Dios A Uza Evolucion pa Crea Diferente Sorto di Bida?
Loke Bijbel ta bisa
No. Bijbel ta bisa bon cla cu Dios a crea hende y tambe diferente “sorto” di bestia y mata.a (Genesis 1:12, 21, 25, 27; Revelacion 4:11) Bijbel ta splica cu henter e famia humano ta descendiente di nos prome mayornan, Adam y Eva. (Genesis 3:20; 4:1) Bijbel no ta apoya e teoria, conoci como evolucion teista. Segun e teoria aki, Dios a uza evolucion pa crea diferente sorto di bida. Di otro banda, Bijbel no ta contradeci tampoco e observacionnan cientifico, esta, cu tin variacion denter di cada sorto.b
Dios a uza evolucion?
E expresion “evolucion teista” ta referi na un variedad amplio di idea. Segun Encyclopædia Britannica, e expresion ey ta transmiti e idea “cu Dios ta uza e proceso di seleccion natural pa dirigi naturaleza.”c
Evolucion teista por encera e siguiente ideanan tambe:
Tur organismo bibo ta bin di e mesun antepasado prehistorico.
Un forma di bida por evoluciona y bira completamente un otro forma di bida. Nan sa yama e concepto ey macro-evolucion.
Di un of otro manera, Dios ta percura pa e procesonan ey tuma luga.
Bijbel ta apoya e teoria di evolucion?
Segun e teoria di evolucion teista, loke Bijbel ta bisa den Genesis tocante creacion no ta exacto. Sinembargo, Hesus a referi na e relato di Genesis como un echo historico. (Genesis 1:26, 27; 2:18-24; Mateo 19:4-6) Bijbel ta bisa cu, prome cu Hesus a bin na Tera, e tabata biba den cielo hunto cu Dios y a yuda Dios crea “tur cos.” (Juan 1:3) Pesey, e idea cu Dios a uza evolucion pa laga diferente forma di bida yega na existencia no ta cuadra cu loke Bijbel ta siña.
Kico di e habilidad cu mata y bestia tin pa adapta nan mes?
Bijbel no ta bisa cuanto variacion por tin di e mesun sorto. Bijbel no ta contradeci tampoco e echo cu diferente sorto di bestia y mata cu Dios a crea por produci diferente variacion segun cu nan ta reproduci of ta adapta na nan medioambiente. Algun hende ta pensa cu e cambionan ey ta un forma di evolucion, pero realidad ta cu e variacionnan ey no ta produci niun forma di bida nobo.
a Bijbel ta uza e palabra “sorto”, cu tin un nificacion mucho mas amplio cu e palabra “especie” cu cientificonan ta uza. Hopi biaha, loke cientificonan ta yama evolucion di un especie nobo, ta simplemente un variacion denter di e mesun sorto. Y esey mes ta e palabra cu e relato di Genesis ta uza.
b Tin biaha, nan sa yama e variacionnan aki micro-evolucion.
c Seleccion natural ta e teoria cu un organismo cu ta adapta mihor na su medio ambiente, ta sobrevivi y reproduci mihor.