CAPITULO CUATER
Esun Cu Tur Profeta A Duna Testimonio di Dje
1. Kico e echonan tocante Hesus su existencia prehumano ta revela di su relacion cu Yehova?
“E Tata ta stima e Yiu y ta mustr’e tur cos cu e mes ta haci.” (Huan 5:20) Ki un relacion cariñoso e Yiu tin cu su Tata Yehova! E relacion pega ei a cuminsa for di tempo cu el a ser crea, un cantidad incontabel di aña prome cu el a nace como hende. E tawata Dios su Yiu unigenito, es decir, e unico crea directamente door di Yehova mes. Tur otro cos den shelo y riba tera a ser crea mediante e prome Yiu masha stima ei. (Colosencenan 1:15, 16) Tambe el a sirbi como e Palabra di Dios, esta Dios su Bosero, Esun via ken Dios tawata comunica su boluntad na otro hende. E Yiu aki pa ken Dios tawatin un cariño special, a bira e homber Hesucristo.—Proverbionan 8:22-30; Huan 1:14, 18; 12:49, 50.
2. Te con leu profecianan di Bijbel a referi na Hesus?
2 Prome cu Dios su Yiu primogenito a ser concibi milagrosamente como hende, e profetanan a skirbi hopi profecia inspira tocante dje. Apostel Pedro a bisa Cornelio: “Di dje tur e profetanan ta duna testimonio.” (Echonan 10:43) Bijbel a presenta asina hopi informacion tocante e papel di Hesus, cu un angel a bisa apostel Huan: “E testimonio di Hesus ta e spirito di profecia.” (Revelacion 19:10) E profecianan aki a mustra bon cla cu e ta e Mesias. Nan a dirigi atencion na e varios papelnan cu lo el a hunga den realisacion di e propositonan di Dios. Tur esaki mester ta di sumo interes pa nos awe.
Loke Profecia A Revela
3. (a) Den e profecia na Genesis 3:15, ken e colebra, “e mohe”, y e ‘simiña di e colebra’ a representa? (b) Dicon sirbidonan di Yehova lo ta masha interesa den e echo cu ‘e colebra ta ser herida den cabes’?
3 E prome profecia a keda expresa despues di e rebelion den Eden. Yehova a bisa e colebra: “Lo mi pone enemistad entre abo y e mohe, y entre bo simiña y su simiña; e lo herida bo cabes, y abo lo herida su hilchi di pia.” (Genesis 3:15) Eigenlijk, e profecia ei a ser dirigi na Satanas, esun cu e colebra a representa. “E mohe” ta Yehova su propio organisacion leal den shelo, cu ta manera un esposa fiel na Dje. E ‘simiña di e colebra’ ta inclui tur angel y hende cu ta desplega e actitud di Satanas, esnan cu ta opone Yehova y Su pueblo. ‘Herida e colebra den cabes’ ta nifica cu e rebelde Satanas, kende a calumnia Yehova y trece gran sufrimento pa humanidad, cu tempo lo ser destrui. Pero ken ta e parti principal di e “simiña” cu lo a herida e cabes di e colebra? Pa siglonan, esei a keda un misterio, un “secreto sagrado.”—Romanonan 16:20, 25, 26, NW.
4. Con Hesus su antecedencia ta yuda demostra cu e ta e Simiña priminti?
4 Despues di un 2.000 aña di historia humano, Yehova a duna mas detaye. El a revela cu e Simiña lo a bini di e liña di desendiente di Abraham. (Genesis 22:15-18) Sinembargo, e factor cu lo a determina ken lo tawata e siguiente den e liña di desendiente cu lo a hiba na e Simiña no a depende di desendencia carnal, sino di ken Dios a scohe. Apesar cu Abraham tawata stima su yiu Ismael, cu el a haya cu Hagar, Yehova a bisa: “Mi aliansa lo mi establece cu Isaac, kende Sara lo haya pa bo.” (Genesis 17:18-21) Despues Dios a confirma e aliansa, of pacto ei, no cu Esau e prome yiu di Isaac, sino cu Yacob, for di ken e 12 tribunan di Israel a sali. (Genesis 28:10-14) Cu tempo, Dios a indica cu e Simiña lo nace di e tribu di Huda, di e liña di desendiente di David.—Genesis 49:10; 1 Cronicanan 17:3, 4, 11-14.
