Hesus A Nace den Stal

BO SA ken e baby aki ta? Si, esei ta Hesus. El a caba di nace den un stal. Un stal ta un luga pa bestia. Maria ta pone Hesus den e pesebre, e baki di cuminda pa burico y otro bestia. Pero pakico Maria cu Jose ta ei hunto cu e bestianan? Esei no ta un bon luga pa un baby nace, no ta berdad?

Berdad. Pero nan tabata ei pa e motibo aki: Cesar Augusto, Emperador di Roma, a saca un lei exigiendo pa tur hende bolbe na e stad di nan nacemento pa skirbi nan nomber den un buki. Wel, Jose a nace aki na Betlehem. Pero ora Jose cu Maria a yega, no tabatin luga pa nan ni un caminda. P’esei nan tabatin cu keda hunto cu e bestianan. Y ta net e dia ei Maria a duna lus na Hesus! Pero, manera bo por mira, Hesus a keda bon.

Bo ta mira e wardadonan di carne ta bini pa mira Hesus? Nan a pasa anochi den veld cuidando nan carnenan, y un lus fuerte a lusa tur rond di nan. Esei tabata un angel! E wardadonan a bira hopi spanta. Pero e angel a bisa: ‘No tene miedo! Mi tin bon nobo pa boso. Awe, na Betlehem, Cristo e Señor a nace. Lo e salba e pueblo! Boso por hay’e lora den paña y drumi den un pesebre.’ Diripiente hopi angel a yega y a cuminsa alaba Dios. P’esei e wardadonan a core di biaha pa busca Hesus, y awor nan a hay’e.

Bo sa pakico Hesus ta asina special? Bo sa ken e ta realmente? Corda cu den e prome relato di e buki aki nos a siña di e prome Yiu di Dios. E Yiu aki a traha cu Jehova den creacion di shelo y Tera y tur otro cos. Wel, e Yiu ei ta Hesus!

Si, Jehova a tuma e bida di su Yiu den shelo y a pon’e den Maria. Mesora un baby a cuminsa crece den su bariga mescos cu otro baby ta crece den bariga di nan mama. Pero e baby ei tabata Yiu di Dios. Finalmente Hesus a nace ei den e stal na Betlehem. Bo ta compronde awor pakico e angelnan a keda asina contento cu nan por a bisa hende cu Hesus a nace?