Nan No A Buig

BO TA corda cu nos a lesa di e tres hobennan aki? Si, nan ta e amigonan di Daniel cu a nenga di come loke no tabata bon pa nan. E Babilonionan a yama nan Sadrak, Mesak y Abed-nego. Pero mira nan awor. Pakico nan no a buig pa e imagen grandi mescos cu tur otro hende? Ban mira.

Bo ta corda e lei cu Jehova mes a skirbi yama Dies Mandamento? E prome mandamento ta: ‘Bo no mag adora ningun otro dios sino ami so.’ E tres hobennan a obedece e lei ei, aunke no tabata facil.

Nabucodonosor, Rei di Babilonia, a yama hopi hende importante pa nan honra e imagen cu el a traha. El a caba di bisa tur hende: ‘Ora boso tende zonido di cacho, harpa y otro instrumento musical, boso tin cu buig y adora e imagen di oro. Ken cu no buig y adora lo ser tira den un forno di candela cayente-cayente mesora.’

Ora Nabucodonosor a tende cu Sadrak, Mesak y Abed-nego no a buig, el a rabia masha. El a manda pa trece nan cerca dje. El a duna nan un oportunidad mas pa buig. Pero e hobennan a confia den Jehova. Nan a bisa Nabucodonosor: ‘Nos Dios kende nos ta sirbi por salba nos. Pero maske e no salba nos, nos lo no buig pa bo imagen di oro.’

Ora Nabucodonosor a tende esei, el a rabia asta mas. Tabatin un forno eicerca y el a manda: ‘Keinta e forno shete bes mas cayente cu prome!’ Anto el a laga e hombernan di mas fuerte di su ehersito mara Sadrak, Mesak y Abed-nego y tira nan den e forno. E forno tabata asina cayente cu e vlamnan a mata e hombernan fuerte. Pero, kico di e tres hobennan cu nan a tira eiden?

E Rei a wak den e forno, y a haya masha miedo. El a puntra: ‘No ta tres homber nos a mara y tira den e forno di candela cayente-cayente?’

Su crianan a contesta: ‘Sigur cu si.’

E di: ‘Pero mi ta mira cuater homber canando rond den e candela, y nan no ta mara ni e candela no ta haci nan nada. Y esun di cuater ta parce un dios.’ E Rei a hala mas cerca di e porta di forno y a grita: ‘Sadrak! Mesak! Abed-nego! Sali pafo, sirbidornan di e Dios Haltisimo!’

Ora nan a sali, tur hende por a mira cu nan no a sufri daño. Anto e Rei a bisa: ‘Alaba sea e Dios di Sadrak, Mesak y Abed-nego! El a manda su angel y a salba nan pasobra nan no kier a buig y adora ningun dios fuera di nan mes Dios.’

Esei no ta un bon ehempel di fieldad na Jehova pa nos sigui?