Dios A Yuda Rei Ezekias

BO SA pakico e homber aki ta haci oracion na Jehova? Pakico el a pone e cartanan ei dilanti di e altar di Jehova? E homber ta Ezekias. E ta Rei di e dos tribunan di Israel di zuid. E tin problema grandi. Pakico?

Pasobra e ehersito di Asiria a destrui e 10 tribunan di noord caba. Jehova a laga esei sosode pasobra nan a bira hopi malbado. Y awor e ehersito di Asiria a bini pa bringa contra e reino di dos tribu.

E rei di Asiria a caba di manda carta pa Rei Ezekias. Ezekias a pone e cartanan dilanti di Dios. E cartanan ta tene mofa di Jehova, y ta bisa Ezekias pa entrega. P’esei Ezekias a pidi: ‘O Jehova, salba nos di e rei di Asiria. Anto tur nacion lo sa cu bo so ta Dios.’ Jehova a scucha Ezekias?

Ezekias tabata un bon Rei. E no tabata manera e mal reinan di e reino di 10 tribu di Israel, ni e no tabata manera su mal tata Rei Acaz. Ezekias a obedece cu cuidou tur lei di Jehova. P’esei, despues cu Ezekias a caba cu su oracion, profeta Isaias a mand’e e mensahe aki di Jehova: ‘E rei di Asiria lo no drenta Jerusalem. Ningun solda di dje ni sikiera lo yega cerca. Nan lo no tira ni un flecha riba e stad.’

Wak e plachi riba e blachi aki. Bo sa ken tur e soldanan morto ei ta? Nan ta di Asiria. Jehova a manda su angel, y den un solo anochi e angel a mata 185.000 solda di Asiria. P’esei e rei di Asiria a entrega y a bai cas bek.

Esei a scapa e reino di dos tribu, y e pueblo a biba na pas pa un tempo. Pero despues di morto di Ezekias, su yiu Manases a bira Rei. Tanto Manases como su yiu homber Amon cu a siguie tabata masha mal Rei. P’esei e tera a yena cu crimen y violencia atrobe. Despues cu Rei Amon su mes crianan a mat’e, su yiu Josias a bira Rei di e reino di dos tribu.