Noe Ta Traha un Arca

NOE tabatin un esposa y tres yiu homber. Su tres yiunan tabata Sem, Cam y Jafet. Y cada yiu tabatin un esposa. Pues, tabatin ocho persona den e famia di Noe.

Awor Dios a manda Noe haci un cos straño. El a bis’e traha un arca grandi. E arca tabata grandi manera un barco, pero el a parce mas manera un caha grandi y largo. ‘Trah’e cu tres piso’, Dios a bisa, ‘y traha camber den dje.’ E cambernan tabata pa Noe y su famia, pa e animalnan y pa e cuminda cu nan tur tabatin mester.

Tambe Dios a bisa Noe traha e arca di tal manera cu awa no por drent’e. Dios a bisa: ‘Mi ta bai manda un diluvio grandi di awa y destrui henter mundo. Tur hende cu no ta den e arca lo muri.’

Noe y su yiunan a obedece Jehova y nan a cuminsa traha. Pero e otro hendenan tabata blo hari. Nan a sigui haci malo. Ningun hende a kere Noe ora el a bisa nan kico Dios tabata bai haci.

A tuma hopi tempo pa nan traha e arca, pasobra e tabata masha grandi. Finalmente, despues di hopi aña, nan a cab’e. Awor Dios a bisa Noe pa e hiba e animalnan den e arca. Dios a bis’e hiba dos di algun sorto di animal, un macho y tambe un embra. Pero Dios a bisa Noe hiba shete di otro sorto di animal. Tambe Dios a bisa Noe hiba tur e diferente sorto di parhanan. Noe a haci precies loke Dios a bis’e.

Despues, Noe y su famia tambe a drenta den e arca. Anto Dios a sera e porta. Paden, Noe y su famia a spera. Djis imagina bo cu bo tabata ei hunto cu nan den e arca, sperando. E diluvio realmente lo bini manera Dios a bisa?