Hesus den e Hofi

DESPUES di baha for di e sala djariba, Hesus y su apostelnan a bai na e hofi di Getsemane. Nan a yega di bai ei hopi biaha. Awor Hesus a bisa nan pa keda lanta y haci oracion. Anto el a aleha un poco y a cai cu su cara te na suela pa haci oracion.

Despues Hesus a bin bek caminda su apostelnan a keda. Bo sa kico nan tabata haci? Drumi! Hesus a bisa nan tres bes pa keda lanta, pero cada bes cu el a bolbe el a haya nan drumi. E ultimo bes cu Hesus a bin bek el a puntra nan: ‘Con boso por drumi na un ocasion manera esaki? E ora a yega pa mi ser entrega na mi enemigonan.’

Net na e momento ei nan a tende zonido di un multitud grandi. Mira! Hende ta bini cu spada y klop! Y nan tin flambeu pa lusa e caminda. Ora nan a yega mas cerca, un homber a sali for di e multitud y a cana stret bai cerca Hesus. El a dun’e un sunchi, manera bo ta mira ei. E homber ta Judas Iscariot! Pakico el a sunchi Hesus?

Hesus a puntr’e: ‘Judas, bo ta traiciona mi cu un sunchi?’ Si, e sunchi ta un señal. Esei lo a laga e hombernan hunto cu Judas sa cu esei ta Hesus, e homber cu nan ta busca. P’esei e enemigonan di Hesus a bini y a gar’e. Pero Pedro no a laga nan cohe Hesus sin pelea. El a saca e spada cu el a bin cu ne y a zuai e den direccion di e homber banda di dje. E spada a hera cabes di e homber pero a kita su horea afo. Pero Hesus a mishi cu e homber su horea y a cur’e.

Hesus ta bisa Pedro: ‘Warda bo spada. Bo no ta kere cu mi por pidi mi Tata pa e manda miles di angel pa salba mi?’ Si, Hesus por! Pero Hesus no ta pidi su Tata manda ningun angel, pasobra e sa cu e tempo a yega pa su enemigonan coh’e. P’esei e ta laga nan bai cu ne. Laga nos mira kico ta bai sosode cu Hesus awor.