Hesus Tin Mas Poder cu Demoño

BO TA corda dicon un di Dios su angelnan a bira Satanas e Diabel?— Ta su deseo egoista pa hende ador’e a pon’e bai contra Dios. Tin mas angel cu a bira siguido di Satanas?— Si, tin mas. Bijbel ta yama nan ‘angel di Satanas’, of demoño.—Revelacion 12:9.

E demoñonan of angelnan malo aki ta kere den Dios?— Bijbel ta bisa: ‘E demoñonan ta kere cu Dios ta existi.’ (Santiago 2:19) Pero aworaki nan tin miedo, pasobra nan sa cu Dios ta bai castiga nan pa e cosnan malo cu nan a haci. Kico ta e cosnan malo cu nan a haci?—

Bijbel ta bisa cu e angelnan ei a bai for di shelo, e luga caminda nan mester biba, y a bin na tera pa biba manera hende. Nan a bin pasobra nan kier a tene relacion sexual cu e hende mohenan bunita riba tera. (Genesis 6:1, 2; Hudas 6) Kico abo sa tocante relacion sexual?—

Relacion sexual ta ora un hende homber y un hende mohe bin serca otro na un manera hopi special. Despues di esei un baby por cuminsa crece den bariga di e mama. Pero ta malo pa angel tene relacion sexual. Dios kier pa homber cu mohe cu ta casa so tene relacion sexual cu otro. E ora ei, si un baby nace, e homber y su casa por cri’e.

Despues cu e angelnan a traha curpa di hende pa nan mes y a tene relacion sexual cu hende mohe riba tera, nan babynan cu a nace a crece bira gigante, si, reus. Nan tawata abusado, y nan tawata haci hende daño. Pesei Dios a manda un dilubio grandi pa caba cu e gigantenan y tur e mal hendenan. Pero el a laga Noe traha un arca, un cos manera un barco grandi, pa scapa e poco hendenan cu si tawata haci bon. E Gran Maestro a bisa cu ta importante pa nos keda corda loke a pasa tempo di e Dilubio.—Genesis 6:3, 4, 13, 14; Lucas 17:26, 27.

Bo sa kico a pasa cu e mal angelnan ora e Dilubio a bin?— Nan a stop di uza e curpanan di hende cu nan a traha, anto nan a bai shelo bek. Pero ya nan no por tawata angel di Dios mas. Pesei nan a bira demoño, angel di Satanas. Anto kico a pasa cu nan yiunan, e gigantenan?— Nan a muri den e Dilubio. Y tur e otro hendenan cu no a haci loke Dios a bisa tambe a muri.

For di tempo di e Dilubio, Dios no a laga demoño bira manera hende mas. Pero maske nos no por mira demoño, ainda nan ta purba pone hende haci cos hopi malo. Awor nan ta causa mas tanto problema cu nunca, pasobra nan a ser saca for di shelo, y tira riba tera.

Bo sa dicon nos no por mira demoño?— Door cu nan ta invisibel. Pero nos por tin sigur cu nan ta existi. Bijbel ta bisa cu Satanas ta ‘gaña hende rond mundo’, y su demoñonan ta yud’e.—Revelacion 12:9, 12.

Bo ta kere cu Diabel y su demoñonan por gaña nos tambe?— Si, nan por hacie si nos no tene cuidou. Pero nos no mester tin miedo. E Gran Maestro a bisa: ‘Diabel no tin poder riba mi.’ Si nos keda serca di Dios, e ta proteha nos contra Diabel y su demoñonan.—Huan 14:30, BPK.

Ta importante pa nos sa ta kico ta e cosnan malo cu e demoñonan ta purba pone nos haci. Pesei, pensa un rato. Cua ta e cosnan malo cu e demoñonan a haci ora nan a bin na tera?— Prome cu e Dilubio, nan tawata tene relacion sexual cu hende mohe, maske angel no tin mag di haci e cos ei. Awendia, demoño gusta pa hende keda sin obedece e lei di Dios tocante relacion sexual. Laga mi puntra bo: Ken so tin mag di tene relacion sexual cu otro?— Corecto, hende casa so.

Awendia tin mucha jong cu ta tene relacion sexual. Pero e cos ei ta malo, pasobra nan no tin mag di hacie. Bijbel ta papia tocante e parti priva di curpa di hende homber, cu yama penis. (Deuteronomio 23:1) Y hende ta yama e parti priva di curpa di hende mohe vagina. Yehova a traha e partinan di curpa aki pa un motibo special cu ta pa hende casa so. E demoñonan ta bira contento ora hende haci cos cu Yehova a bisa cu no tin mag. Por ehempel, demoñonan gusta ora mucha homber y mucha mohe hunga cu penis of vagina di otro mucha. Nos no kier haci e demoñonan contento, toch?—

Tin un otro cos mas cu demoño ta gusta, pero cu Yehova tin rabia riba dje. Bo sa kico e ta?— Violencia. (Salmo 11:5) Violencia ta ora hende ta abusa di otro hende y haci nan daño. Corda cu ta esei ta loke e yiunan gigante di e demoñonan tawata haci.

Demoño gusta spanta hende tambe. Tin biaha nan ta haci manera cos cu nan ta hende cu a muri. Nan sa asta imita stem di hende cu a muri. Asina e demoñonan ta pone hopi hende kere cu hende morto ta na bida, y cu hende morto por papia cu hende bibo. Si, demoño ta pone hopi hende kere den spirito di hende morto.

Pesei nos tin cu paga tino pa Satanas cu su demoñonan no gaña nos. Bijbel ta spierta nos cu ‘Satanas ta purba parce manera un bon angel, y su sirbidonan ta haci mescos.’ (2 Corintionan 11:14, 15) Pero berdad ta cu demoño ta malbado. Laga nos wak con nan ta purba pone nos bira mescos cu nan.

Unda hende ta siña yen di cos di violencia, di relacion sexual cu no tin mag, y di spirito?— No ta den algun programa na television, pelicula, wega di computer y di video, Internet y door di lesa comics? E cosnan aki ta hala nos mas serca di Dios, of mas serca di Diabel cu su demoñonan? Kico abo ta kere?—

Segun bo, ta ken kier pa nos mira y scucha cos malo?— Si, Satanas cu su demoñonan. Pesei, kico nos mester haci?— Nos mester lesa, scucha y mira cos cu ta bon pa nos; cos cu ta yuda nos sirbi Yehova. Kico ta algun cos cu ta bon cu nos por haci?—

Si nos haci bon, nos no tin nodi sinti miedo di demoño. Hesus tin mas poder cu nan, y nan tin miedo di dje. Un dia e demoñonan a grita Hesus: “Bo a bin pa destrui nos?” (Marco 1:24) Bo no ta kere cu nos lo ta contento ora e dia yega pa Hesus destrui Satanas cu su demoñonan?— Tanten, nos por tin sigur cu Hesus lo proteha nos contra demoño si nos keda serca di dje y su Tata den shelo.