Un Angel A Bishita Maria

E BUNITA mucha muher aki yama Maria. E ta un Israelita y ta biba den e pueblo di Nazaret. Dios sa cu e ta masha bon hende. P’esei el a manda su angel Gabriel pa papia cu ne. Bo sa kico Gabriel a bini pa bisa Maria? Ban mira.

Gabriel a bisa Maria: ‘Bon dia, abo cu ta altamente faboreci. Jehova ta cu bo.’ Maria no tabata conoce Gabriel. El a keda precupa pasobra e no a compronde ta kico e angel kiermen. Pero Gabriel a trankilisa Maria di biaha.

E di: ‘No tene miedo, Maria, Jehova ta masha contento cu bo. P’esei e ta bai haci un cos maraviyoso pa bo. Pronto lo bo haya un yiu. Y bo tin cu yam’e Hesus.’

Gabriel a sigui splica: ‘E yiu aki lo ta grandi y lo ta yama Yiu di e Dios Haltisimo. Jehova lo hacie rei, mescos cu David. Pero Hesus lo ta rei pa semper, y su reino lo no caba nunca!’

Maria a puntra: ‘Con tur esei por ta posibel? Mi no ta casa y nunca mi no a biba cu un homber, pues con mi por haya un yiu?’

Gabriel a contesta: ‘E poder di Dios lo baha riba bo. P’esei e yiu lo ser yama Yiu di Dios.’ Anto el a bisa Maria: ‘Corda bo pariente Elisabet. Hende a bisa cu e ta mucho bieu pa haya yiu. Pero pronto lo e haya un yiu homber. Asina lo bo mira cu no tin nada cu Dios no por haci.’

Maria a contesta mesora: ‘Mi ta esclabo di Jehova. Laga sosode cu mi net manera bo a bisa.’ Anto e angel a bai.

Maria a bai lihe pa bishita Elisabet. Ora Elisabet a tende e bos di Maria, e yiu den Elisabet su bariga a salta di goso. Elisabet a yena cu spirito di Dios y el a bisa Maria: ‘Bo ta specialmente bendiciona entre hende muher.’ Maria a keda cerca Elisabet rond di tres luna, y despues el a bai bek su cas na Nazaret.

Maria tabata cla pa casa cu un homber yama Jose. Pero ora Jose a tende cu Maria lo haya yiu, e no kier a casa cu ne. Anto e angel di Dios a bis’e: ‘No tene miedo di tuma Maria como bo esposa. Pasobra Dios ta esun cu a dun’e un yiu homber.’ P’esei Jose y Maria a casa, y nan a spera nacemento di Hesus.