Capitulo Shete

Loke Nos Ta Siña for di e Echo Cu Dios A Permiti Maldad

1, 2. (a) Si Yehova a mata e rebeldenan mesora den Eden, ki consecuencia esei lo tawatin pa nos? (b) Ki areglonan amoroso Yehova a haci disponibel pa nos?

“E AÑANAN di mi bida tawata poco y trabahoso”, e patriarca Yacob a bisa. (Genesis 47:9) Job tambe a declara cu hende “ta biba poco dia y ta yen di problema.” (Job 14:1) Mescos cu nan, mayoria di nos a pasa door di dificultad, inhusticia y asta tragedia den bida. Pero toch no tawata un inhusticia di Dios su parti cu El a laga nos nace. Nos por laga di tin e mente y curpa perfecto of e Paradijs cu Adam cu Eva tawatin originalmente. Pero kico lo a pasa si Yehova a duna nan e castigo di morto inmediatamente despues cu nan a rebeldia? Aworaki lo no tawatin malesa, tristesa ni morto, pero lo no tawatin e rasa humano tampoco. Nos lo no a nace. Den su misericordia, Dios a permiti Adam cu Eva haya yiu, maske esakinan a hereda imperfeccion. Y mediante Cristo, Yehova a haci areglo pa nos por haya bek loke Adam a perde: bida eterno riba un tera transforma den un paradijs.—Huan 10:10; Romanonan 5:12.

² Ta ki un animacion cu nos por anticipa bida eterno den un mundo cu ambiente di Paradijs, caminda nos lo no tin malesa, tristesa, dolo, ni morto, ni tampoco hende malbado! (Proverbionan 2:21, 22; Revelacion 21:4, 5) Pero for di Bijbel nos ta siña cu aunke nos salbacion personal ta hopi importante pa nos y pa Yehova, tin algo asta mas importante ainda den e asunto aki.

Pa Motibo di Su Gran Nomber

3. Kico ta necesario pa Yehova su proposito pa e tera y humanidad cumpli?

³ Dios su nomber ta envolvi den cumplimento di su proposito relaciona cu e tera y humanidad. E nomber ei, Yehova, ta nifica “E Ta Causa pa Bira.” Su nomber ta representa su reputacion como e Soberano di universo, como Esun Magnifico cu ta establece su propositonan y semper ta cumpli cu nan, y como e Dios di e berdad. Debi na Yehova su posicion como gobernante supremo, e pas y bienestar di tur persona den universo ta depende di e echo cu su nomber—y loke e nomber ta encera—ta ricibi e pleno respet cu e merece. Y tambe ta necesario pa tur persona obedec’e.

4. Kico tawata Yehova su proposito pa e tera?

⁴ Despues cu Yehova a crea Adam cu Eva, El a duna nan un asignacion pa nan cumpli cu ne. El a laga nan comprende bon cla cu su proposito no tawata solamente pa nan domina henter e tera—y asina extende e fronteranan di Paradijs—sino tambe yen’e cu nan desendientenan. (Genesis 1:28) E proposito aki lo a fracasa debi na nan pica? Lo ta un berguensa pa e nomber di Yehova todopoderoso si E no por a cumpli cu su proposito pa e tera y humanidad!

5. (a) Ki tempo e prome pareha humano lo a muri si nan a come di e palo di conocemento di bon y malo? (b) Con Yehova a cumpli cu su palabra na Genesis 2:17 y na mesun tempo a respeta su proposito pa e tera?

⁵ Yehova a spierta Adam cu Eva cu si nan a desobedece y come for di e palo di conocemento di bon y malo, nan lo a muri “e dia” cu nan come di dje. (Genesis 2:17) Y di acuerdo cu su palabra, mesun dia cu nan a peca Yehova a pidi nan pa rindi cuenta y a pronuncia e sentencia di morto. For di Dios su punto di bista, Adam cu Eva a muri e dia ei. Sinembargo, pa cumpli cu su proposito pa e tera, Yehova a permiti nan produci un famia prome cu nan a muri fisicamente. Pero, como cu Dios por considera 1.000 aña como un dia, ora Adam su bida a termina na edad di 930 aña, esei ainda a cai denter di un “dia.” (2 Pedro 3:8; Genesis 5:3-5) Di e manera ei Yehova a cumpli cu su palabra y a ehecuta castigo manera El a bisa cu lo E hacie, y nan morto no a stroba su proposito pa e tera. Pero pa un tempo, El a permiti hende imperfecto—incluso hende malbado—keda riba tera.

