Nos Tin Motibo Pa Gaba?

KICO ta nifica gaba? Abo sa?— Wak un ehempel aki. Bo a yega di purba haci un cos cu bo no por haci mucho bon? Bo a yega di purba scop un bala di futbol, of bula cabuya, anto un hende a bisa bo: “Ai, ami por hacie miho cu bo”?— Wel, e ora ei, esun cu a bisa bo e cos ei tawata gaba.

Con bo ta sinti bo ora un otro hende haci e cos ei? Bo gusta?— Anto con bo ta kere cu otro hende lo sinti si abo gaba tocante bo mes?— Ta bondadoso pa bisa un hende: “Mi ta miho cu bo”?— Yehova gusta hende cu ta haci asina?—

E Gran Maestro tawata sa di un par di hende cu ta kere cu nan ta miho cu otro. Nan tawata gaba tocante nan mes, y sinti cu tur otro hende ta menos cu nan. Pesei, un dia Hesus a conta nan un cuenta pa mustra nan con malo ta pa gaba tocante bo mes. Laga nos scuch’e.

E cuenta ta tocante un Farizeo y un cobrado di belasting. Farizeonan tawata maestronan religioso, y hopi bes nan tawata haci manera cos cu nan ta mas bon den bista di Dios of mas santo cu otro hende. E Farizeo den e cuenta di Hesus a subi bai Dios su tempel na Herusalem pa resa.

Hesus a bisa cu un cobrado di belasting tambe a subi bai na e tempel pa resa. Mayoria hende no tawata gusta cobrado di belasting. Segun nan, cobradonan di belasting tawata purba horta nan. Y ta berdad cu hopi cobrado di belasting no tawata honesto tur ora.

Den tempel, e Farizeo a cuminsa resa na Dios asin’aki: ‘Ai Dios, danki cu mi no ta un pecado manera otro hende. Mi no ta horta hende ni haci otro cos malo. Mi no ta manera e cobrado di belasting eibanda. Mi ta un homber husto. Mi ta keda sin come dos biaha pa siman pa mi tin mas tempo pa pensa riba bo. Y mi ta duna e tempel dies porshento di tur e cosnan cu mi haya.’ E Farizeo tawata hopi sigur cu e ta miho cu otro hende, no?— Y el a asta bisa Dios e cos ei.

Pero e cobrado di belasting si no tawata asina. E no a ni hisa su cara na shelo pa resa. El a keda para un poco leu cu su cabes abou. E cobrado di belasting tawatin hopi duele di e picanan cu el a haci. E tawata asta bati su pecho di duele. E no a purba bisa Dios con bon e ta. No, el a resa: ‘Ai Dios, tene misericordia di mi, un pecado.’

Cua di e dos hombernan aki bo ta kere cu Dios a keda contento cu ne? E Farizeo cu a kere cu e ta asina bon, of e cobrado di belasting cu tawatin duele di su picanan?—

Hesus a bisa cu ta cu e cobrado di belasting Dios a keda contento. Bo sa dicon? Hesus a splica: ‘Pasobra ken cu purba haci manera cos cu e ta miho cu otro hende lo ser rebaha. Pero esun cu humiya su mes lo ser halsa.’—Lucas 18:9-14.

Ki les Hesus a siña nos cu e cuenta aki?— El a siña nos cu ta malo pa pensa cu nos ta miho cu otro hende. Kisas nos no ta bisa cu nos ta miho cu otro. Pero toch nos lo por mustra cu nos ta kere asina, door di cos cu nos ta haci. Abo a yega di comporta bo mes asina?— Wak kico a yega di pasa cu apostel Pedro.

Ora Hesus a bisa su apostelnan cu nan tur lo bandon’e ora hende bin coh’e preso, Pedro a gaba: ‘Ni maske tur otro hende bai laga bo, ami si no ta bai laga bo nunca!’ Pero Pedro tawata robes. E tawata mucho sigur di su mes. El a bai laga Hesus toch. Pero na Capitulo 30 di e buki aki nos ta bai haya sa cu toch despues el a bolbe.—Mateo 26:31-33.

Laga nos tuma un ehempel di nos tempo. Laga nos bisa cu nan ta haci abo y un otro mucha den bo klas un par di pregunta na scol. Kico lo bo haci si abo por duna tur e contestanan mesora, pero e otro mucha si no por? Claro cu bo ta sinti bo bon pasobra bo sa e contestanan. Pero ta bondadoso pa bo bai compara bo mes cu esun cu ta tarda mas pa contesta?— Ta corecto pa bo mustra con bon bo ta, door di laga un otro hende sintie malo?—

Ta esei e Farizeo a haci. El a gaba cu e ta miho cu e cobrado di belasting. Pero e Gran Maestro a bisa cu e Farizeo ta robes. Ta berdad cu tin bes un hende por haci un cos miho cu otro hende. Pero esei no ta nifica cu di berdad e ta un miho hende.

Awel, bo ta kere cu nos tin bon motibo pa gaba si nos sa mas cos cu un otro hende?— Pensa un rato. Ta nos mes a traha nos celebro?— No, ta Dios a duna cada un di nos un celebro. Y casi tur cos cu nos sa, ta di otro hende nos a siña nan. Tin cos cu nos a lesa den buki, y tin cos cu ta hende a conta nos. Y asta si ta nos mes a kompronde un cos, ta con nos por a comprond’e?— Si, door di uza e celebro cu Dios a duna nos.

Ora un hende haci su best, ta lief di bo parti pa bis’e algo cu ta pon’e sinti su mes bon. Bis’e cu bo a gusta e cos cu el a haci. Por ta bo por asta yud’e hacie miho. Abo lo gusta si otro hende haci asina cu bo, toch?—

No ta tur hende tin mes hopi forsa. Awor, si bo tin mas forsa cu bo ruman homber of bo ruman mohe, bo ta kere cu esei ta un motibo pa bo gaba?— No. Ta e cuminda cu nos ta come ta yuda nos haya forsa. Y ta Dios ta duna e lus di solo, e awasero y tur otro cos cu tin mester pa mata crece, pa nos haya cos di come. Of no?— Awel ta Dios nos mester gradici si nos tin forsa.—Echonan 14:16, 17.

Nos ningun no gusta tende hende gaba tocante nan mes, no ta berdad?— Laga nos keda corda loke Hesus a bisa: ‘Mescos cu bo kier pa hende haci cu bo, asina bo mester haci cu nan.’ Si nos haci asina, nunca nos lo no bira manera e Farizeo cu a gaba tocante su mes den e cuenta cu e Gran Maestro a conta.—Lucas 6:31.

Un dia un hende a yama Hesus “bon.” Kico e Gran Maestro a contesta? Bo ta kere cu el a bisa: ‘Si, mi ta bon berdad’?— No, e no a bisa asina. Loke el a bisa ta: “Niun hende no ta bon sino Dios so.” (Marco 10:18) Maske e Gran Maestro tawata perfecto, e no a gaba tocante su mes. Na luga di esei el a laga tur alabansa bai pa su Tata Yehova.

Tin un hende anto cu si nos por gaba tocante dje?— Si, nos por gaba tocante Yehova Dios, nos Creador. Ora nos mira un bahada di solo bunita, of ora nos mira un otro creacion maraviyoso, nos por bisa un hende: ‘Ta nos gran Dios Yehova a traha e cos ei!’ Laga nos ta cla tur ora pa papia tocante e cosnan grandi cu Yehova a haci, y esnan cu e ta bai haci den futuro.