5. Ora Hesus a cuminsa su ministerio riba tera, kico a indica bon cla cu e tawata e Mesias?
5 Ki otro indicacion Bijbel a duna di e identidad di e Simiña? Mas cu 700 aña di antemano, Bijbel a menciona Betlehem como e luga caminda e Simiña priminti lo nace como hende. Tambe el a revela cu e Simiña ya tawata existi caba “for di e dianan di eternidad”, for di tempo cu el a ser crea den shelo. (Mikeas 5:2) Tambe Bijbel a profetisa, via profeta Daniel, e tempo exacto cu lo el a presenta riba tera como Mesias. (Daniel 9:24-26) Y ora Hesus a ser ungi cu spirito santo, birando de echo Yehova su Mesias, Dios su propio stem for di shelo a bisa bon cla cu esaki ta Su Yiu. (Mateo 3:16, 17) E Simiña a ser revela! Pesei Felipe por a bisa cu conviccion: “Nos a haya esun di kende Moises a skirbi den e Lei y di kende e Profetanan tambe a skirbi—Hesus.”—Huan 1:45.
6. (a) Segun Lucas 24:27, kico Hesus su siguidonan a bin realisa? (b) Ken ta e parti principal di e ‘simiña di e mohe’, y kico ta nifica cu lo e herida e cabes di e colebra?
6 Mas despues, Hesus su siguidonan a bin realisa cu den e Scritura inspira tawatin un cantidad di profecia cu ta referi na dje. (Lucas 24:27) A bira asta mas cla cu Hesus tawata e parti principal di e ‘simiña di e mohe’, esun cu lo a herida cabes di e colebra, destruyendo Satanas. Mediante Hesus, tur Dios su promesanan na humanidad, tur e cosnan cu nos ta anhela intensamente, lo cumpli.—2 Corintionan 1:20.
7. Fuera di comprende ta ken ta Esun cu e profecianan ta referi na dje, kico mas ta bon pa realisa?
7 Ki efecto e conocemento aki mester tin riba nos? Bijbel ta conta di un eunuco di Etiopia cu tawata lesa algun di e profecianan aki tocante e benidero Rescatador y Mesias. Confundi, el a puntra e evangelisado Felipe: “Di ken e profeta ta bisa esaki?” Pero ora e eunuco a haya e contesta, e no a laga e asunto te ei. Despues di a scucha cu sumo atencion na e splicacion cu Felipe a duna, e homber a realisa cu si di berdad el a comprende e profecia aki cu a cumpli y a keda gradicido pa esei, lo e mester a demostra esaki cu accion di su parti. El a comprende cu e mester batisa. (Echonan 8:32-38; Isaias 53:3-9) Nos ta reacciona mescos?
8. (a) E echo cu Abraham a purba ofrece Isaac a prefigura kico? (b) Dicon Yehova a bisa Abraham cu tur nacion lo bendiciona nan mes mediante e Simiña, y con esaki ta aplica na nos awe?
8 Considera tambe e relato conmovedor di Abraham su intento pa ofrece Isaac, e unico yiu cu e tawatin cu Sara. (Genesis 22:1-18) Esei a prefigura loke Yehova lo a haci, esta, ofrece su Yiu unigenito: “Dios a stima mundo asina tanto, cu El a duna su Yiu unigenito, pa ken cu kere den dje no bai perdi, ma tin bida eterno.” (Huan 3:16) Esaki ta duna nos e confiansa cu mescos cu Yehova a duna su Yiu unigenito pa cumpli cu Su proposito, asina tambe lo E “duna nos tur tur cos.” (Romanonan 8:32) Kico esei ta exigi di nos parti? Manera ta para skirbi na Genesis 22:18, Yehova a bisa Abraham cu tur nacion lo bendiciona nan mes mediante e Simiña, “pasobra [Abraham] a obedece [Dios su] bos.” Nos tambe tin cu scucha y obedece Yehova y su Yiu: “Esun cu kere den e Yiu tin bida eterno; ma esun cu no obedece e Yiu lo no mira bida, ma e furia di Dios ta keda riba dje.”—Huan 3:36.