6, 7. (a) Segun Exodo 9:15 y 16, pakico Yehova a permiti e malbadonan sigui biba pa un tempo? (b) Den caso di Farao, con Yehova a demostra su poder, y con Su nomber a ser proclama? (c) Ora e sistema malbado djawe yega na su fin, den kico esei lo resulta?

⁶ Loke Yehova a bisa e gobernante di Egipto den tempo di Moises tambe ta indica pakico Dios a permiti e malbadonan sigui na bida. Ora Farao a prohibi e yiunan di Israel di bai for di Egipto, Yehova no a dale mata mesora. Yehova a manda Dies Plaga riba e pais. Plaga cu a demostra Yehova su poder na maneranan asombroso. Ora Yehova a spierta e Farao pa e di shete plaga, El a bis’e cu facilmente lo E por a elimina Farao y su pueblo for di riba tera. “Ma di berdad”, segun Yehova, “pa e motibo aki Mi a permiti bo keda na bida, pa mustra bo mi poder y pa proclama mi nomber den henter mundo.”—Exodo 9:15, 16.

⁷ Y asina a sosode. Ora Yehova a libra e Israelitanan, berdad su nomber a bira ampliamente conoci. (Hosue 2:1, 9-11) Awe, casi 3.500 aña despues, hende no a lubida loke El a haci e tempo ei. E nomber personal di Yehova a ser proclama y tambe e berdad tocante Esun cu ta carga e nomber ei. Esaki a establece Yehova su reputacion como e Dios cu ta cumpli cu su promesa y cu ta tuma accion na fabor di su sirbidonan. (Hosue 23:14) Esei a demostra cu debi cu E ta todopoderoso, nada no por stroba su proposito. (Isaias 14:24, 27) Pesei nos por tin confiansa cu pronto lo E tuma accion na fabor di su sirbidonan fiel door di destrui henter e sistema malbado di Satanas. Tal despliegue di su forsa todopoderoso y e gloria cu esei lo duna Yehova su nomber, nunca mas lo ser lubida. E beneficionan lo ta eterno.—Ezekiel 38:23; Revelacion 19:1, 2.

‘O e Profundidad di e Sabiduria di Dios!’

8. Ki factornan Pablo ta anima nos pa considera?

⁸ Den su carta na e Romanonan, apostel Pablo ta haci e pregunta: “Acaso tin inhusticia cerca Dios?” Enfaticamente e ta contesta: “Di ningun manera!” Caba, e ta enfatisa Dios su misericordia y ta referi na loke Yehova a bisa ta e motibo cu El a permiti Farao biba un poco mas largo. Tambe Pablo ta mustra cu nos ta manera klei den man di un alfarero. Y e ta declara: “Kico anto si Dios, aunke dispuesto pa demostra su furia y pa haci su poder conoci, a soporta cu hopi pasenshi e obhetonan di furia, prepara pa destruccion? Y El a haci asina pa E por haci conoci e rikesa di su gloria riba e obhetonan di misericordia, cuanan El a prepara di antemano pa gloria, kendenan El a yama tambe, esta nos, no for di entre e Hudiunan so, ma tambe for di entre e paganonan.”—Romanonan 9:14-24.

9. (a) Ken ta e “obhetonan di furia, prepara pa destruccion”? (b) Dicon Yehova a demostra gran pasenshi ora El a confronta su opositornan, y con e resultado final lo ta na beneficio di esnan cu stim’e?

⁹ For di tempo di e rebelion den Eden, ken cu a opone Yehova y su leinan tawata “obhetonan di furia, prepara pa destruccion.” For di e tempo ei padilanti Yehova a demostra hopi pasenshi. Malbadonan a haci bofon di su accionnan, a persigui su sirbidonan, y asta a mata su Yiu. Demostrando gran dominio propio, Yehova a permiti suficiente tempo pasa pa tur creacion por mira bon cla kico ta e resultadonan desastroso di rebelion contra Dios y di gobernacion humano independiente di Dios. Na mesun tempo, e morto di Hesus a percura e medio pa libra humanidad obediente y pa “destrui e obranan di Diabel.”—1 Huan 3:8; Hebreonan 2:14, 15.

