Un Mucha Muher A Yuda un Homber Poderoso

BO SA kico e mucha muher ta bisando? E ta conta e señora tocante Eliseo, e profeta di Jehova, y di e cosnan maraviyoso cu Jehova a yud’e haci. E señora no conoce Jehova pasobra e no ta Israelita. Laga nos mira pakico anto e mucha ta den e cas di e señora.

E señora ta di Siria. Su casa ta Naaman, hefe di ehersito di Siria. E Sirionan a captura e mucha Israelita aki, y awor e ta cria di e casa di Naaman.

Naaman tin un malesa grave yama lepra. E malesa ei asta por haci carni di hende cai. P’esei e mucha a bisa e casa di Naaman: ‘Mare Naaman por a bai cerca e profeta di Jehova na Israel. E por cur’e di su lepra.’ Despues un hende a conta e señora su casa loke e mucha a bisa.

Naaman tabatin masha gana di cura; p’esei el a dicidi di bai Israel. Ora el a yega el a bai na e cas di Eliseo. Eliseo a manda su cria sali y bisa Naaman pa e bai baña shete bes den Riu Jordan. Naaman a rabia masha, y el a bisa: ‘E riunan di Siria ta mihor cu cualkier riu di Israel!’ Despues di a bisa esei, Naaman a bai.

Pero un cria di dje a bis’e: ‘Señor, si Eliseo a bisa bo haci algo dificil, lo bo a hacie. Awor, pakico bo no por djis baña bo curpa manera el a bisa?’ Naaman a scucha su cria y a bai baña den Riu Jordan shete bes. Despues di a haci esei, su carni a bira firme y sano!

Naaman a keda masha contento. El a bolbe cerca Eliseo y a bis’e: ‘Awor mi sa sigur cu e Dios di Israel ta e unico Dios berdadero den henter mundo. P’esei, acepta un regalo di mi.’ Pero Eliseo a contesta: ‘No, mi no ta tum’e.’ Eliseo sa cu lo ta malo pa acepta e regalo, pasobra ta Jehova a cura Naaman. Pero Gehazi, e cria di Eliseo, kier e regalo pa su mes.

Pues, esaki ta loke Gehazi a haci. Despues cu Naaman a bai, Gehazi a core bai y a alcans’e. Gehazi a bisa: ‘Eliseo a manda mi pa bisa bo cu e kier algun di bo regalonan pa un par di amigo cu a caba di yega.’ Naturalmente, esei tabata un mentira. Pero Naaman no tabata sa cu ta un mentira; p’esei el a duna Gehazi algun di e cosnan.

Ora Gehazi a yega cas, Eliseo tabata sa kico el a haci. Jehova a bisa Eliseo. Eliseo a bisa: ‘Dor cu bo a haci e cos malo ei, e lepra di Naaman ta bin riba bo.’ Y a sosode asina di biaha!

Kico nos por siña di tur esei? Na prome luga, nos mester ta manera e mucha y papia tocante Jehova. Esei por yuda hende hopi. Di dos, nos no mag di ta orguyoso manera Naaman tabata na principio. Mas bien, nos tin cu obedece sirbidornan di Dios. Y di tres, nos no mag gaña manera Gehazi. Nos ta siña hopi cos ora nos lesa Bijbel, no ta berdad?