E Muraya di Jerusalem

MIRA tur e trabou cu nan ta haci ei. E Israelitanan ta ocupa lantando e muraya di Jerusalem. Ora Rei Nabucodonosor a destrui Jerusalem 152 aña pasa, el a tumba e muraya y a kima porta di e stad. E Israelitanan no a reedifica e muraya ora nan a bolbe for di Babilonia.

Con bo ta kere cu e pueblo a sinti nan bibando ei tanto aña sin muraya rond di nan stad? Nan no a sinti nan sigur. Nan enemigonan por a ataca nan facilmente. Pero awor e homber ei, Nehemias, porfin ta yuda e pueblo reedifica e muraya. Bo sa ken Nehemias ta?

Nehemias ta un Israelita cu a bin di e stad Susa, unda Mardokeo y Ester ta biba. Nehemias tabata traha den palacio di e Rei, pues kisas e tabata un bon amigo di Mardokeo y Reina Ester. Pero Bijbel no ta bisa cu Nehemias a traha pa Rei Asuero, esposo di Ester. El a traha pa e siguiente Rei, Artaherhes.

Lo bo corda cu Artaherhes tabata e bon Rei cu a duna Esdras tanto placa pa e hiba Jerusalem pa drecha e tempel di Jehova. Pero Esdras no a lanta e muraya kibra di e stad. Laga nos mira con bin Nehemias a haci e trabou aki.

Diestres aña a pasa desde cu Artaherhes a duna Esdras e placa pa drecha e tempel. Awor Nehemias ta e copero principal di Rei Artaherhes. Esei kiermen cu e tabata sirbi biña pa e Rei, y haci sigur pa ningun hende no venena e Rei. Su trabou tabata masha importante.

Wel, un dia Hanani, ruman homber di Nehemias, y otro hende di e tera di Israel a bin pa bishita Nehemias. Nan a cont’e di e problemanan cu e Israelitanan tabatin, y cu e muraya di Jerusalem tabata kibra ainda. Esei a haci Nehemias masha tristo, y el a haci oracion na Jehova tocante dje.

Un dia e Rei a ripara cu Nehemias ta tristo, y el a puntr’e: ‘Pakico bo ta tristo?’ Nehemias a bis’e cu esei ta debi na e mal estado di Jerusalem y cu su muraya ta kibra. E Rei a puntra: ‘Kico bo kier?’

Nehemias a contesta: ‘Laga mi bai Jerusalem pa reedifica e muraya.’ Rei Artaherhes tabata masha bondadoso. El a bisa cu Nehemias por bai, y e Rei a yud’e haya palo pa construi algun cos. Pronto despues cu Nehemias a yega Jerusalem, el a bisa e pueblo di su plan. Nan a gusta e idea, y a bisa: ‘Ban cuminsa traha.’

Ora e enemigonan di e Israelitanan a mira nan ta lanta e muraya, nan a bisa: ‘Ban mata nan y pone fin na e trabou.’ Pero Nehemias a tende esei, y el a duna e trahadonan spada y lansa. Y el a bisa: ‘No tene miedo di nos enemigonan. Bringa pa boso rumannan, boso yiunan, boso esposa y pa boso cas.’

E pueblo tabatin hopi curashi. Nan a keda cu nan arma na man di dia y anochi, y a sigui traha. P’esei den 52 dia so nan a caba e muraya. Awor e pueblo a sinti nan sigur den e stad. Nehemias y Esdras a siña e pueblo e lei di Dios, y e pueblo a keda contento.

Pero ainda cosnan no tabata mescos cu prome cu nan a hiba e Israelitanan preso na Babilonia. E pueblo tabata bou di dominio di e Rei di Persia y nan tabatin cu sirbie. Pero Jehova a priminti cu lo e manda un rei nobo, y cu e rei ei lo trece pas pa e pueblo. Ken e rei ei ta? Con e lo trece pas na Tera? Rond di 450 aña a pasa prome cu nan a siña mas tocante esei. E ora ei un baby sumamente importante a nace. Pero esei ta un otro cuenta.