Den un Sala Sera

DESPUES cu Pedro y Juan a bandona e graf caminda e curpa di Hesus tabata, Maria a keda ei su so. El a cuminsa yora. Anto el a sak y a wak den e graf, manera nos a mira riba e plachi prome. El a mira dos angel eiden! Nan a puntr’e: ‘Pakico bo ta yora?’

Maria a bisa: ‘Nan a hiba mi Señor y mi no sa unda nan a pon’e.’ Despues Maria a drei y a mira un homber. E homber a puntra Maria: ‘Ken bo ta busca?’

Maria a pensa cu e homber tabata e hardinero y cu ta e por a bai cu e curpa di Hesus. P’esei el a bisa: ‘Si bo a bai cu ne, bisa mi unda bo a pon’e.’ Pero e homber tabata Hesus mes. El a bisti un curpa cu Maria no a reconoce. Pero ora Hesus a yama Maria na su nomber, Maria a haya sa cu ta Hesus. El a core bai bisa e discipelnan: ‘Mi a mira Señor!’

Mas lat durante dia, ora dos discipel tabata cana pa bai na e pueblo Emaus, un homber a join nan. E discipelnan tabata masha tristo debi na e morto di Hesus. Pero riba caminda e homber a splica nan hopi cos di Bijbel cu a pone nan sinti mihor. Finalmente, ora nan a sinta pa come, e discipelnan a haya sa cu e homber ta Hesus. Anto Hesus a disparce y e dos discipelnan a bai bek lihe te na Jerusalem pa bisa e apostelnan di dje.

Durante tur esei, Hesus a aparece na Pedro tambe. E otronan a keda emociona ora nan a tende esei. Anto e dos discipelnan a yega Jerusalem y haya e apostelnan. Nan a bisa e apostelnan con Hesus a aparece na nan tambe riba caminda. Y net durante e combersacion, bo sa ki cos asombroso a sosode?

Wak e plachi. Hesus a aparece ei mes den e sala, aunke e porta tabata sera. Ki felis e discipelnan a keda! Ki un ocasion emocionante! Bo sa cuanto biaha caba Hesus a aparece na su siguidonan? Bo a conta cinco bes?

Apostel Tomas no tabata cu nan ora Hesus a aparece. P’esei e discipelnan a bis’e: ‘Nos a mira Señor!’ Pero Tomas a bisa cu e mes tin cu mira Hesus pa e kere. Wel, despues di ocho dia e discipelnan tabata hunto atrobe den un sala sera y e biaha aki Tomas tambe tabata hunto cu nan. Diripiente Hesus a aparece den e sala. Awor si Tomas a kere.