Confiando den Ayudo di Dios

MILES di hende a haci e biahe largo for di Babilonia pa Jerusalem. Pero ora nan a yega, Jerusalem tabata un monton di ruina. Ningun hende tabata biba ei. E Israelitanan tabatin cu traha tur cos di nobo.

Un di e prome cosnan cu nan a traha ta un altar. Esei ta un luga pa ofrece sacrificio di animal, of ofrenda, na Jehova. Poco luna despues e Israelitanan a cuminsa traha e tempel. Pero algun enemigo cu tabata biba eibanda no tabata kier pa e Israelitanan trah’e. P’esei nan a purba spanta nan pa nan stop. Finalmente e enemigonan a combence e rei nobo di Persia pa saca un lei pa para e trabou di construccion.

Añanan a pasa. A pasa 17 aña caba desde cu e Israelitanan a bolbe for di Babilonia. Jehova a manda su profetanan Hageo y Zacarias bisa e pueblo pa cuminsa traha atrobe. E pueblo a confia den e ayudo di Dios, y nan a obedece e profetanan. Nan a cuminsa traha atrobe, aunke e lei a prohibi esei.

P’esei un oficial di Persia yama Tatnai a bin y a puntra e Israelitanan cu ken su permit nan tabata traha e tempel. E Israelitanan a bis’e cu ora nan tabata na Babilonia, Rei Ciro a bisa nan: ‘Awor, bai Jerusalem y traha e tempel di Jehova boso Dios.’

Tatnai a manda un carta Babilonia y a puntra si Ciro, cu entretanto a muri, en berdad a bisa esei. Pronto a bin un carta di e rei nobo di Persia. El a bisa cu Ciro realmente a bisa esei. Y p’esei e rei a skirbi: ‘Laga e Israelitanan traha e tempel di nan Dios. Y mi ta duna boso ordo pa boso yuda nan.’ Den mas o menos cuater aña nan a caba e tempel, y e Israelitanan a keda masha felis.

Hopi aña mas a pasa. Awor ta casi 48 aña desde cu nan a caba e tempel. E hendenan di Jerusalem ta pober, y e stad y e tempel di Dios no ta masha bunita. Leu aya den Babilonia, e Israelita Esdras a tende di e necesidad di drecha e tempel di Dios. P’esei, bo sa kico el a haci?

Esdras a bishita Artaherhes, Rei di Persia, y e bon Rei aki a duna Esdras hopi regalo pa hiba Jerusalem. Esdras a pidi e Israelitanan na Babilonia pa yud’e hiba tur e regalonan Jerusalem. Rond di 6.000 hende a compañ’e. Nan tabatin hopi cos precioso pa nan hiba.

Esdras tabata precupa pasobra tabatin atracado riba caminda. E atracadonan lo por a kita nan plata y oro for di nan y mata nan. P’esei Esdras a reuni e pueblo, manera bo ta mira riba e plachi. Anto nan a pidi Jehova pa proteha nan riba e caminda largo di regreso pa Jerusalem.

Jehova a proteha nan tambe. Despues di cuater luna di biahe, nan a yega bon. Esei no ta mustra cu Jehova por proteha hende cu ta confia den dje?