Kico Ta Mas Importante?

UN DIA un homber a bin serca Hesus. E tawata sa cu Hesus ta hopi sabi. Pesei el a bis’e: ‘Maestro, bisa mi ruman duna mi un par di e cosnan cu e tin.’ E homber a kere cu e tawatin derecho di haya un par di e cosnan di su ruman.

Si t’abo tawata Hesus, kico lo bo a bisa e homber?— Hesus a mira cu e homber tawatin un problema. Pero su problema no tawata cu e tawatin mester di e cosnan di su ruman. E problema di e homber tawata cu e no tawata sa kico ta e cosnan mas importante den bida.

Laga nos pensa riba e cos aki un rato. Kico mester ta mas importante pa nos? Bo ta kere cu co’i hunga, paña nobo y cosnan asina ta mas importante?— No, tin un cos hopi mas importante cu nan. Y t’esei ta e les cu Hesus kier a siña nos. Pesei el a conta un cuenta di un homber cu a lubida riba Dios. Bo kier tend’e?—

E homber aki tawata hopi rico. E tawatin cunucu y mangasina. E cosnan cu e tawata planta tawata crece hopi bon. E no tawatin luga den su mangasinanan pa warda tur su cosecha. Pesei, kico e ta bai haci awor? Wel, el a pensa: ‘Mi ta basha mi mangasinanan abou anto traha otro mangasina mas grandi. E ora ei mi ta warda tur mi cosecha y tur mi bon cosnan den e mangasinanan nobo aki.’

E homber rico a pensa cu ta hopi sabi di su parti pa warda yen di cos. El a pensa: ‘Mi tin hopi bon cos warda. Nan lo dura mi hopi aña. Awor mi por biba trankil. Mi ta bai come, bebe y gosa.’ Pero e homber rico a pensa robes. Bo sa dicon?— El a pensa riba su mes so, y riba con e mes por gosa. El a lubida riba Dios.

Pesei, Dios a papia cu e homber rico. El a bis’e: ‘Homber bobo. Awenochi bo ta muri. Awor, ken ta bai keda cu tur e cosnan cu bo a warda?’ E homber rico por a uza e cosnan ei despues cu e muri?— No, otro hende lo a haya nan. Hesus a bisa: ‘Asina ta pasa cu e hende cu ta montona tesoro pa su mes, y no ta rico den bista di Dios.’—Lucas 12:13-21.

Bo no kier ta manera e homber rico, no?— Haya cos material tawata e cos di mas importante den su bida. El a haci fout. Semper e tawata kier mas, pero e no tawata ‘rico den bista di Dios.’

Hopi hende ta manera e homber rico ei. Semper nan kier mas. Pero e cos ei por hinca nan den problema grandi. Por ehempel, abo tin co’i hunga, no?— Ki co’i hunga asina bo tin?— Kico ta pasa si un di bo amigonan tin un bala of un popchi of un otro co’i hunga cu abo no tin? Bo ta kere cu ta bon si bo purba pone bo mama cu bo tata cumpra un pa bo tambe?—

Tin bes un co’i hunga ta parce hopi importante. Pero kico ta pasa despues di tempo?— E ta bira bieu, kisas e ta kibra, y bo no kier e mes mas. Pero bo tin un cos cu tin hopi mas balor cu co’i hunga. Bo sa ta kico e ta?—

Wel, esei ta bo bida. Bo bida ta hopi importante, pasobra sin dje bo no por haci nada. Pero pa bo keda biba bo tin cu haci cos cu ta haci Dios contento, no ta berdad?— Pesei, no laga nos haci cos di bobo manera e homber rico cu a lubida riba Dios.

No ta mucha so sa haci cos di bobo manera e homber rico. Hopi hende grandi tambe ta haci asina. Tin hende grandi cu tur ora bai kier mas cu loke nan tin. Kisas nan tin cuminda pa come e dia ei, paña pa bisti y un luga pa biba. Pero nan kier mas. Nan kier hopi paña. Y nan kier cas mas grandi. E cosnan ei ta costa placa. Pesei nan ta traha duro pa gana hopi placa. Y mas placa nan gana, mas placa nan kier.

Tin hende grandi cu ta bira asina druk purbando di gana placa, cu nan no tin tempo pa nan famia. Y nan no tin tempo pa Dios tampoco. Nan placa por tene nan na bida?— No, e no por. Nan por uza e placa despues cu nan muri?— No, pasobra hende morto no por haci nada nada.—Eklesiastes 9:5, 10.

Esei kiermen cu ta malo pa nos tin placa?— No. Nos por uza placa pa cumpra cuminda y paña. Bijbel ta bisa cu placa ta un proteccion. (Eclesiastes 7:12) Pero si nos ta stima placa, nos ta bai haya nos cu problema serio. Nos lo bira manera e homber rico bobo aya cu a warda un tesoro pa su mes, sin cu e tawata rico den bista di Dios.

Kico nos mester haci pa nos ta rico den bista di Dios?— Nos mester pone Dios na prome luga den nos bida. Tin hende ta bisa cu nan ta kere den Dios. Nan ta pensa cu kere den dje mes ta basta. Pero nan ta rico den bista di Dios?— No, nan ta manera e homber rico cu a lubida riba Dios.

Hesus si nunca no a lubida riba su Tata den shelo. E no a purba gana hopi placa. Y e no tawatin hopi cos material. Hesus tawata sa kico ta mas importante den bida. Abo sa ta kico?— Ser rico den bista di Dios.

Conta mi, con nos por ta rico den bista di Dios?— Nos por ta rico den bista di Dios door di haci cos cu ta hacie contento. Hesus a bisa: “Semper mi ta haci e cosnan cu ta agrad’e.” (Huan 8:29) Dios ta keda contento ora nos haci e cosnan cu e kier. Awor, conta mi: Kico ta algun cos cu bo por haci pa Dios keda contento cu bo?— Si, bo por lesa Bijbel, bai reunion cristian, resa na Dios y yuda hende siña tocante dje. Eseinan ta e cosnan di mas mas importante den bida.

Door cu Hesus tawata rico den bista di Dios, Yehova a percura p’e. El a recompensa Hesus door di lag’e biba pa semper. Si nos ta manera Hesus, Yehova lo stima nos y percura pa nos tambe. Pesei, laga nos ta manera Hesus, y nunca manera e homber rico aya cu a lubida riba Dios.