CAPITULO DIESTRES
Un Multitud Grandi Dilanti di e Trono di Yehova
1. (a) Prome cu sirbidonan di Dios di e tempo precristian of e 144.000 ricibi nan recompensa, kico mester pasa cu nan? (b) Kico lo ta posibel pa “un multitud grandi” cu ta na bida awor den nos tempo?
FOR di Abel te Huan Bautista, fiel sirbidonan di Yehova a pone e boluntad di Dios na prome luga den nan bida. No obstante, nan tur a muri y ta warda riba nan resureccion pa bida riba tera den Dios su mundo nobo. E 144.000, cu lo goberna cu Cristo den Dios su Reino celestial, tambe tin cu muri prome cu nan por ricibi nan recompensa. Sinembargo, Revelacion 7:9 ta mustra cu den e ultimo dianan aki lo tin “un multitud grandi” di hende di tur nacion cu lo no muri. Mas bien, nan tin e speransa di biba pa semper riba tera. Abo ta den e multitud ei?
Identidad di e Multitud Grandi
2. Kico a yuda clarifica ken ta e multitud grandi di Revelacion 7:9?
2 Na aña 1923, sirbidonan di Yehova a comprende cu “e carnenan” di Hesus su comparacion na Mateo 25:31-46 y e “otro carnenan” cu el a papia di dje na Huan 10:16, ta hende cu lo tin e oportunidad di biba pa semper riba tera. Na 1931, nan a comprende cu e personanan describi na Ezekiel 9:1-11 cu ta ricibi un marca riba nan frenta, tambe tawata referi na hende cu tin speransa di biba riba tera. Anto na 1935, nan a haya sa cu e multitud grandi ta forma parti di e grupo cu Hesus a yama e otro carnenan. Awe, e multitud grandi bendiciona ei ta consisti di miyones di hende.
3. Dicon e expresion “para dilanti di e trono” no ta referi na un grupo celestial?
3 No ta den shelo e multitud grandi menciona na Revelacion 7:9 ta. Djis pasobra nan ta “para dilanti di e trono” di Dios no ta nifica cu nan mester ta den shelo. Nan ta simplemente dilanti e bista di Dios. (Salmo 11:4) E echo cu e multitud grandi, “cu ningun hende no por a conta”, no ta un grupo celestial ta keda comproba door di compara su cantidad cu no ta ser spesifica, cu loke tin para skirbi na Revelacion 7:4-8 y Revelacion 14:1-4. Einan Bijbel ta revela cu e cantidad di hende tuma for di tera pa bai shelo ta 144.000.
4. (a) Kico ta “e gran tribulacion” cu e multitud grandi ta sobrevivi? (b) Manera Revelacion 7:11 y 12 ta declara, ken ta observa e multitud grandi y ta adora Dios hunto cu nan?
4 Revelacion 7:14 ta bisa di e multitud grandi: “Esakinan ta esnan cu a sali for di e gran tribulacion.” Nan ta sobrevivi e tempo di mas dificil cu hende a yega di pasa aden. (Mateo 24:21) Ora cu nan ta gradici Dios y Cristo pa nan salbacion, tur fiel criatura den shelo lo bisa hunto cu nan: “Amen, bendicion y gloria y sabiduria y gradicimento y honor y poder y fortalesa sea na nos Dios pa semper y semper. Amen.”—Revelacion 7:11, 12.
Nan Ta Duna Prueba di Ta Digno
5. Con nos por haya sa kico ta ser exigi di e multitud grandi?
5 Pa e multitud grandi scapa e gran tribulacion, nan mester cumpli cu rekisitonan cu ta na harmonia cu e normanan husto di Yehova. Bijbel ta papia bon cla di e cualidadnan cu ta identifica esnan cu lo scapa. Pues, amantenan di husticia por actua awor di tal manera cu nan ta duna prueba di ta digno pa sobrevivi. Kico nan tin cu haci?
6. Pakico ta na su luga pa compara e multitud grandi cu carne?
6 Carne ta bestia manso y sumiso. Pesei ora Hesus a bisa cu e tin otro carne cu no ta di e grupo celestial, e tawata kiermen hende cu no solamente kier biba pa semper riba tera, sino cu tambe lo ta sumiso na su siñansanan. El a bisa: “Mi carnenan ta tende mi bos, y mi conoce nan, y nan ta sigui mi.” (Huan 10:16, 27) Esakinan ta hende cu realmente ta scucha Hesus y obedec’e den tur cos. Asina nan ta bira su disipel.
