Con pa Bira Felis

NOS tur kier ta felis. Of no?— Pero mayoria hende no ta felis di berdad. Bo sa dicon?— Door cu nan no a siña kico ta e secreto di felicidad. Nan ta kere cu pa bo bira felis bo mester haya yen di cos. Pero ora nan haya e cosnan ei, nan felicidad no ta dura largo.

Awor, tende un secreto importante aki. E Gran Maestro a bisa cu tin mas felicidad den duna cu den ricibi. (Echonan 20:35) Kico anto nos por haci pa nos bira felis?— Si, nos por duna hende cos y haci cos pa nan. Bo tawata sa esei?—

Laga nos pensa un tiki mas riba e asunto aki. Kico Hesus a bisa? E tawata kiermen cu un hende no ta bira felis ora e haya un regalo?— No, no ta esei el a bisa. Bo gusta haya regalo, no ta asina?— Si, tur hende gusta. Nos ta keda contento ora nos haya cos bunita.

Pero Hesus a bisa cu nos por bira asta mas contento ora nos duna. Awor, ta ken bo ta kere a duna hende mas hopi cos?— Si, Yehova Dios.

Bijbel ta bisa cu Dios “ta duna tur hende bida y rosea y tur cos.” E ta duna nos awasero for di shelo y lus di solo tambe, pa mata crece y pa nos tin cuminda pa come. (Echonan 14:17; 17:25) No ta nada straño cu Bijbel ta bisa cu Yehova ta “e Dios bendiciona”, esta, e Dios felis! (1 Timoteo 1:11) Un di e cosnan cu ta haci Dios felis ta cu e ta duna. Nos tambe por bira felis door di duna.

Awor, kico nos por duna hende? Kico abo ta kere?— Tin bes regalo ta costa placa. Si ta na un tienda bo ta cumpra e regalo, bo tin cu paga p’e. Pesei, si bo kier duna hende un regalo asina, kisas lo bo tin cu spar te ora bo tin placa pa cumpra e regalo.

Pero no ta tur ora ta cumpra nos mester cumpra regalo. Por ehempel, ora ta haci calor un glas di awa friu ta baha hopi bon. Pesei, si bo duna un hende un glas di awa friu ora e tin sed, bo por sinti e felicidad di duna.

Kisas un dia abo cu bo mama por traha cuki hunto. Lo bo gusta esei, no? Pero kico bo por haci cu un par di bo cukinan pa bo bira asta mas felis cu si bo come nan bo so?— Si, bo por duna un di bo amigonan un par di nan. Bo no tin gana di haci e cos ei un dia?—

E Gran Maestro y su apostelnan tur a haya felicidad door di duna. Bo sa ta kico nan a duna hende?— E miho cos na mundo! Nan tawata sa e berdad tocante Dios, y nan a keda contento pa comparti e bon noticia aki cu otro hende. Anto nan tawata hacie sin laga ningun hende paga nan.

Un dia apostel Pablo cu su bon amigo, disipel Lucas, a topa un señora cu tambe tawata kier duna pa e haya felicidad. Nan a top’e canto di un riu. Pablo cu Lucas a bai na e luga ei door cu nan a tende cu hende tawata bai aya pa haci oracion. Y, berdad, ora nan a yega nan a topa algun señora ta haci oracion.

Pablo a cuminsa conta e señoranan aki e bon noticia tocante Yehova Dios y su Reino. Un di nan tawata yama Lidia, y el a scucha cu hopi atencion. Ora a caba, Lidia kier a haci algo pa mustra cuanto el a gusta e bon noticia cu el a tende. Pesei el a pidi Pablo cu Lucas masha: “Si boso a husga cu mi ta fiel na Señor, bini mi cas y keda serca mi.” Y el a pone cu nan mester a bai cas cu ne.—Echonan 16:13-15.

Lidia a keda contento di por tin e sirbidonan di Dios ei den su cas. El a stima nan, pasobra nan a yud’e siña tocante Yehova Dios y Hesus, y tocante kico hende mester haci pa nan biba pa semper. El a keda contento di por a duna Pablo cu Lucas cuminda y un luga pa sosega, pasobra e mes tawatin hopi gana di duna. Y esei ta un cos cu nos mester keda corda. Si un hende bisa nos cu nos tin cu duna un regalo, pero nos mes no kier hacie, e ora ei nos lo no bira felis door di duna e regalo.

Por ehempel, imagina bo cu bo tin un par di mangel, anto bo mes kier come nan. Si mi bisa bo cu bo tin cu duna un otro mucha un par di nan, lo bo keda contento di dun’e nan?— Pero awor, imagina bo cu bo tin un par di mangel, anto bo ta topa un bon amigo. Si bo mes haya gana di parti bo mangelnan cu bo amigo, lo bo no keda contento di hacie?—

Tin bes nos ta stima un hende asina tanto cu nos kier dun’e tur cos, sin keda cu nada pa nos mes. Segun cu nos amor pa Dios ta crece, mas y mas nos mester sinti asina pa E tambe.

E Gran Maestro tawata sa di un señora pober cu tawata sinti asina. Hesus a mir’e den tempel na Herusalem. E tawatin dos moneda chikito so; nada mas. Pero el a tira tur dos den caha como contribucion, esta, como un regalo pa e tempel. Ningun hende no a oblig’e. Mayoria di e hendenan cu tawat’ei no a haya sa mes kico el a haci. El a hacie pasobra e mes tawata kier, y pasobra el a stima Yehova masha hopi mes. El a keda contento cu e por a duna algo.—Lucas 21:1-4.

Tin hopi manera cu nos por duna. Bo por bisa mi un par di nan?— Si nos duna pasobra nos mes kier, nos lo ta felis. Esei ta loke e Gran Maestro ta bisa nos pa haci: “Duna.” (Lucas 6:38) Si nos duna, nos ta haci hende felis. Anto nos mes lo bira asta mas felis ainda!