti paden di e arca di tal manera cu nan por a biba un tiki comodo.

Con e hendenan a reacciona ora nan a mira tur esey? “Nan no a haci caso” a pesar di tur e evidencia cu Jehova tabata bendiciona Noe y su trabou. Nan mester a ripara con tur e bestianan tabata bin pa drenta e arca. Pero nan actitud indiferente no mester sorprende nos. Awe ta mescos. Hende no ta haci caso di e evidencia innegabel cu nos ta bibando den e ultimo dianan di e mundo aki. Y manera apostel Pedro a profetisa, hopi hende ta haci bofon di esnan cu si ta haci caso di e spiertamento di Dios. (2 Pedro 3:3-6) Asina tambe e hendenan sigur a haci bofon di Noe y su famia.

Ki ora nan a stop di haci bofon? E relato ta bisa nos cu unabes Noe a hinca su famia y e bestianan den e arca, Jehova “a cera e porta su tras.” E accion divino ey sin duda a cera boca di cualkier hacido di bofon cu tabata ey banda. Y si esey no a silencia nan, e awasero sigur a hacie! Unabes awa a cuminsa cay, el a sigui cay nonstop te ora el a inunda e tera, precies manera Jehova a bisa cu lo a pasa.—Genesis 7:16-21.

Acaso Jehova a keda contento cu tur e hendenan malbado ey a muri? No! (Ezekiel 33:11) Al contrario, el a duna nan tur chens di cambia nan bida. Nan lo por a obedece Dios y sobrevivi e Diluvio? Si, pasobra e manera cu Noe a hiba su bida a demostra cu esey tabata posibel. Noe a cana cu Jehova, es decir, el a obedece Dios den tur cos; asina el a mustra cu hende por hiba un bida cu ta agrada Dios. Su fe a condena e mundo di su tempo, pasobra su fe a saca na cla e gran maldad di e hendenan di su tempo. Y no esey so, su fe a resulta den su salbacion y esun di su famia. Si bo imita e fe di Noe, bo tambe lo por salba bo mes y bo sernan keri. Mescos cu Noe, bo por cana cu Jehova Dios como bo amigo. Y e amistad ey por dura pa semper!