Josafat A Confia den Jehova

BO SA ken e hombernan ei ta y kico nan ta haci? Nan ta bai guera, y esnan dilanti ta canta. Kisas bo ta puntra: ‘Pakico esnan cu ta canta no tin lansa y spada pa nan bringa cu ne?’ Ban mira.

Josafat ta Rei di e reino di dos tribu di Israel. El a biba na e mesun tempo cu Rei Acab cu Jezabel di e reino di noord di 10 tribu. Pero Josafat ta un bon Rei, y su tata Asa tambe tabata un masha bon Rei. Pues, pa hopi aña e pueblo di e reino di dos tribu di zuid a gosa di un bon bida.

Pero awor algo a sosode cu a pone e pueblo haya miedo. Mensaheronan a bin bisa Josafat: ‘Un ehersito grandi di e paisnan di Moab, Amon y Sero Seir ta bini pa ataca bo.’ Hopi Israelita a reuni na Jerusalem pa busca yudansa di Jehova. Nan a bai na e tempel, y ei Josafat a pidi: ‘O Jehova nos Dios, nos no sa kico pa haci. Nos no por cu e ehersito grandi aki. Nos ta acudi na abo pa yudansa.’

Jehova a scucha, y el a manda un sirbidor di dje bisa e pueblo: ‘E bataya no ta di boso, sino di Dios. Boso lo no tin cu bringa. Wak so, y mira con Jehova ta salba boso.’

Pues, su manece Josafat a bisa e pueblo: ‘Confia den Jehova!’ Anto el a pone cantante cana dilanti di su soldanan, y mientras cu nan tabata marcha, nan tabata canta alabansa na Jehova. Bo sa kico a sosode ora nan a yega cerca di e bataya? Jehova a pone e soldanan enemigo mes bringa contra otro. Y ora e Israelitanan a yega, tur solda enemigo tabata morto!

No tabata sabi di Josafat su parti pa confia den Jehova? Nos tambe lo ta sabi si nos confia den dje.