7. Ki otro cualidadnan e siguidonan di Hesus tin cu cultiva?
7 Ki otro cualidad cada un di e siguidonan aki di Hesus tin cu cultiva? E Palabra di Dios ta contesta: “En cuanto boso manera di biba di antes, boso pone un banda e hende bieu cu ta wordo corumpi conforme e pasionnan engañoso, y . . . boso bisti e hende nobo, cu a wordo crea segun Dios den husticia y santidad berdadero.” (Efesionan 4:22-24) Nan tin cu cultiva cualidadnan cu ta fortalece e union di Dios su sirbidonan: “amor, goso, pas, pasenshi, cariño, bondad, fieldad, mansedumbre, dominio propio.”—Galationan 5:22, 23.
8. Kico e multitud grandi lo confronta ora nan ta apoya e resto?
8 E multitud grandi ta apoya e cantidad chikito di esnan cu tin speransa celestial, y cu ta hiba delantera den e trabou di predica. (Mateo 24:14; 25:40) E otro carnenan ta apoya nan, maske e carnenan sa cu nan lo confronta oposicion, ya cu na principio di e ultimo dianan aki, Cristo Hesus y su angelnan a saca Satanas y su demoñonan for di shelo. Esaki a nifica “ai di tera . . . pasobra Diabel a baha bin cerca boso cu gran furia, sabiendo cu ta ked’e solamente un poco tempo mas.” (Revelacion 12:7-12) Pues, Satanas ta aumenta su oposicion contra e sirbidonan di Dios segun cu fin di e sistema aki ta yega cerca.
9. Kico e sirbidonan di Dios a logra cu nan trabou di predica e bon nobo, y con bin?
9 Apesar di persecucion cruel, e trabou di predica ta sigui bai dilanti. Na fin di Prome Guera Mundial tawatin apenas un par di mil proclamado di Reino, awor tin miyones, pasobra Yehova a priminti: “Ningun arma cu wordo forma contra bo lo no prospera.” (Isaias 54:17) Asta un miembro di e corte supremo Hudiu a reconoce cu hende no por frustra un trabou di Dios. El a bisa e Farizeonan den prome siglo relaciona cu e disipelnan: “Laga nan na pas; pasobra si e plan of trabou aki ta di hende, e lo wordo destrui, ma si ta di Dios e ta, boso lo no por tumba nan; asta boso por haya boso ta bringa contra Dios.”—Echonan 5:38, 39.
10. (a) Kico “e marca” cu tin riba esnan di e multitud grandi ta nifica? (b) Con e sirbidonan di Dios awe ta obedece “e bos for di shelo”?
10 Bijbel ta presenta e hendenan di e multitud grandi como si fuera marca pa sobrevivi. (Ezekiel 9:4-6) “E marca” ta e evidencia cu nan ta dedica na Yehova, batisa como disipel di Hesus y ta haciendo esfuerso pa cultiva un personalidad semehante na esun di Cristo. Nan ta obedece e “bos for di shelo” cu ta bisa tocante Satanas su imperio mundial di religion falso: “Sali for di dje, mi pueblo, pa bo no participa den su picanan y pa bo no ricibi di su plaganan.”—Revelacion 18:1-5.
11. Den ki manera importante e multitud grandi ta demostra cu nan ta sirbido di Yehova?
11 Tambe Hesus a bisa su siguidonan: “Na esaki tur hende lo sa cu boso ta mi disipel, si boso tin amor un pa otro.” (Huan 13:35) Na contraste, miembronan di religionnan di e mundo aki ta mata otro den guera, hopi bes djis pasobra nan ta di otro nacionalidad! E Palabra di Dios ta declara: “Na esaki e yiunan di Dios y e yiunan di Diabel ta conoci: esun cu no ta practica husticia no ta di Dios, ni esun cu no ta stima su ruman. . . . Nos mester stima otro; no manera Cain, kende tawata di e malbado, y a mata su ruman.”—1 Huan 3:10-12.
12. Den e gran tribulacion, kico Yehova lo haci cu ‘palonan’ religioso cu ta duna mal fruta?
12 Hesus a declara: “Tur bon palo ta duna bon fruta; ma e palo malo ta duna mal fruta. Un bon palo no por duna mal fruta, ni un palo malo no por duna bon fruta. Tur palo cu no ta duna bon fruta ta wordo gekap y tira den candela. Asina anto, na nan fruta boso lo conoce nan.” (Mateo 7:17-20) E fruta cu religionnan di e mundo aki ta produci ta identifica nan como “palo” putri cu pronto Yehova lo destrui den e gran tribulacion.—Revelacion 17:16.
