Angelnan Ken Nan Ta

E MONARCA di un imperio poderoso no por a kere su wowo. Tres homber sentencia na morto den un candela feros a ser rescata for di gara di morto! Ken a salba nan? E rei mes a bisa e tres personanan rescata aki: “Bendiciona sea [boso Dios], kende a manda su angel y a libra su sirbidonan cu a pone nan confiansa den dje.” (Daniel 3:28) E gobernante Babilonio aki di mas cu 2.000 aña pasa tawata testigo di un liberacion efectua door di un angel. Miyones di hende den pasado tawata kere den angel. Awe hopi hende no solamente ta kere cu angel ta existi sino ta sinti tambe cu di un of otro manera angelnan tin influencia riba nan. Ken e angelnan ta, y di unda nan a bini?

Segun Bijbel, angelnan ta spirito, mescos cu Dios mes ta un Spirito. (Salmo 104:4, NW; Huan 4:24) E famia di angel ta grandi, nan ta miyones na cantidad. (Revelacion 5:11) Y nan tur ta “poderoso den fortalesa.” (Salmo 103:20) Aunke angelnan ta mescos cu hende den sentido cu nan tin un personalidad y a haya boluntad liber, nan bida no a cuminsa manera hende. De echo, Dios a crea angel hopi tempo prome cu el a crea hende, asta prome cu el a crea planeta Tera. Bijbel ta bisa cu ora Dios a “pone fundeshi di mundo . . . e streyanan di marduga [angelnan] tawata canta hunto, y tur e yiu hombernan di Dios tawata grita di alegria.” (Job 38:4, 7) Siendo cu angelnan ta creacion di Dios, nan ta ser yama yiunan di Dios.

Pa ki proposito Dios a crea angel? Nan a hunga un papel den historia humano? Y si ta asina, kico nan a yega di haci? Nan tin influencia riba nos awe? Siendo cu angelnan tin boluntad liber, tin algun di nan cu a sigui den e caminda di Satanas e Diabel y a haci nan mes enemigo di Dios? Bijbel ta duna contestanan veridico riba e preguntanan aki.