9. Kico nos lo haci si nos ta gradicido pa e speransa di bida eterno cu Hesus su sacrificio a haci posibel?
9 Si nos ta gradicido pa e speransa di bida eterno cu a bira posibel door di Hesus su sacrificio, nos lo kier haci e cosnan cu Yehova ta bisa nos mediante Hesus. E mandamentonan aki tin di aber cu nos amor pa Dios y pa nos prohimo. (Mateo 22:37-39) Hesus a mustra cu nos amor pa Yehova mester motiva nos pa siña otro hende “cumpli cu tur loke [Hesus] a ordena [nos].” (Mateo 28:19, 20) Y nos kier comparti e amor ei cu e otro sirbidonan di Yehova door di ‘asisti regularmente na nos reunionnan’ hunto cu nan. (Hebreonan 10:25; Galationan 6:10) Ademas, ora di scucha Dios y su Yiu, nos no mester pensa cu nan ta exigi perfeccion for di nos. Hebreonan 4:15 ta bisa cu Hesus, como nos Sumo Sacerdote, por “compadece di nos debilidadnan.” Esta un consuelo esei ta! Specialmente ora nos ta acudi na Dios den oracion pa medio di Cristo pa haya yudansa pa vence nos debilidadnan.—Mateo 6:12.
Demostra Fe den Cristo
10. Dicon no tin salbacion sin Hesucristo?
10 Despues di a splica e corte supremo Hudiu na Herusalem cu profecia biblico a cumpli den Hesus, apostel Pedro a conclui combencentemente: “No tin salbacion den ningun otro; pasobra no tin bou di shelo ningun otro nomber cu a wordo duna na hende, pa medio di cual nos mester wordo salba.” (Echonan 4:12) Siendo cu tur desendiente di Adam ta pecador, nan morto no tin ningun balor cu por sirbi pa rescata ningun persona. Pero Hesus tawata perfecto, y su bida tawatin balor como sacrificio. (Salmo 49:6-9; Hebreonan 2:9) El a ofrece Dios un prijs di rescate cu a coresponde exactamente cu e balor di e bida perfecto cu Adam a perde. (1 Timoteo 2:5, 6, NW) Esaki a habri caminda pa nos por obtene bida eterno den Dios su mundo nobo.
11. Splica con e sacrificio di Hesus por ta di gran beneficio pa nos.
11 Tambe e rescate a habri caminda pa nos ricibi otro beneficionan, asta for di awor. Por ehempel, maske nos ta pecador, Hesus su sacrificio ta haci posibel cu nos por tin un consenshi limpi debi na pordon di nos picanan. Esaki ta hopi mas di loke e Israelitanan hamas a logra mediante e sacrificionan di bestia cu e Lei di Moises a exigi. (Echonan 13:38, 39; Hebreonan 9:13, 14; 10:22) Sinembargo, pa nos haya e pordon ei nos tin cu admiti honestamente cu nos tin mester di e sacrificio di Cristo: “Si nos bisa cu nos no tin pica, nos ta gaña nos mes, y e berdad no ta den nos. Si nos confesa nos picanan, e ta fiel y husto pa pordona nos nos picanan y pa limpia nos di tur inhusticia.”—1 Huan 1:8, 9.
12. Dicon bautismo den awa ta un factor importante pa haya un bon consenshi dilanti Dios?
12 Con pecador por expresa fe den Cristo y su sacrificio? Ora hende den prome siglo a bira creyente, nan a demostra esei publicamente. Con? Nan a batisa. Dicon? Pasobra Hesus a manda pa tur su disipelnan batisa. (Mateo 28:19, 20; Echonan 8:12; 18:8) Un persona lo no keda sin haci esei si di berdad su curason ser conmovi door di e regalo amoroso cu Yehova a percura mediante Hesus. Lo e haci cualkier cambio necesario den su bida, dedica su mes na Dios den oracion y simbolisa su dedicacion mediante bautismo den awa. Ta door di demostra fe den e manera aki e persona ei ta haci un “apelacion na Dios pa un bon consenshi.”—1 Pedro 3:21.