13. Con e multitud grandi ta demostra cu unidamente nan ta “para dilanti di e trono” di Yehova?
13 Revelacion 7:9-15 ta mustra kico ta e factornan cu ta contribui na salbacion di e multitud grandi. E texto ta mustra cu unidamente nan ta “para dilanti di e trono” di Yehova, apoyando su derecho di ta gobernante supremo di e universo. Nan “a laba nan pañanan y a haci nan blanco den e sanger di e Lamchi”, demostrando asina cu nan ta reconoce e sacrificio di Hesus cu ta kita pica. (Huan 1:29) Nan a dedica nan mes na Dios y a simbolisa esaki pa medio di bautismo den awa. Pues nan ta gosa di un condicion limpi dilanti Dios, representa door di nan paña blanco, y nan ta “sirbie di dia y anochi.” Tin maneranan cu abo por pone bo bida mas na harmonia cu loke ta ser describi aki?
Beneficionan Actual
14. Cua ta algun beneficio unico cu sirbido di Yehova ta ricibi for di awor?
14 Probablemente bo a observa e beneficionan unico cu hende cu ta sirbi Yehova ta ricibi for di awor. Por ehempel, ora bo a siña tocante e propositonan husto di Yehova, bo a comprende cu tawatin un speransa briyante pa futuro. Pues awor bo tin un berdadero proposito den bo bida: sirbi e Dios berdadero cu e perspectiva gososo di bida eterno riba e tera comberti den un paradijs. Si, e Rei Hesucristo “lo guia [e multitud grandi] hiba na fuentenan di e awa di bida.”—Revelacion 7:17.
15. Con Testigonan di Yehova ta beneficia door di tene nan mes na principionan biblico relaciona cu asuntonan politico y moral?
15 Un otro beneficio maravioso cu e multitud grandi ta disfruta di dje ta e amor, union y harmonia cu tin entre sirbidonan di Yehova rond mundo. Como cu nos tur ta nutri nos mes cu e mesun alimento spiritual, nos tur ta obedece e mesun lei- y principionan cu tin den e Palabra di Dios. Ta pesei ni ideologianan politico ni nacional no ta causa desunion den nos. Tambe nos ta tene nos mes na e normanan moral halto cu Dios ta exigi di su pueblo. (1 Corintionan 6:9-11) Pues, en bes di experencia e conflicto, desunion y inmoralidad cu ta reina den mundo, e pueblo di Yehova ta disfruta di loke nos por yama un paradijs spiritual. Nota con e ta ser describi na Isaias 65:13 y 14.
16. Apesar di problemanan comun di bida, ki speransa e multitud grandi tin?
16 No, Yehova su sirbidonan humano no ta perfecto. Nan tambe ta ser afecta door di e problemanan comun di bida den e mundo aki. Por ehempel, nan ta pasa den momentonan dificil of ta bira victima inocente den guera di e nacionnan. Tambe nan ta confronta malesa, sufrimento y morto. Pero nan tin fe cu den e mundo nobo, Dios “lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolo.”—Revelacion 21:4.
17. Maske kico sosode cu nos awor, ki futuro maravioso ta spera esnan cu ta adora e Dios berdadero?
17 Asta si bo perde bo bida awor debi na biehes, malesa, un accidente of persecucion, Yehova lo resucita bo pa biba den Paradijs. (Echonan 24:15) E ora ei lo bo sigui disfruta di un bankete spiritual durante di Cristo su Reinado di Mil Aña. Bo amor pa Dios lo crece segun cu bo ta mira su propositonan alcansa nan glorioso realisacion. Y e bendicionnan fisico cu Yehova lo percura e tempo ei lo laga bo amor p’e crece mas ainda. (Isaias 25:6-9) Esta un futuro maravioso ta spera e pueblo di Dios!
Como Repaso
• Bijbel ta asocia e multitud grandi cu ki suceso extraordinario?
• Si di berdad nos kier ser conta den e multitud grandi ei cu ta disfruta di Dios su aprobacion, kico nos tin cu haci awor?
• Con importante e bendicionnan cu e multitud grandi ta disfruta di dje awor—y cu nan lo bai disfruta di dje despues den Dios su mundo nobo—ta pa bo?
[Plachi na pagina 123]
Miyones di hende di e multitud grandi unidamente ta adora e Dios berdadero