Hesus Ta Bibo

BO SA ken e señora y e dos hombernan ta? E señora ta Maria Magdalena, un amiga di Hesus. Y e dos hombernan na blanco bisti ta angel. Maria ta para den porta di e graf caminda nan a pone e curpa di Hesus despues di su morto. Pero su curpa no t’ei! Ken a bai cu ne? Laga nos mira.

Despues di Hesus su morto, e sacerdotenan a bisa Pilato: ‘Ora Hesus tabata na bida el a bisa cu lo e lanta despues di tres dia. P’esei, duna ordo pa tene warda na e graf. E ora ei su discipelnan no por bai cu su curpa y bisa cu el a lanta for di morto!’ Pilato a bisa e sacerdotenan pa manda solda pa tene warda na e graf.

Pero mainta tempran riba e di tres dia despues di Hesus su morto, un angel di Jehova a presenta diripiente. El a hala e piedra dilanti di e graf un banda. E soldanan a spanta asina tanto cu nan no por a ni move. Finalmente nan a wak den e graf y e curpa no tabat’ei! Algun di e soldanan a drenta e stad y a bisa e sacerdotenan. Bo sa kico e sacerdotenan malbado a haci? Nan a paga e soldanan pa nan gaña. E sacerdotenan a bisa e soldanan: ‘Bisa cu e discipelnan di Hesus a bin den anochi, mientras cu e soldanan tabata drumi, y a bai cu e curpa di Hesus.’

Mientrastanto, algun amiga di Hesus a bini na e graf. Nan a keda masha sorprendi ora nan a hay’e bashi! Diripiente dos angel den bisti briyante a aparece. Nan a puntra: ‘Pakico boso ta busca Hesus aki? El a ser resusita. Bai lihe y bisa su discipelnan.’ Esta duro nan a core! Pero riba caminda un homber a para nan. Bo sa ken esei tabata? Hesus mes! El a bisa: ‘Bai bisa mi discipelnan.’

Ora e hende muhernan a bisa e discipelnan cu Hesus ta bibo y cu nan a mir’e, e discipelnan a haya esei dificil pa kere. Pedro y Juan a core bai na e graf pa nan mes wak, pero e graf tabata bashi! Despues cu Pedro y Juan a bai, Maria Magdalena a keda atras. E ora ei el a wak den e graf y a mira e dos angelnan.

Bo sa kico a sosode cu e curpa di Hesus? Dios a hacie disparce. Dios no a resusita Hesus den e mesun curpa carnal cu e tabatin ora el a muri. El a duna Hesus un curpa spiritual nobo, mescos cu angelnan den shelo tin. Pero, pa e mustra su discipelnan cu e ta bibo, Hesus por a aparece den un curpa cu hende por mira, segun cu nos lo bai siña despues.