Ta Bon pa Bringa?

BO CONOCE mucha cu ta purba play tof?— Bo gusta bai serca nan? Of bo ta prefera bai serca hende bondadoso cu gusta pas?— E Gran Maestro a bisa: ‘Felis ta hende cu ta haci pas, pasobra nan lo wordo yama yiunan di Dios.’—Mateo 5:9.

Pero tin bes cu hende ta haci cos cu ta pone nos rabia, no?— Ora e cos ei pasa, nos por sinti gana di haci nan un cos bek. Asina a yega di sosode cu e disipelnan di Hesus un dia cu nan tawata cu Hesus riba caminda pa Herusalem. Laga mi conta bo kico a pasa.

Ora nan tawatin algun rato ta cana, Hesus a manda un par di su disipelnan bai prome cu ne na un pueblo Samaritano chikito pa busca un luga pa nan sosega. Pero e hendenan di e pueblo no tawata kier pa nan keda, pasobra nan tawatin otro religion. Y nan no tawata gusta ningun hende cu ta bai Herusalem pa adora.

Si ta cu bo e cos ei a pasa, kico lo bo a haci? Lo bo a rabia? Lo bo haya gana di haci nan un cos bek?— Esei ta loke Santiago cu Huan, dos disipel di Hesus, kier a haci. Nan a bisa Hesus: ‘Bo kier pa nos manda candela baha for di shelo y caba cu nan?’ No ta nada straño cu Hesus a yama nan Yiu di Donder! Pero Hesus a bisa nan cu no ta bon pa trata hende asina.—Lucas 9:51-56; Marco 3:17.

Ta berdad cu tin bes hende ta trata nos malo. Tin bes otro mucha no kier pa nos hunga den nan wega. Kisas asta nan ta bisa nos: “Nos no kier hunga cu bo.” Ora un cos asina pasa, e por pone nos rabia, no? Nos por sinti gana di haci nan un cos bek. Pero, ta bon pa nos hacie?—

Bo por coi bo Bijbel? E ora ei nos por busca Proverbionan capitulo 24, versiculo 29. Ei tin skirbi: “No bisa: ‘Lo mi haci cu ne mescos cu el a haci cu mi; lo mi paga e homber segun su obra.’”

Kico bo ta compronde for di e texto aki?— E ta mustra cu nos no mester tuma vengansa, esta, haci hende cos malo bek.Nos no mester haci hende algo djis pasobra nan a haci nos un cos malo. Pero, kico bo mester haci si un hende kier purba bringa cu bo? Si e purba pone bo rabia door di tenta bo, hari bo y bisa bo cu bo tin miedo, of cu bo ta cobarde, kico bo tin cu haci? Bo mester dal bai y bringa cu ne?—

Laga nos bolbe wak kico Bijbel ta bisa. Ban na Mateo capitulo 5, versiculo 39. Ei Hesus ta bisa: ‘No resisti hende malbado. Ma ken cu dal bo un bofta na bo banda drechi di cara, dun’e e otro banda tambe.’ Kico bo ta kere cu Hesus tawata kiermen? Bo ta kere cu e tawata kiermen cu si un hende dal bo un mokete na un banda di bo cara, bo mester lag’e dal bo na e otro banda tambe?—

No, esei sigur no ta loke Hesus tawata kiermen. Un bofta no ta manera un mokete. Ora un hende bofta bo, esei ta mas manera ora un hende pusha bo. Si un hende pusha bo, kisas ta bringa e kier bringa cu bo. E kier pa bo rabia. Y si bo rabia anto push’e bek, kico ta sosode?— Probablemente boso ta cuminsa bringa.

Pero Hesus no tawata kier pa su siguidonan bringa. Pesei el a bisa cu si un hende dal nos un bofta, nos no mester dal e bek. Nos no mester rabia y cuminsa bringa. Pasobra si nos hacie, nos ta mustra cu nos no ta miho cu esun cu a cuminsa bringa prome.

Si bin problema, kico bo ta kere ta e miho cos pa haci?— Bo tin cu bai for di eibanda. E otro hende por pusha bo un par di biaha mas. Pero probablemente lo e no sigui. Si bo cana bai, esei no kiermen cu bo ta suak. E kiermen cu bo ta fuerte, pasobra bo ta haci cos bon asta ora ta dificil.

Pero awor, si bo dal bai bringa anto gana, kico por pasa e ora ei?— Esun cu bo a bati por bin bek cu un par di amigo. Nan por asta bati bo cu un palo of hinca bo cu cuchiu. B’a mira pakico Hesus no kier pa nos bringa?—

Kico nos mester haci si nos mira otro hende ta bringa? Nos mester tuma parti pa un di nan?— Bijbel ta bisa nos kico ta bon pa haci. Ban na Proverbionan capitulo 26, versiculo 17. E ta bisa: “Esun cu pasa entremete su mes den pleito di otro ta manera un hende cu ta coi un cacho na su horea.”

Kico ta pasa si bo gara un cacho na su horea? E ta sinti dolor y e ta purba morde bo. Of no? Mas e cacho purba los, mas duro bo tin cu ten’e na su horea, y mas rabia e cacho ta bira. Si bo lag’e bai, probablemente e ta morde bo duro. Pero, bo por keda cu ne teni na su horea pa semper?—

Awel, ta den un problema asina nos ta haya nos si nos mete den pelea di otro hende. Kisas nos no sa ta cua di nan a cuminsa bringa prome, ni dicon nan ta bringa. Kisas bo ta mira nan ta bati un hende. Pero por ta cu ta horta el a horta un cos di e otro hende. Si nos tuma parti p’e, ta un ladron nos ta yuda. Esei lo no ta bon, toch?

Wel, kico bo mester haci anto si bo mira hende ta bringa?— Si ta na scol, bo por core bai bisa un maestro. Y si no ta na scol, bo por yama bo mama, bo tata of un polis. Si, nos mester busca pas, evita problema, asta ora otro hende tin gana di bringa.

Berdadero disipel di Hesus ta haci tur loke nan por pa evita di haya nan den bringamento. Asina nos ta mustra cu nos ta fuerte pa haci cos bon, asta ora ta dificil. Bijbel ta bisa cu un disipel di Hesus no tin nodi bringa, ma e mester ta amabel cu tur hende.—2 Timoteo 2:24.