13. Si nos realisa cu nos a comete un pica, kico nos mester haci al respecto, y dicon?
13 Claro cu asta despues di batisa, nos lo keda cu caracteristicanan pecaminoso. Kico e ora ei? Apostel Huan a bisa: “Mi ta skirbi boso e cosnan aki pa boso no haci pica. Y si un hende haci pica, nos tin un abogado cerca e Tata, Hesucristo, e husto; y e mes ta e propisiacion [sacrificio pa pordon, SAB] pa nos picanan.” (1 Huan 2:1, 2) Esaki ta nifica cu maske ki pica nos comete, basta nos resa pidi Dios pordon, tur cos ta drecha? No necesariamente. E clave pa pordon ta berdadero repentimento. Kisas tambe nos tin mester di yudansa for di personanan cu tin mas edad y experencia den e congregacion Cristian. Nos tin cu reconoce con malo loke nos a haci ta, y sinti echt duele ya asina nos lo haci un esfuerso sincero pa no ripitie. (Echonan 3:19; Santiago 5:13-16) Si nos haci esaki, nos por tin sigur cu Hesus lo yuda nos y cu nos lo bolbe haya Yehova su aprobacion.
14. (a) Splica un manera importante cu Hesus su sacrificio ta beneficia nos. (b) Kico nos lo haci si di berdad nos tin fe?
14 Hesus su sacrificio a habri e caminda pa bida eterno den shelo pa un “tou chikito”, e parti secundario di e simiña menciona na Genesis 3:15. (Lucas 12:32; Galationan 3:26-29) Tambe su sacrificio a habri caminda pa miles di miyones di hende haya bida eterno riba e tera transforma den un paradijs. (Salmo 37:29; Revelacion 20:11, 12; 21:3, 4) Bida eterno ta “e don di gracia di Dios . . . den Cristo Hesus, nos Señor.” (Romanonan 6:23; Efesionan 2:8-10) Si nos tin fe den e don of regalo ei y ta gradicido pa e manera cu Dios a hacie posibel, nos lo demostra esaki. Si nos a comprende e manera maravioso cu Yehova a uza Hesus pa cumpli cu Su boluntad y con vital ta pa nos tur sigui e pasonan di Hesus cu sumo cuidou y atencion, nos lo haci e sirbishi Cristian un di e actividadnan mas importante den nos bida. Nos fe lo ta bisto na e conviccion cu cua nos ta conta otro hende tocante e regalo magnifico aki di Dios.—Echonan 20:24.
15. Con fe den Hesucristo ta trece union?
15 Tal fe ta trece union maravioso. Pasobra mediante e fe ei nos ta hala mas cerca di Yehova, di su Yiu y di otro compañeronan den e congregacion Cristian. (1 Huan 3:23, 24) Pesei nos ta contento cu Yehova bondadosamente a duna su Yiu “e nomber cu ta riba tur nomber [cu excepcion di e nomber di Dios], cu pa e nomber di Hesus tur rudia mester dobla, di esnan cu ta den shelo, y riba tera, y bou di tera, y cu tur lenga mester confesa cu Hesucristo ta Señor, pa e gloria di Dios Tata.”—Filipencenan 2:9-11.
Como Repaso
• Dicon ora e Mesias a presenta, su identidad tawata bon cla pa esnan cu di berdad a kere e Palabra di Dios?
• Kico asina nos mester haci pa demostra nos gratitud pa e sacrificio di Hesus?
• Con nos ta beneficiando caba di Hesus su sacrificio? Con esaki ta yuda nos ora nos ta pidi Yehova pordon pa nos picanan?
[Plachi na pagina 36]
Hesus a bisa su siguidonan cu nan mester siña otro hende cumpli cu e mandamentonan di Dios