Mardokeo y Ester

LAGA nos bai bek un par di aña prome cu Esdras a bai Jerusalem. Mardokeo y Ester ta e dos Israelitanan mas importante den e reino di Persia. Ester ta e reina y su primo Mardokeo ta e persona mas poderoso despues di e rei. Laga nos mira con esei a sosode.

E mayornan di Ester a muri tempo cu e tabata hopi chikito, y p’esei Mardokeo a cri’e. Asuero Rei di Persia tin un palacio den e stad Susa, y Mardokeo ta un cria di dje. Wel, un dia Vasti, esposa di e Rei, no a obedec’e, y p’esei e Rei a scohe un esposa nobo pa ser reina. Bo sa ken el a scohe? Si, el a scohe e bunita hoben Ester.

Bo ta mira e homber orguyoso cu e pueblo ta buig p’e? Esei ta Haman. E tabata un homber masha importante na Persia. Haman kier pa Mardokeo cu bo ta mira sinta ei tambe buig p’e. Pero Mardokeo no kier a buig. E no a haya cu ta bon pa buig pa un homber asina malo. Esei a pone Haman rabia masha hopi. Y esaki ta loke el a haci.

Haman a conta e Rei mentira tocante e Israelitanan. Segun Haman: ‘Nan ta mal hende cu no ta obedece lei. Nan mester ta mata.’ Asuero no tabata sa cu su esposa Ester ta Israelita. P’esei, el a scucha Haman y a saca un lei cu a bisa cu mester a mata tur Israelita riba un cierto dia.

Ora Mardokeo a tende di e lei, el a bira hopi precupa. El a manda un mensahe pa Ester: ‘Bo tin cu papia cu e Rei y rog’e pa e salba nos.’ Tabata contra lei na Persia pa bishita e rei sin invitacion. Pero Ester a bishit’e sin invitacion. E Rei a saca su bara di oro p’e, cu kiermen cu Ester lo no ser mata. Ester a invita e Rei y Haman pa un bankete. Na e bankete e Rei a puntra Ester ki fabor e kier. Ester a bis’e cu lo e pidi su fabor si e Rei y Haman bin come cerca dje mañan.

Durante e comemento Ester a bisa e Rei: ‘Nan ta bai mata ami y mi pueblo.’ E Rei a rabia. El a puntra: ‘Ken tin tanto tribilidad?’

‘Haman, nos enemigo, e mal hende ei!’ Ester a bisa.

Awor si e Rei a rabia mas ainda. El a manda pa Haman ser mata. Anto e Rei a haci Mardokeo e persona mas poderoso despues di dje. Mardokeo a percura pa un lei nobo ser saca pa permiti e Israelitanan defende nan bida dia cu lo mester a mata nan. Dor cu Mardokeo a bira un homber asina importante, hopi hende a yuda e Israelitanan, y nan a scapa for di nan enemigonan.