Cuater Hoben na Babilonia

REI Nabucodonosor a hiba tur e Israelitanan mihor educa Babilonia. Despues e Rei a scohe e hobennan mas nechi y mas sabi. Cuater di nan ta e mucha hombernan cu bo ta mira ei. Un di nan ta Daniel, y e otro tresnan e Babilonionan a yama Sadrak, Mesak y Abed-nego.

Nabucodonosor kier educa e hobennan pa traha den su palacio. Despues di tres aña di educacion, e lo scohe solamente esnan mas sabi pa yud’e soluciona problema. E Rei kier pa e hobennan ta fuerte y bon di salud durante nan educacion. P’esei el a duna ordo pa su crianan duna tur e hobennan e mesun cuminda rico y biña cu e y su famia ta haya.

Mira e hoben Daniel. Bo sa kico e ta bisa Aspenaz, e cria principal di Nabucodonosor? Daniel ta bis’e cu e no kier come e cuminda rico di mesa di e Rei. Pero Aspenaz a keda precupa. El a bisa: ‘E Rei a dicidi kico boso mester come y bebe. Y si boso no parce mes saludabel cu e otro hobennan, e por mata mi.’

P’esei Daniel a bai cerca e bewaker cu Aspenaz a pone pa tira bista riba Daniel y su tres amigonan. Daniel a bis’e: ‘Por fabor, pone nos na prueba pa 10 dia. Duna nos berdura pa come y awa pa bebe. Anto compara nos cu e otro hobennan cu ta come cuminda di e Rei, y mira ken ta parce mihor.’

E bewaker a cumbini pa haci esei. Y despues di 10 dia, e aparencia di Daniel y su tres amigonan tabata mas saludabel cu di tur e otro hobennan. P’esei e wardado a laga nan sigui come berdura en bes di cuminda di e Rei.

Despues di tres aña tur e hobennan a wordo hiba dilanti di Nabucodonosor. Despues di a papia cu nan tur, e Rei a haya cu Daniel y su tres amigonan ta esnan di mas sabi. P’esei el a tene nan pa nan yud’e den e palacio. Y ki ora cu e Rei a haci Daniel, Sadrak, Mesak y Abed-nego un pregunta of duna nan un problema dificil, nan tabata sa 10 bes mas tanto cu cualkier sacerdote of sabio.