Kico Angel Ta?
E contesta cu Bijbel ta duna
Angel ta criatura cu tin mas poder y habilidad cu hende. (2 Pedro 2:11) Nan ta biba den cielo, of den e region spiritual, cu ta un nivel di existencia mas halto cu e universo fisico. (1 Reynan 8:27; Juan 6:38) Pues, nan ta ser yama tambe spirito.—1 Reynan 22:21; Salmo 18:10.
Di unda angel a bin?
Dios a crea angel pa medio di Hesus, kende Bijbel ta yama “e prome di tur creacion.” Bijbel ta splica con Dios a uza Hesus pa logra esey: “Pa medio di [Hesus] tur otro cos a ser crea, tanto den cielo como riba Tera, cosnan visibel y cosnan invisibel”, incluso e angelnan. (Colosensenan 1:13-17) E angelnan no ta casa ni haya yiu. (Marco 12:25) En bes di esey, cada un di “e yiu hombernan di Dios” a ser crea individualmente.—Job 1:6, Beibel Santu.
Angel a ser crea hopi tempo pasa, prome cu Tera a existi. Ora Dios a crea Tera, e angelnan a “grita di alegria.”—Job 38:4-7, Beibel Santu.
Cuanto angel tin?
Bijbel no ta papia di un cantidad specifico, pero si e ta mustra cu nan ta hopi. Por ehempel, apostel Juan a haya un vision caminda el a mira cientos di miyones di angel.—Revelacion 5:11, nota.
Tur angel tin nan propio nomber y personalidad?
Si. Bijbel ta menciona nomber di dos angel: Miguel y Gabriel. (Daniel 12:1; Lucas 1:26)a Otro angelnan a reconoce cu nan tabatin nomber, pero nan no a bisa cua ta nan nomber.—Genesis 32:29; Huesnan 13:17, 18.
Cada angel tin nan mes personalidad. Ademas, nan por comunica cu otro. (1 Corintionan 13:1) E angelnan por pensa y por alaba Dios. (Lucas 2:13, 14) Tambe nan tin e libertad pa scoge entre loke ta bon y loke ta malo, manera nos por a mira den e caso di algun di nan cu a peca y a join Satanas e Diabel den su rebelion contra Dios.—Mateo 25:41; 2 Pedro 2:4.
Angel tin diferente rango?
Si. E angel cu tin mas poder y autoridad ta Miguel, e arcangel. (Judas 9; Revelacion 12:7) Serafin ta angelnan di rango halto cu ta para banda di e trono di Jehova. (Isaias 6:2, 6) Otro angelnan cu tambe tin posicion halto ta kerubin, kendenan tin tarea special. Por ehempel, ta kerubin a vigila e entrada di e hofi di Eden despues cu Dios a saca Adam cu Eva for di e hofi.
Angel ta yuda hende?
Si, awendia Dios ta uza su angelnan fiel pa yuda hende.
Dios ta uza su angelnan pa guia su sirbidornan den e trabou di predica e bon noticia di e Reino di Dios. (Revelacion 14:6, 7) E guia aki ta beneficia tanto esnan cu ta predica como esnan cu ta tende e bon noticia.—Echonan 8:26, 27.
E angelnan ta yuda tene e congregacion cristian liber di influencia di hende malbado.—Mateo 13:49.
E angelnan ta guia y proteha hende cu ta fiel na Dios.—Salmo 34:7; 91:10, 11; Hebreonan 1:7, 14.
Pronto e angelnan lo bringa hunto cu Hesucristo pa libra humanidad di maldad y sufrimento.—2 Tesalonicensenan 1:6-8.
Cada un di nos tin un angel wardador?
Aunke e angelnan ta cuida e bienestar spiritual di e sirbidornan di Dios, esaki no necesariamente ta nifica cu Dios a asigna un angel wardador pa cuida y proteha cada cristian.b (Mateo 18:10) E angelnan no ta proteha sirbidornan di Dios contra tur prueba of tentacion. Bijbel ta mustra cu mayoria di biaha Dios lo “percura ... pa e salida” for di un prueba dunando nos e sabiduria y forsa pa persevera.—1 Corintionan 10:12, 13; Santiago 1:2-5.
Idea robes tocante angel
Idea robes: Tur angel ta bon.
E berdad: Bijbel ta papia tocante “forsanan spiritual di maldad” y “e angelnan cu a peca.” (Efesionan 6:12; 2 Pedro 2:4) E angelnan malbado aki ta demoñonan, kendenan a join Satanas den rebeldia contra Dios.
Idea robes: Angel ta inmortal.
E berdad: E angelnan malbado, incluso Satanas e Diabel, lo ser destrui.—Judas 6.
Idea robes: Ora hende muri, nan ta bira angel.
E berdad: E angelnan no ta hende cu a ser resucita; nan ta un creacion di Dios riba nan mes. (Colosensenan 1:16) Hende cu ser resucita pa biba den cielo lo ricibi bida inmortal for di Dios. (1 Corintionan 15:53, 54) Nan lo tin un puesto mas halto cu e angelnan.—1 Corintionan 6:3.
Idea robes: Angel a ser crea pa sirbi hende.
E berdad: Angel ta obedece Dios, no anos. (Salmo 103:20, 21) Hasta Hesus a bisa cu lo e pidi Dios yudansa, no e angelnan.—Mateo 26:53.
Idea robes: Nos por haci oracion na angel y pidi nan yudansa.
E berdad: Oracion ta parti di nos adoracion y adoracion ta pertenece na Jehova so. (Revelacion 19:10) Nos mester haci oracion solamente na Dios, mediante Hesus.—Juan 14:6.
a Algun traduccion di Bijbel ta uza e nomber “Lucifer” na Isaias 14:12, cu algun hende ta pensa ta e nomber di e angel cu a bira Satanas e Diabel. Sinembargo, e palabra original na Hebreo cu nan a uza ta nifica “esun cu ta briya.” E contexto ta mustra cu e palabra aki ta referi, no na Satanas, pero na e dinastia di Babilonia cu Dios lo a humilia pa su arogancia. (Isaias 14:4, 13-20) E expresion “esun cu ta briya” a ser uza pa ridiculisa e dinastia di Babilonia despues cu el a ser derota.
b Algun hende a pensa cu e relato den cua Pedro a ser libra for di prizon ta indica cu Pedro tabatin su angel wardador. (Echonan 12:6-16) Sinembargo, ora e discipelnan a referi na “[Pedro] su angel”, kisas tabata debi cu nan a yega na e conclusion robes cu ta un angel cu ta representa Pedro a trece un mensahe pa nan, y no Pedro mes.