10. Dicon Yehova a tolera e malbadonan durante e ultimo 1.900 añanan?

¹⁰ Durante e mas cu 1.900 añanan cu a pasa desde Hesus su resureccion, Yehova a sigui tolera e “obhetonan di furia”, y a wanta cu nan destruccion. Dicon? Un motibo ta pasobra E tawata prepara esnan cu lo mester a bira socio di Hesucristo den su Reino celestial. Nan ta 144.000 persona, y nan ta e “obhetonan di misericordia” cu apostel Pablo a papia di dje. Na prome instante, a invita algun Hudiu pa forma e grupo celestial aki. Despues, Dios a invita hende di e otro nacionnan. Yehova no a forsa ningun di e hendenan aki pa sirbie. Mas bien, El a duna algun di esnan cu a demostra aprecio pa su areglonan amoroso e privilegio di bira gobernante hunto cu su Yiu den e Reino celestial. Preparacion di e grupo celestial ei ta casi cla awor.—Lucas 22:29; Revelacion 14:1-4.

11. (a) Cua grupo ta beneficia awor di Yehova su gran pasenshi? (b) Con e mortonan lo beneficia?

¹¹ Pero, kico di habitante pa e tera? Yehova su gran pasenshi a haci posibel tambe cu por a recohe “un multitud grandi” for di tur nacion. Awor nan ta miyones. Yehova a priminti cu e grupo terenal aki lo sobrevivi fin di e sistema actual y nan lo tin e speransa di haya bida eterno den Paradijs riba tera. (Revelacion 7:9, 10; Salmo 37:29; Huan 10:16) Na Dios su debido tempo, gran cantidad di hende morto lo resucita y haya e oportunidad di bira ciudadano terenal di e Reino celestial. E Palabra di Dios ta profetisa na Echonan 24:15: “Lo tin un resureccion di tanto e hustonan como e malbadonan.”—Huan 5:28, 29.

12. (a) Kico nos ta siña tocante Yehova for di e echo cu El a tolera maldad? (b) Kico abo ta pensa di e manera cu Yehova a atende e asuntonan aki?

¹² Acaso tawatin inhusticia den tur esaki? No, pasobra door di wanta cu e destruccion di e malbadonan, esta e “obhetonan di furia”, Dios ta mustra compasion na otro hende, y esei ta na harmonia cu su proposito. Esaki ta mustra con misericordioso y amoroso E ta. Tambe, e tempo cu nos a haya pa observa con Yehova su proposito a desaroya, a siña nos hopi tocante Dje. Nos ta keda impresiona cu e varios aspectonan di su personalidad cu a sali na cla: su husticia, su misericordia, su gran pasenshi y su sabiduria amplio. E manera sabi cu Yehova a atende e cuestion di su derecho di goberna como esun supremo den universo, lo keda pa semper como un testimonio di e echo cu su manera di goberna ta esun miho. Hunto cu apostel Pablo, nos ta bisa: “O profundidad di e rikesanan, tanto di e sabiduria como di e conocemento di Dios! Ki inscudriñabel su huicionan ta y insondeabel su camindanan!”—Romanonan 11:33.

Oportunidad pa Demostra Nos Debocion

13. Ora nos ta sufri personalmente, ki oportunidad esei ta duna nos, y kico lo yuda nos reacciona na un manera sabi?

¹³ Hopi sirbido di Dios ta den situacionnan cu ta causa sufrimento personal. Nan ta sigui sufri pasobra ainda Dios no a destrui e malbadonan ni restaura humanidad manera El a profetisa. Esaki mester amarga nos? Of mas bien nos por mira e situacionnan ei como un oportunidad pa nos duna prueba cu Diabel ta un mentiroso? Nos por haya e forsa pa haci esei si nos keda corda riba e ruego: “Sea sabi, mi yiu, y haci mi curason contento, pa mi por contesta esun cu reprocha mi.” (Proverbionan 27:11) Satanas, esun cu ta reprocha Yehova, a declara cu si hende sufri perdida material of haya malesa fisico, nan lo culpa Dios y asta maldicion’e. (Job 1:9-11; 2:4, 5) Nos ta haci Yehova su curason contento y ta mustra cu Satanas su acusacion no ta cierto den nos caso, ora nos keda fiel apesar di dificultadnan cu nos ta confronta.

14. Si nos depende riba Yehova ora nos ta pasa den prueba, ki beneficionan nos lo por haya?

¹⁴ Si nos depende riba Yehova ora nos ta pasa den prueba, nos por desaroya cualidadnan precioso. Por ehempel, como resultado di e cosnan cu Hesus a sufri, el “a siña obediencia” den un manera cu nunca prome el a conoce. Nos tambe por siña for di nos pruebanan. Nos por siña cultiva gran pasenshi, perseverancia y un comprendemento y aprecio mas profundo pa Yehova su normanan husto.—Hebreonan 5:8, 9; 12:11; Santiago 1:2-4.

