Dios Su Pueblo A Sali for di Babilonia

CASI dos aña a pasa desde cu Medo- y Personan a domina Babilonia. Y mira loke ta sosode awor! Si, e Israelitanan ta saliendo for di Babilonia. Con nan a haya nan libertad? Ken a laga nan bai?

Ciro, Rei di Persia, a haci esei. Hopi tempo prome cu Ciro a nace, Jehova a laga profeta Isaias skirbi tocante dje: ‘Lo bo haci net loke ami kier. E portanan di e stad lo keda habri pa bo por captura e stad.’ Anto Ciro en berdad a dirigi e derota di Babilonia. E Medo- y Personan a drenta e stad den anochi dor di porta cu hende a laga habri.

Pero Isaias, e profeta di Jehova, a bisa tambe cu Ciro lo duna ordo pa Jerusalem y su tempel ser reedifica. Ciro a duna e ordo ei? Si. Esaki ta loke Ciro a bisa e Israelitanan: ‘Awor, bai Jerusalem y traha e tempel di Jehova boso Dios.’ Y e Israelitanan ei ta riba caminda pa bai haci net esei.

Pero no ta tur e Israelitanan na Babilonia por a haci e biahe largo pa bai Jerusalem bek. E caminda ta masha largo, rond di 800 kilometer, y hopi di nan tabata mucho bieu of enfermo pa haci un biahe largo. Y tabatin mas motibo pakico algun hende no por a bai. Pero Ciro a bisa esnan cu no por bai: ‘Duna plata y oro y otro regalo na e hendenan cu ta bai bek pa traha Jerusalem y su tempel.’

P’esei, nan a duna e Israelitanan cu tabata bai bek Jerusalem hopi regalo. Tambe Ciro a duna nan e comchinan y copanan cu Rei Nabucodonosor a cohe for di e tempel di Jehova ora el a destrui Jerusalem. E Israelitanan tabatin hopi cos pa hiba bek.

Despues di rond di cuater luna riba caminda, e Israelitanan a yega Jerusalem net na ora. A cumpli exactamente 70 aña desde cu e stad a wordo destrui y e tera a keda completamente sin hende. Pero aunke e Israelitanan a yega bek den nan pais, nan a pasa den tempo dificultoso, segun cu nos lo mira.