LES 37
Loke Bijbel Ta Bisa Tocante Trabou y Placa
Bo a yega di preocupa tocante trabou of placa? Tin biaha, por ta dificil pa percura pa nos necesidadnan y na mes momento sirbi Jehova cu henter nos curason. Bijbel ta duna bon conseho cu por yuda nos.
1. Kico Bijbel ta bisa tocante trabou?
Dios kier pa nos disfruta di nos trabou. Bijbel ta bisa: “Ta bon pa un hende ... haya goso den e trabounan duro cu e ta haci.” (Eclesiastes 2:24) Jehova ta traha duro. Ora nos ta imita Jehova y ta traha duro, nos lo hacie contento y nos lo sinti nos bon.
Ta berdad cu trabou ta importante, pero nunca nos no mester laga trabou bira mas importante cu nos adoracion na Jehova. (Juan 6:27) Jehova ta priminti cu ora nos pon’e na prome luga den nos bida, lo e percura pa nos necesidadnan fisico.
2. Ki punto di bista balansa nos mester tin di placa?
Maske Bijbel ta bisa cu “placa ta proteccion”, e ta spierta nos tambe cu placa so no por haci nos feliz. (Eclesiastes 7:12) Pesey, Bijbel ta anima nos pa no stima placa sino pa “keda contento cu loke [nos] tin.” (Lesa Hebreonan 13:5.) Ora nos ta keda contento cu loke nos tin, nos lo no sinti nos frustra pasobra nos ta pensa cu nos tin mester di mas y mas. Anto nos lo evita di cay den debe innecesario. (Proverbionan 22:7) Ademas, nos ta evita wega di placa y di hinca placa den negoshinan dudoso pa gana cen lihe.
3. Con nos por ta generoso cu nos placa?
Jehova ta un Dios generoso y nos ta imit’e ora nos ta “generoso, cla pa comparti cu otro.” (1 Timoteo 6:18) Nos por ta generoso cu nos placa ora nos ta sostene e congregacion financieramente y yuda otro hende den necesidad, specialmente nos rumannan. Jehova ta interesa, no den cuanto nos ta duna, sino e motibo dicon nos ta duna. Ora nos ta generoso y ta duna di nos curason, nos lo ta feliz y nos lo agrada Jehova.—Lesa Echonan 20:35.
KICO MAS NOS POR SIÑA?
Laga nos wak e beneficionan di tin un punto di bista corecto tocante trabou y di keda contento cu loke nos tin.
4. Laga e manera cu bo ta traha honra Jehova
Nos amistad cu Jehova mester influencia e manera cu nos ta mira trabou. Pasa e VIDEO. Despues, analisa e siguiente preguntanan:
Den e video, kico a impresiona bo di Jason su actitud y conducta na trabou?
Kico el a haci pa tene trabou na su debido luga?
Lesa Colosensenan 3:23, 24. Despues, analisa e siguiente pregunta:
Dicon ta importante pa nos traha duro?
Trabou ta importante. Pero nunca nos no mester lag’e bira mas importante cu nos adoracion na Jehova
5. Nos lo beneficia ora nos keda contento cu loke nos tin
Hopi hende ta purba di haya mas tanto placa posibel. Pero Bijbel ta conseha algo otro. Lesa 1 Timoteo 6:6-8. Despues, analisa e siguiente pregunta:
Kico Bijbel ta anima nos pa haci?
Nos por ta feliz, hasta ora nos no tin hopi. Pasa e VIDEO. Despues, analisa e siguiente pregunta:
Aunke cu e famianan aki no tin hopi placa, kico ta haci nan contento?
Pero kico lo pasa si nos tin hopi placa y toch nos kier mas? Hesus a uza un ilustracion pa mustra con peligroso esey ta. Lesa Lucas 12:15-21. Despues, analisa e siguiente pregunta:
Kico abo a siña for di Hesus su ilustracion?—Wak versiculo 15.
Lesa Proverbionan 10:22 y 1 Timoteo 6:10 y compara nan cu otro. Despues, analisa e siguiente preguntanan:
Kico abo ta pensa ta mas importante: tin un amistad cu Jehova of tin hopi placa? Dicon bo ta bisa esey?
Ki problema lo bo haya bo cu ne si bo ta core tras di placa?
6. Jehova lo percura pa nos haya loke nos tin mester
Ora trabou y placa ta preocupa nos, nos por sinti cu ta dificil pa confia den Jehova. Pasa e VIDEO pa mira kico nos por haci ora nos tin e tipo di preocupacionnan ey. Despues, analisa e siguiente preguntanan:
Ki problema e ruman homber den e video a haya?
Kico el a haci pa trata cu su situacion?
Lesa Mateo 6:25-34. Despues, analisa e siguiente pregunta:
Kico Jehova ta priminti di haci pa tur hende cu pon’e na prome luga den nan bida?
LOKE HENDE SA BISA: “Mi mester traha duro pa percura pa mi famia. Pesey, mi no por bay reunion tur siman.”
Ki texto ta convence abo cu Jehova lo percura pa nos ora nos pone adoracion na dje na prome luga den nos bida?
RESUMEN
Trabou y placa ta necesario, pero nan no mester stroba nos di sirbi Jehova.
Repaso
Kico por yuda bo tin un punto di bista balansa di trabou?
Dicon ta bon pa keda contento cu loke bo tin?
Con bo por mustra cu bo tin confianza cu Jehova lo percura pa su pueblo?
MAS INFORMACION INTERESANTE
Bijbel ta bisa cu ta malo pa un hende tin placa?
“Placa Ta Raiz di Tur Sorto di Maldad?” (articulo riba jw.org)
Haya sa con nos por uza nos placa pa haci Dios contento.
“Kico Bijbel Ta Bisa Tocante Dunamento?” (articulo riba jw.org)
Ta malo pa hunga wega di placa?
“E Punto di Bista Biblico—Wega di Placa” (Spièrta! di maart 2015)
Wak kico a motiva un homber cu tabata hunga wega di placa y cu tabata horta cambia su bida.
“Mi Tabata Stima Careda di Cabay” (La Atalaya di 1 di november 2011)