Placa Ta Raiz di Tur Sorto di Maldad?

Loke Bijbel ta bisa

No. Bijbel no ta bisa cu placa ta malo, ni cu placa ta e causa di tur cos malo. Tin hende ta pensa cu e expresion “placa ta raiz di tur sorto di maldad” ta saca for di Bijbel. Pero loke Bijbel ta bisa ta cu “amor pa placa ta raiz di tur sorto di cos perhudicial.”—1 Timoteo 6:10.

Kico Bijbel ta bisa tocante placa?

Bijbel ta reconoce cu ora bo uza placa na un manera sabi, e por ta util y por sirbi hasta como “proteccion.” (Eclesiastes 7:12) Tambe, Bijbel ta elogia hende cu ta gusta duna—kisas hasta placa—pa yuda otro hende.—Proverbionan 11:25.

Na mes momento, Bijbel ta spierta nos pa no enfoca demasiado riba placa. E ta bisa: “Laga boso manera di biba ta liber di amor pa placa, y keda contento cu loke boso tin.” (Hebreonan 13:5) Pues, e les cu nos por saca ta: Tene placa na su luga y no core tras di rikesa. En bes di esey, nos mester keda contento cu e cosnan cu realmente nos tin mester, manera cuminda, paña y un dak riba nos cabes.—1 Timoteo 6:8.

**Dicon Bijbel ta spierta nos tocante amor pa placa?**

Hende golos lo no haya bida eterno. (Efesionan 5:5) Esey ta pasobra golosidad ta un forma di idolatria, of adoracion di dios falso. (Colosensenan 3:5) Y hende golos hopi bes ta hala nan balornan moral un banda pa haya loke nan ta desea. Proverbionan 28:20 ta bisa: “Esun cu ta pura pa bira rico lo no keda sin castigo.” Hende golos por bay asina leu di comete delito manera soborno, extorsion, fraude, secuestro y asesinato.

Y hasta si amor pa placa no hiba na mal conducta, e por tin otro mal consecuencia. Bijbel ta bisa cu “hende cu ta determina pa bira rico ta cay den tentacion, den trampa y den hopi deseo bobo y perhudicial.”—1 Timoteo 6:9.

Con Bijbel su consehonan tocante placa por yuda nos?

Si nos pega na Dios su normanan y no hala nos balornan moral un banda pa placa , nos lo tin respet propio y tambe Dios su aprobacion y sosten. Pa esnan cu sinceramente ta purba di agrada Dios, e ta priminti: “Hamas lo mi bandona bo, y hamas lo mi laga bo desampara.” (Hebreonan 13:5, 6) Tambe Dios ta sigura nos cu “un hende fiel lo ta yen di bendicion.”—Proverbionan 28:20.

Texto di Bijbel Tocante Placa

Eclesiastes 7:12: “Placa ta proteccion.”

Nificacion: Ora nos uza placa na e manera corecto, e por duna nos un cierto grado di siguridad.

Lucas 12:15: “Hasta ora un hende tin na abundancia, su bida no ta depende di loke e tin.”

Nificacion: Placa no ta e cos di mas importante den bida y lo e no contribui na nos salbacion.

1 Timoteo 6:10: “Amor pa placa ta raiz di tur sorto di cos perhudicial, y algun hende cu a cay pa e amor aki a desvia for di fe y a causa nan mes hopi dolor.”

Nificacion: Placa riba su mes no ta malo. Pero hende cu ta stima placa—cu ta haci placa e cos di mas importante den nan bida—ta hinca nan mes den problema. Hende asina ta haya nan mes cu famia kibra of problema cu salud pasobra nan ta traha di mas.

Hebreonan 13:5: “Laga boso manera di biba ta liber di amor pa placa, y keda contento cu loke boso tin.”

Nificacion: Na luga di core tras di rikesa, lo ta mihor si nos keda contento cu loke realmente nos tin mester.

Mateo 19:24: “Ta mas facil pa un camel pasa door di wowo di un hangua cu pa un hende rico drenta e Reino di Dios.”

Nificacion: Hesus a caba di invita un yoncuman rico pa siguie. Pero e yoncuman a nenga pasobra e tabata mucho pega na su propiedadnan. Pesey Hesus a duna e spiertamento ey. Un hende cu duna rikesa mas importancia cu Dios, ta risca di perde bida eterno.