Jerusalem A Ser Destrui

TA MAS cu 10 aña desde cu Rei Nabucodonosor a hiba e Israelitanan mihor educa Babilonia. Y awor mira loke ta sosode! Jerusalem ta ser kima. Y e Israelitanan cu no a ser mata ta ser hiba preso na Babilonia.

No lubida cu e profetanan di Jehova a duna spiertamento cu esei lo sosode si e hendenan no cambia nan mal caminda. Pero e Israelitanan no a scucha e profetanan. Nan a sigui adora dios falso en bes di Jehova. Pues, nan a merece e castigo. Nos sa esei pasobra Dios su profeta Ezekiel a bisa nos e mal cosnan cu e Israelitanan tabata haci.

Bo sa ken ta Ezekiel? E ta un di e hobennan cu Rei Nabucodonosor a hiba Babilonia 10 aña prome cu e destruccion grandi di Jerusalem. Daniel y su tres amigonan, Sadrak, Mesak y Abed-nego tambe a wordo hiba Babilonia na e mesun tempo.

Mientras cu Ezekiel tabata na Babilonia ainda, Jehova a mustr’e e mal cosnan cu tabata sosode na Jerusalem den e tempel. Jehova a haci esei via un milager. Maske Ezekiel tabata na Babilonia, Jehova a lag’e mira tur loke tabata sosode den e tempel. Y loke Ezekiel a mira tabata escandaloso!

‘Mira e cosnan repugnante cu e hendenan ta haci den e tempel’, Jehova a bisa Ezekiel. ‘Mira e murayanan pinta tur na colebra y otro bestia. Y mira e Israelitanan adora nan!’ Ezekiel a mira tur esei, y a skirbi loke tabata sosode.

Jehova a puntra Ezekiel: ‘Bo ta mira loke e lidernan di e Israelitanan ta haci den secreto?’ Si, el a mira esei tambe. Tabatin 70 homber, y nan tur tabata adora dios falso. Nan a bisa: ‘Jehova no ta mira nos. El a bandona e tera.’

Anto Jehova a mustra Ezekiel algun hende muher na e porta noord di e tempel. Nan tabata sinta ei adorando e dios falso Tamuz. Y wak e hombernan na entrada di e tempel di Jehova! Tin rond di 25 di nan. Ezekiel a mira nan. Nan tabata buig cu cara pariba y adora solo!

Jehova a bisa: ‘E hendenan ei no ta respeta mi. Nan no ta solamente haci cosnan malo, sino cu nan ta bini te den mi tempel bin haci nan.’ P’esei Jehova a priminti: ‘Nan lo sinti e forsa di mi rabia. Y lo mi no sinti duele di nan ora nan wordo destrui.’

Rond di tres aña so despues cu Jehova a mustra Ezekiel e cosnan ei e Israelitanan a rebela contra Rei Nabucodonosor. P’esei el a bai pa bringa contra nan. Despues di un aña y mei, e Babilonionan a kibra e muraya di Jerusalem y a kima e stad te na suela. Mayoria di e pueblo a ser mata of hiba preso na Babilonia.

Pakico Jehova a laga e destruccion teribel aki bini riba e Israelitanan? Ta pasobra nan no a scucha Jehova ni no a obedece su lei. Esei ta mustra nos cu ta importante pa nos semper haci loke Dios ta bisa.

Na principio nan a laga algun hende keda den e tera di Israel. Rei Nabucodonosor a pone un Hudiu yama Gedalias na encargo di e pueblo. Pero algun Israelita a mata Gedalias. Awor e pueblo tabatin miedo cu e Babilonionan lo bin destrui nan tur debi na e mal cos cu a sosode. P’esei nan a obliga Jeremias bai cu nan, y nan a hui bai Egipto.

Esei a laga e tera di Israel sin ningun hende. Pa 70 aña ningun hende no a biba den e tera. El a keda completamente bashi. Pero Jehova a priminti cu e lo trece su pueblo bek na e tera despues di 70 aña. Mientrastanto, kico a sosode cu e pueblo di Dios na e tera di Babilonia caminda nan a ser hiba? Laga nos mira.