E Ultimo Bon Rei di Israel

JOSIAS tabatin ocho aña di edad so ora el a bira Rei di e dos tribunan di zuid di Israel. E tabata mucho hoben pa ta Rei. P’esei, na principio hende di mas edad tabatin cu yud’e goberna e nacion.

Despues cu Josias tabata Rei pa shete aña, el a cuminsa busca Jehova. El a sigui ehempel di bon reinan tal como David, Josafat y Ezekias. Anto, siendo un teenager ainda, Josias a haci un cos cu a exigi hopi curashi.

Pa hopi tempo mayoria di e Israelitanan tabata masha mal hende. Nan tabata adora dios falso. Nan tabata buig pa imagen. P’esei Josias a sali cu su hombernan y a cuminsa kita adoracion falso for di e tera. Esei tabata un trabou grandi, pasobra masha hopi hende tabata adora dios falso. Aki bo ta mira Josias y su hombernan kibrando e imagennan.

Despues, Josias a encarga tres homber cu e trabou pa drecha e tempel di Jehova. Placa a wordo colecta for di e pueblo y entrega na e hombernan aki pa nan paga pa e trabou cu mester a haci. Mientras nan tabata traha riba e tempel, sumo sacerdote Hilkias a haya algo masha importante ei. Esei ta e buki di lei original cu Jehova a manda Moises skirbi hopi tempo pasa. E tabata perdi pa hopi aña.

Nan a hiba e buki pa Josias, y el a pidi nan les’e p’e. Segun cu e tabata scucha, Josias a ripara cu e pueblo no tabata warda e lei di Jehova. Esei a pon’e sinti masha tristo y p’esei el a kibra su paña, manera bo ta mira ei. E di: ‘Jehova ta rabia cu nos, pasobra nos tatanan no a warda e lei skirbi den e buki aki.’

Josias a manda sumo sacerdote Hilkias informa kico Jehova lo bai haci cu nan. Hilkias a bai cerca e profetisa Hulda y a puntr’e. El a dun’e e mensahe aki di Jehova pa hiba pa Josias: ‘Jerusalem y tur e pueblo ta bai haya castigo pasobra nan ta adora dios falso y ta yena e tera cu maldad. Pero dor cu abo, Josias, a haci loke ta bon, e castigo lo yega te despues di bo morto.’