Dos Mucha Cu A Bolbe Biba

SI BO muri, con bo mama lo sintie si bo bolbe biba? E lo keda masha contento! Pero hende cu muri por bolbe biba? Esei a yega di sosode?

Wak e homber ei, y e señora cu e mucha homber. E homber ta profeta Elias. E señora ta un viuda di e stad Sarepta, y e mucha homber ta su yiu. Wel, un dia e mucha a bira malo. El a bira mas malo te cu finalmente el a muri. Anto Elias a bisa su mama: ‘Duna mi e mucha.’

Elias a hiba e mucha morto na e piso ariba y a pon’e riba cama. Anto el a pidi: ‘O Jehova, laga e mucha bolbe biba.’ Y e mucha a cuminsa hala rosea! E ora ei Elias a baha cu ne bek y a bisa su mama: ‘Mira, bo yiu ta na bida!’ P’esei e mama ta asina contento.

Un otro profeta importante di Jehova ta Eliseo. El a traha como ayudante di Elias. Pero cu tempo Jehova a uza Eliseo tambe pa haci milager. Un dia Eliseo a bai na e stad Sunem, unda un señora a trat’e cu bondad. Despues, un dia e señora a haya un yiu homber.

Un mainta, ora e mucha tabata mas grandi, el a bai cerca su tata cu tabata traha den cunucu. Diripiente e mucha a grita: ‘Mi cabes ta haci dolor!’ Despues cu nan a hib’e cas, e mucha a muri. Ki tristo su mama a bira! Di biaha el a bai busca Eliseo.

Ora Eliseo a yega, el a bai den camber cerca e mucha morto. El a haci oracion na Jehova, y a pone su curpa riba esun di e mucha. Pronto e curpa di e mucha a bira cayente, y el a nister shete biaha. Ki felis su mama a bira ora el a drenta y haya su yiu na bida!

Masha hopi hende a muri. Esei a haci nan famia- y amigonan masha tristo. Nos no tin poder pa lanta hende morto. Pero Jehova si. Despues nos lo siña con Jehova lo trece miyones di hende bek na bida.