Dios Su Angelnan Ta Yuda Nos

TIN hende ta bisa cu ta den cos cu nan por mira so nan ta kere. Pero esei ta cos di bobo. Tin yen di cos cu ta existi, pero cu nunca nos no a mira cu nos wowo. Bo por bisa mi un di nan?—

Kico di e rosea cu nos ta hala? Nos por sintie?— Tene bo man dilanti bo boca, anto supla riba dje. Bo ta sinti algo?— Si. Pero bo no por mira e aire, toch?—

Nos a papia caba tocante spirito. Nan tampoco nos no por mira. Nos a siña cu un par di nan ta bon, y un par di nan ta malo. Menciona un par di bon persona spiritual cu nos no por mira.— Si, Yehova Dios ta un di nan, y tin Hesus y e bon angelnan tambe. Tin mal angel tambe?— Bijbel ta bisa cu si. Conta mi kico bo a siña tocante nan.—

Un cos cu nos sa ta cu tur bon angel y mal angel tin mas forsa cu nos. E Gran Maestro tawata sa hopi cos tocante angel. E tawata sa tur e cosnan ei pasobra e mes tawata un angel prome cu el a nace como baby na tera. E tawata biba hunto cu otro angelnan den shelo. E tawata conoce miyones di angel. Tur angel tin nomber?—

Wel, manera nos a siña, Dios a duna tur streya nomber. Pesei nos por tin sigur cu tur angel tambe tin nomber. Y nos sa cu nan ta papia cu otro, pasobra Bijbel ta bisa cu tin un ‘idioma di angel.’ (1 Corintionan 13:1) Di kico bo ta kere angel ta papia cu otro? Bo ta kere cu nan ta papia tocante nos cu ta aki riba tera?—

Nos sa cu demoño, e angelnan di Satanas, ta purba pone nos desobedece Yehova. Awel, nan mester ta papia cu otro tocante con pa hacie. Nan kier pa nos ta manera nan, ya e ora ei Yehova no ta gusta nos tampoco. Pero, kico di Dios su angelnan fiel? Bo ta kere cu nan tambe ta papia tocante nos?— Si, asina mes. Nan kier yuda nos. Laga mi conta bo con algun angel di Dios a yuda hende cu a stima Yehova y a sirbie.

Por ehempel tawatin un homber cu yama Daniel. E tawata biba na Babilonia. Hopi hende na e luga ei no a stima Yehova. Nan a asta traha un lei cu ta bisa cu mester castiga ken cu resa na Yehova Dios. Pero Daniel no kier a stop di resa na Yehova. Bo sa kico nan a haci cu Daniel?—

Si, mal hende a laga tira Daniel den cueba di leon. Daniel tawata su so eiden cu un par di leon yen di hamber. Bo sa kico a sosode e ora ei?— Daniel a bisa cu “Dios a manda su angel y a sera boca di e leonnan.” Nada nada no a pas’e! Angel por haci cos maraviyoso pa hende cu ta sirbi Yehova.—Daniel 6:18-22.

Tambe nos por corda un biaha cu Pedro tawata den prizon. Manera bo por ta corda, Pedro tawata amigo di e Gran Maestro Hesucristo. Algun hende no a gusta ora Pedro a bisa nan cu Hesus ta e Yiu di Dios. Pesei, nan a sera Pedro den prizon. Tawatin solda ta wak Pedro, pa percura pa e no hui. Ta ken por a yuda Pedro?—

Pedro tawata drumi meimei di dos solda, cu su mannan na cadena. Pero wak kico Bijbel ta bisa: ‘Mira, un angel di Yehova a bini, y un lus a cuminsa briya den e cel di prizon. E angel a mishi cu Pedro na su custia pa lant’e for di soño, anto a bis’e: “Lanta lihe!”’

Mesora e cadenanan a kita cai for di Pedro su man! Anto e angel a bis’e: ‘Bisti bo paña, bisti bo sandalia y sigui mi.’ E soldanan no por a stop nan, pasobra e angel tawata yuda Pedro. Anto ora nan a yega na e porta di hero, un cos straño a sosode. E porta a habri su so! E angel a saca Pedro for di prizon pa e por a sigui predica.—Echonan 12:3-11.

Angel di Dios por yuda nos tambe?— Si, nan por. Pero kico esei kiermen? Cu nunca nan no ta laga nada nada malo pasa nos?— No, angel no ta scapa nos ora nos haci cos di bobo. Pero asta ora nos no haci cos di bobo, toch cos malo por pasa nos. E angelnan no a haya ordo pa scapa nos for di e cosnan ei. Na luga di esei, Dios a duna nan un trabou special pa nan haci.

Bijbel ta conta nos di un angel cu ta bisa hende di tur parti di mundo pa nan adora Dios. (Revelacion 14:6, 7) Con e angel ta haci e cos ei? Ta for di shelo e ta grita pa tur hende tende?— No, ta e siguidonan di Hesus riba tera ta papia cu hende tocante Dios, anto e angelnan ta guia nan den nan trabou. E angelnan ta percura pa hende cu di berdad kier sa tocante Dios por haya chens di tende loke e siguidonan di Hesus ta papia. Nos tambe por haci e trabou di predica ei, y e angelnan lo yuda nos.

Pero kico ta pasa si hende cu no ta stima Dios cuminsa causa nos problema? Kico ta pasa si nan sera nos den prizon? E angelnan lo saca nos?— Nan por. Pero no ta semper nan ta hacie.

Un biaha Pablo, un siguido di Hesus, tawata preso. E tawata biahando riba lama den un barco durante un mal tempo pisa. Pero e angelnan no a lag’e sali liber mesora, pasobra tawatin mas hende cu mester a tende tocante Dios. Un angel a bisa: “No tene miedo, Pablo; bo mester para dilanti di Cesar.” Si, nan mester a hiba Pablo dilanti Cesar, un gobernante di mundo, pa Pablo por a predica na dje. Tur ora e angelnan tawata sa unda Pablo ta, y nan tawata yud’e. Y nan lo yuda nos tambe si nos ta sirbi Dios di berdad.—Echonan 27:23-25.

Tin un otro trabou importante cu e angelnan ta bai haci, y nan ta bai hacie aki poco tempo. E tempo pa Dios caba cu mal hende ta hopi serca. Tur hende cu no ta adora e Dios berdadero lo ser destrui. Hende cu ta bisa cu nan no ta kere den angel pasobra nan no por mira nan, ta bai mira cu nan ta masha ekiboca.—2 Tesalonicensenan 1:6-8.

Kico lo para di nos e ora ei?— Si nos ta na e mesun banda cu e angelnan di Dios, nan lo yuda nos. Pero nos ta na nan banda?— Nos ta na nan banda si nos ta sirbi Yehova. Y si nos ta sirbi Yehova, nos ta bisa otro hende pa nan tambe sirbie.