Abo Semper Kier Ta Prome?

BO CONOCE un hende cu semper kier ta esun prome?— Ora hende asina tin cu para den rei, tin biaha nan ta pusha otro hende pa nan para te dilanti. Bo a yega di mira un cos asina sosode?— E Gran Maestro a yega di mira asta hende grandi purba haya e prome luga, esta, e luga mas importante, y e no a gusta esei. Laga nos ban wak kico a pasa.

Bijbel ta bisa cu nan a invita Hesus na un comemento grandi na cas di un Farizeo. E Farizeo tawata un lider religioso importante. Despues cu Hesus a yega, el a cuminsa mira con algun di e otro invitadonan tawata drenta anto scohe e miho luganan na mesa. Pesei, el a conta e invitadonan un cuenta. Bo kier tend’e?—

Hesus a bisa: ‘Ora un hende invita bo na un fiesta di casamento, no scohe e luga mas miho of mas importante.’ Bo sa dicon Hesus a bisa asina?— El a splica cu kisas tin un otro invitado cu ta mas importante cu bo. E ora ei, manera bo por mira riba e plachi, esun cu a pone e fiesta ta drenta y bisa: ‘Duna e homber aki bo luga, y abo bai sinta ayabanda.’ Con e invitado lo sintie e ora ei?— Lo e sinti berguensa, pasobra tur e otro invitadonan ta mira con e ta lanta bai na un luga menos importante.

Asina Hesus a splica cu no ta bon pa nos kier haya e miho luga. Pesei el a bisa: ‘Ora nan invita bo na un fiesta di casamento, bai sinta na e luga di mas abou, esun di menos importante. E ora ei, kisas esun cu a invita bo ta drenta y bisa: “Amigo, subi bai mas ariba.” E ora ei lo bo haya honor dilanti tur otro invitado ora bo bai na un miho luga.’—Lucas 14:1, 7-11.

Bo a compronde kico Hesus kier a siña nos cu e cuenta?— Ban wak un ehempel pa mira si bo a compronde. Imagina bo cu bo ta subi un bus yen di hende. Kico bo mester haci? Core bai busca luga pa sinta anto laga un hende mas grandi keda para?— Hesus lo keda contento si bo haci asina?—

Tin hende ta bisa cu Hesus no ta worry kico nos haci. Pero abo ta kere e cos ei?— Ora Hesus tawata na e comemento na cas di e Farizeo, el a wak con e hendenan tawata scohe nan luga di sinta. Bo no ta kere cu e tin mesun interes den loke nos ta haci awendia?— Awor Hesus ta den shelo, y e por wak bon bon kico nos ta haci.

Ora un hende kier ta esun prome, e cos ei por trece problema. Hopi bes ta bin pleitamento, y hende ta rabia cu otro. Tin bes e cos ei ta pasa ora cu mucha ta subi bus pa bai keiro hunto. Asina porta di bus dal habri, e muchanan ta haci lihe pa nan ta prome. Nan kier e miho luganan di sinta, esnan na bentana. E ora ei, kico tin chens di pasa?— Si, tin chens cu nan ta rabia cu otro.

Ora hende kier ta prome, e cos ei por trece hopi problema. Asta e apostelnan di Hesus a haya problema cu otro pa e motibo ei. Manera nos a siña den Capitulo 6 di e buki aki, nan a pleita cu otro tocante cua di nan ta esun mas importante. Kico Hesus a haci e ora ei?— Si, el a mustra nan cu esei no ta bon. Pero despues nan a bolbe pleita. Ban wak con e pleito ei a cuminsa.

E apostelnan y un par di otro disipel tawata cana bai e stad di Herusalem cu Hesus pa di ultimo bes. Hesus a papia cu nan varios bes tocante su Reino, y pesei Santiago cu Huan tawata pensando riba e tempo cu nan lo reina cu ne como rei. Nan a asta papia di e asunto cu nan mama Salome. (Mateo 27:56; Marco 15:40) Pesei, ora nan tawata riba caminda pa Herusalem, Salome a bin serca Hesus, hinca rudia su dilanti, y pidie un fabor.

Hesus a puntr’e: “Kico bo ta desea?” El a contesta cu e tin gana pa ora Hesus ta den su Reino e laga su yiunan sinta net banda di dje: un na su man drechi y e otro na su man robes. Wel, con bo ta kere cu e otro dies apostelnan a sinti nan ora nan a haya sa kico Santiago cu Huan a pidi?—

Si, nan a rabia hopi cu Santiago cu Huan. Pesei Hesus a duna tur su apostelnan un bon conseho. Hesus a bisa nan cu e hendenan cu ta manda den paisnan di mundo gusta sinti cu nan ta poderoso y importante. Nan kier tin puesto importante pa tur hende haci loke nan bisa. Pero Hesus a bisa su siguidonan cu nan si no mester ta asina. El a bisa cu mester ta net contrario: ‘Ken cu kier bira esun prome den boso mester ta boso esclabo.’ Imagina bo!—Mateo 20:20-28.

Bo sa kico un esclabo ta haci?— E ta sirbi otro hende sin spera pa otro hende sirbie. E ta tuma e luga menos importante, no esun miho. E ta comporta su mes manera esun cu ta menos importante, no esun mas importante. Y corda: Hesus a bisa cu si un hende kier bira esun di prome, e mester comporta su mes manera un esclabo di e otronan.

Awor, kico bo ta kere cu e cos ei ta nifica pa nos?— Un esclabo lo pleita cu su shon tocante cua di nan dos ta bai haya e miho luga pa sinta? Of, bo ta kere cu lo e pleita cu ne tocante cua di nan ta bai come prome? Kico bo ta kere?— Hesus a splica cu semper un esclabo ta laga su shon bai prome cu e mes.—Lucas 17:7-10.

Pesei, na luga di purba ta esun prome, kico nos mester haci?— Si, nos mester ta manera esclabo di otro hende. Y esei kiermen cu nos mester laga otronan bai prome cu nos. E ta nifica cu nos mester pensa cu otro hende ta mas importante cu nos. Bo por pensa un par di manera pa laga otro hende bai prome cu bo, esta, pensa riba nan prome cu riba bo mes?— Si bo kier, bo por bai bek na pagina 40 cu 41, y wak atrobe cua ta algun cos cu bo por haci pa mustra cu bo ta laga otro hende bai prome cu bo, door di sirbi nan.

Manera bo por ta corda, e Gran Maestro a laga otro hende bai prome cu ne door di sirbi nan. Riba e ultimo anochi cu el a pasa cu su apostelnan, el a asta sak abou y laba nan pia. Si nos tambe laga otro hende bai prome cu nos door di sirbi nan, e Gran Maestro lo keda contento, y su Tata Yehova Dios tambe.