Kico Tabata e Pica Original?

Loke Bijbel ta bisa

Adam cu Eva tabata e prome personanan cu a peca. Ora nan a desobedece Dios y a come for di e “palo di conocemento di bon y malo”, nan a comete loke hopi hende ta yama e pica original.a (Genesis 2:16, 17; 3:6; Romanonan 5:19) Dios a prohibi Adam y Eva pa come di e palo ey pasobra e palo a representa e autoridad, of derecho, di Jehova pa dicidi loke ta bon y loke ta malo pa humanidad. Ora nan a come for di e palo, nan a demostra cu nan kier a dicidi pa nan mes loke ta bon y loke ta malo. Di e manera ey, nan a rechasa Dios su autoridad.

• Con e “pica original” a perhudica Adam y Eva?

• Con e “pica original” ta perhudica nos?

• Nos por ser libra di e consecuencianan di e “pica original”?

• Ideanan robes tocante e “pica original”

Con e “pica original” a perhudica Adam y Eva?

Adam y Eva a bira bieu y muri pasobra nan a peca. Nan a daña nan amistad cu Jehova y a perde e posibilidad di biba pa semper cu salud perfecto.—Genesis 3:19.

Con e “pica original” ta perhudica nos?

Adam y Eva a pasa nan condicion pecaminoso pa tur nan descendientenan. Ta mescos cu ora un mayor ta pasa un defecto genetico pa su yiunan. (Romanonan 5:12) Pues, tur hende ta nace “den pica”,b esta, nos tur ta nace imperfecto y cu e tendencia pa haci loke ta robes.—Salmo 51:5; Efesionan 2:3.

Debi na pica hereda, of imperfeccion, nos ta bira malo, bira bieu y muri. (Romanonan 6:23) Ademas, nos ta sufri e consecuencianan di nos propio erornan y erornan di otro hende.—Eclesiastes 8:9; Santiago 3:2.

Nos por ser libra di e consecuencianan di e “pica original”?

Si. Bijbel ta bisa cu Hesus a muri “como un sacrificio di reconciliacion pa nos picanan.” (1 Juan 4:10) Hesus su sacrificio por libra nos for di e consecuencianan di pica cu nos a hereda y ta duna nos oportunidad pa haya loke Adam y Eva a perde, esta, e posibilidad di biba pa semper cu salud perfecto.—Juan 3:16.c

Ideanan robes tocante e “pica original”

Idea robes: Door di e pica original nos no por hala cerca Dios nunca mas.

E berdad: Dios no ta culpa nos pa loke Adam y Eva a haci. E ta compronde cu nos ta imperfecto, y e no ta spera mas di loke nos por haci. (Salmo 103:14) Aunke nos ta sufri debi na pica hereda, nos tin e oportunidad y privilegio di tin un amistad cera cu Dios.—Proverbionan 3:32.

Idea robes: Bautismo ta libra hende for di e pica original, pesey hende mester batisa baby.

E berdad: Aunke bautismo ta un paso importante pa haya salbacion, ta solamente fe den e sacrificio di Hesus por libra un persona di pica. (1 Pedro 3:21; 1 Juan 1:7) Ya cu fe ta basa riba conocemento exacto di Bijbel, un baby no por tin fe. Pesey, Bijbel no ta siña cu mester batisa baby. E cristiannan di prome siglo tabata sa esey bon. Nan no a batisa baby, sino hende creyente, esta, “homber [y] muher” adulto cu tabatin fe den e Palabra di Dios.—Echonan 2:41; 8:12.

Idea robes: Dios a maldiciona hende muher pasobra Eva tabata esun cu a come di e fruta prohibi prome.

E berdad: Na luga di maldiciona hende muher, Dios a maldiciona “e colebra original, esun cu yama Diabel y Satanas”, kende a pone Eva peca. (Revelacion 12:9; Genesis 3:14) Ademas, Dios a pone e responsabilidad di e pica original riba Adam, no riba su esposa Eva.—Romanonan 5:12.

Dicon Dios a bisa cu Adam lo domina su esposa? (Genesis 3:16) Ora Dios a bisa esey, e no a aproba e comportacion ey. Simplemente e tabata indica e consecuencia tristo di pica. Dios kier pa un homber stima y honra su esposa y mustra respet profundo na tur hende muher.—Efesionan 5:25; 1 Pedro 3:7

Idea robes: E pica original tabata relacion sexual.

E berdad: E pica original no por tabata relacion sexual pa e siguiente motibonan:

• Dios a prohibi Adam di come for di e palo di conocemento di bon y malo ora cu e tabata su so ainda, sin esposa.—Genesis 2:17, 18

• Dios a duna Adam y Eva e mandamento pa “sea fructifero y multiplica”, esta, pa haya yiu. (Genesis 1:28) Lo tabata cruel di Dios su parti pa castiga e prome pareha pa a haci loke el a manda nan haci.

• Adam y Eva no a peca hunto—Eva a peca prome y despues su esposo.—Genesis 3:6.

• Bijbel ta aproba relacion sexual entre pareha casa.—Proverbionan 5:18, 19; 1 Corintionan 7:3.