15. Con otro hende por beneficia ora nos ta soporta dificultadnan cu pasenshi?

¹⁵ Otro hende lo observa loke nos ta haci. Debi cu nan ta mira kico nos ta pasa aden pa motibo di nos amor pa husticia, algun di nan cu tempo kisas ta bin comprende ken ta e Cristiannan berdadero djawe. Y door di uni cu nos den adoracion, nan por bini na remarke pa ricibi e bendicionnan di bida eterno. (Mateo 25:34-36, 40, 46) Yehova y su Yiu kier pa hende haya e oportunidad ei.

16. Con e manera cu nos ta mira dificultadnan personal ta relaciona cu e asunto di union?

¹⁶ Ta hopi bon ora nos por considera asta situacionnan dificil como un oportunidad pa demostra nos debocion na Yehova y tambe pa yuda cumpli cu su boluntad! E echo cu nos ta haci esei por duna evidencia cu nos di berdad ta bayendo den direccion di union cu Dios y Cristo. Hesus a haci oracion na Yehova y a pidi pa tur Cristian berdadero, bisando: “Mi no ta pidi pa esakinan so [su disipelnan mas cercano], ma tambe pa esnan cu ta kere den mi pa medio di nan palabra, pa nan tur por ta un, mescos cu Abo, o Tata, ta den [union cu] mi y ami den [union cu] Bo, pa nan tambe por ta den [union cu] nos; pa mundo kere cu ta Abo a manda mi.”—Huan 17:20, 21, NW.

17. Ki confiansa nos por tin si nos keda fiel na Yehova?

¹⁷ Si nos keda fiel na Yehova, lo E recompensa nos ricamente. Su Palabra ta bisa: “Sea firme, constante, semper abundando den e trabou di Señor, sabiendo cu boso trabou no ta en vano den Señor.” (1 Corintionan 15:58) Tambe e ta bisa: “Dios no ta inhusto pa lubida boso trabou y e amor cu boso a mustra pa su nomber.” (Hebreonan 6:10) Santiago 5:11 ta bisa: “Mira, nos ta considera como bendiciona esnan cu a persevera. Boso a tende di e perseverancia di Job y a mira e fin cu Señor tawatin na bista, cu Señor ta yen di compasion y ta misericordioso.” Kico tawata e resultado pa Job? “SEÑOR a bendiciona e ultimo dianan di Job mas cu e promenan.” (Job 42:10-16) Si, Yehova “ta recompensa esnan cu ta busc’e.” (Hebreonan 11:6) Y ki un recompensa nos tin nos dilanti: bida eterno den Paradijs riba tera!

18. Cu tempo, kico lo pasa cu tur recuerdo doloroso cu nos lo por tin?

¹⁸ Dios su Reino lo deshaci di tur daño causa na e famia humano durante e miles di añanan cu a pasa. Cualkier sufrimento cu nos ta pasa aden aworaki lo no ta nada na comparacion cu e felicidad di e tempo ei. Ningun mal recuerdo di sufrimento di pasado lo molestia nos. E pensamentonan y actividadnan positivo cu lo yena e bida diario di hende den e mundo nobo, pocopoco lo elimina e recuerdonan doloroso. Yehova ta declara: “Mi ta crea shelonan nobo [un gobierno celestial nobo riba humanidad] y un tera nobo [un sociedad humano husto]; y e cosnan di antes lo no wordo recorda mas ni bin na memoria. Ma sea contento y regociha pa semper den loke mi ta crea.” Si, den Yehova su mundo nobo, e hustonan lo por bisa: “Henter e tera ta na pas y ta keto; nan ta dal gritonan di alegria.”—Isaias 14:7; 65:17, 18.

Como Repaso

• Aunke Yehova a permiti maldad, con El a demostra na un manera apropiado gran respet pa su mes nomber?

• Con e echo cu Dios a tolera “obhetonan di furia” a haci posibel pa su misericordia yega te na nos?

• Kico nos mester haci esfuerso pa mira den situacionnan cu ta causa sufrimento personal?

[Plachi na pagina 67]

Yehova “a bendiciona e ultimo dianan di Job mas cu e promenan”